Esitele 7 - IBAYIBOLO 2024

U Hamani apayikiwa pikwi

¹ Po u mwene nu Hamani bakabuka pakulya poka nu mwene umukolo u Esitele.

² Pisiku ilyabubili ilya lusekelo, bo bali pakung'wela uvinyo, u mwene akalalusya sona akati, “Wee mwene umukolo u Esitele, nkimba ukulonda ichoni? Nena, ukwiza pakuchipokela. Napo angaba we hafu uwa bumwene bwane, naloli ukwiza pakuchipokela.”

³ Po u Esitele akamula akati, “Wee mwene, nanti naloli wampelela ichisa sona nanti ungahoboka nacho, chicho nkulaba ichakuti imbanje nubumi sona nukuti abantu abaluko lwane bope babanje nubumi.

⁴ Pakuti ane poka na bantu abaluko lwane twaghuliziwa umwakuti abantu bakulonda pakutunangannya, ukutughogha sona nukutuzimizya. Nanti bakalondagha pakutughulizya bulo pakuba bazya, aswe twe banavuli na bakolo, ngali napuma bulo ukusita ukunenapo nachimochimo, pachifukwa ichakuti intamyo zyitu zitangamuvulungannya u mwene.”

⁵ Po u mwene u Ahaziwelo akamulalusya u Esitele akati, “Nkimba wewenu yunuyu akulonda pakubabombela zinizi? Nkimba ali ko kwiyi?”

⁶ U Esitele akamula akati, “Umuvwimi, sona umulwani witu we Hamani umuntu umubibi.” Po u Hamani akaba nubogha nkani pamaso pa mwene sona na pamaso pa mwene umukolo yula.

⁷ U mwene akimilila bo akalaye nkani nukwepapo palusekelo lula, po akabuka mulupaso palubinjilo ulwa nyumba iya bumwene. Loli bo u Hamani azyaghannya ukuti u mwene atakamwinong'onela ubwiza, akasyalikila kwisinda pakumulaba u mwene umukolo u Esitele ukuti abupoke ubumi bwache.

⁸ Bo u mwene anyokako nukwinjila muchipinda chicho mukaba lusekelo, akamwagha u Hamani alambalaye pasi pachitala chicho u Esitele akalambalalapo. Po u mwene akati, “Nkimba umuntu yunuyu akulonda pakumulema u mwene umukolo pamaka munyumba yane bo nkwennya na maso?” Bo u mwene anena bulo amazyu ghanagha, abantu bakamuvwinka icheni u Hamani.

⁹ Po u Halibona weka uwa bapase yuyo bakamubombelagha u mwene akati, “Wee mwene, u Hamani yunuyu akapanga ichikwi icha mamita 23 mumwanya ukuti amupayikepo u Molodikayi, umuntu yuyo akabupoka ubumi bwako.” U mwene akalamula akati, “Mumupayikepo umwenecho palapala!”

¹⁰ Po bakamupayika u Hamani pikwi lilyo akapanga ukuti amupayikepo u Molodikayi. Pisinda pache ubukali ubwa mwene bukatozoka.