Esitele 8 - IBAYIBOLO 2024

Aba Yuda bali pakutanizya

¹ Pisiku lilalila u mwene u Ahaziwelo akamupa u mwene umukolo u Esitele inyumba iya Hamani, yuyo akaba mulwani uwa ba Yuda. Po u Molodikayi akiza pamaso pa mwene, pakuti u Esitele akamubuzya u mwene ukuti u Molodikayi akaba mukamu wache.

² U mwene akavula impete iya chidindo chache, yiyo akamufyula u Hamani nukumupa u Molodikayi. U Esitele akamusala u Molodikayi pakuba we kapitawa uwa katundu uwa Hamani.

³ U Esitele akamulambilizya sona u mwene nukwisumba muvinama, bo akulila. Akamulaba ukuti amazye ichintu ichibibi chicho u Hamani umu Agagi yula akabatikagha pakubabombela aba Yuda.

⁴ U mwene akamusonta u Esitele ni ndisa yache iya golide iya bumwene, po u Esitele akimilila pamaso pa mwene nukuti,

⁵ “Wee mwene, nanti chingakuhobosya sona nanti wampelela ichisa nukuhoboka nane, usimbe ululaghilo ulwakususannya na zizyo u Hamani umwana uwa Hamedata umu Agagi, umwana uwa Hamidata akabatika ukuti alunangannye uluko ulwa ba Yuda muvigaba vyako vyosi.

⁶ Nkimba ningajimba bulibuli pakubennya abakamu bane bakunanganika? Nkimba ningajimba bulibuli pakubennya abakamu bane bakughoghiwa?”

⁷ U mwene u Ahaziwelo akamwamula u mwene umukolo u Esitele poka nu Molodikayi umu Yuda yula akati, “Ennya, namupiye kale u Esitele inyumba iya Hamani sona bamupayikite kale u Hamani pikwi, pachifukwa icha chintu ichibibi chicho akalondagha pakubabombela aba Yuda.

⁸ Polelo usimbe ululaghilo ulunji mwitabwa ilya mwene mubuzilo ubwa ba Yuda, nukudindapo ni chidindo icha mpete iya mwene, pakuti nanti ukalata asimbiwa mwitabwa ilya mwene nukudindapo ni chidindo icha mpete yache, atalipo nayumoyumo umuntu angamusulannya.”

⁹ Pisiku ilya 23 mumwezi uwabutatu uwa Sivani, abasimbi aba kunyumba iya bumwene bakitiziwa. Po ukuyana nu lulaghilo ulwa Molodikayi, bakabasimbila abakalata aba Yuda, na makambala na balaghili aba muvigaba sona na balongozi aba muvigaba 127 ukwandila ku Indiya mupaka ku Etiyopiya. Abakalata banaba bakasimbiwa ukuyana na kasimbile aka neno iya chigaba chilachila naku bantu bosi ukuyana ni neno yabo sona naku ba Yuda ukuyana nakasimbile aka neno yabo.

¹⁰ U Molodikayi akabasimba abakalata banaba mwitabwa ilya mwene u Ahaziwelo nukudindapo ni chidindo icha mpete iya mwene, po akazituma intumi pafalasi izya mwene, zizyo zikaba nyengo nkani pakuchimbila.

¹¹ Abakalata abamwene bakabapa ubwabuke aba Yuda, babo bakikalagha mukaya kosi akakulu nkani umwakuti bangabungana poka nukwipoka bene. Bakabapanga ubwabuke ubwakuti abanangannye nukubaghogha sona nukubazimizya abasilikali aba inko yosi, pamo ichigaba chicho chingalonda pakulwana nabo poka na bachi babo sona na bana babo, nukufyula abalwani babo ukatundu wabo wesi.

¹² Zinizi zikabombiwa muvigaba vyosi ivya mwene u Ahaziwelo mwisiku lyoka ilya 13 mumwezi uwa 12 uwa Adala.

¹³ Amazyu ghagho ghakasimbiwa mubakalata bala ghakafumuziwa muvigaba vyosi ukuti ulu lukaba lulaghilo naloli, umwakuti aba Yuda biyannyanje pakubatanizya abalwani babo pisiku lilalila.

¹⁴ Po abantu babo bakatumiwa bakukwela pafalasi izya mwene zizyo zikaba nyengo pakuchimbila, zizyo zikaba zya muchibagha icha mwene. Ululaghilo lulalula lukafumuziwa mukaya akakulu nkani aka Susa.

¹⁵ U Molodikayi akepapo pamaso pa mwene, bo avwalite amenda agha bumwene agha buluu na maswepu sona ni mpumpu iya golide iya bumwene ni nkazo intonte inchesamile. Po abantu aba mukaya akakulu nkani aka Susa bakaba nu lusekelo ulukulu nkani.

¹⁶ Pakuti kakaba kabalilo akakuhoboka na kakusekela aka ba Yuda, po bakalya nukusekela nkani.

¹⁷ Muchigaba chosi sona na mukaya kosi akakulu nkani, kosi kuko ululaghilo ulwa mwene lukafumuziwa, mukaba ukuhoboka nukusekela pakasi paba Yuda sona bakaba nu lusekelo ulukulu nkani. Abantu aba inko izinji bakanduka pakuba ba Yuda, pachifukwa ichakuti bakabanyilagha nkani aba Yuda bala.