Esitele 5 - IBAYIBOLO 2024

U Esitele akumwitizya u mwene nu Hamani kulusekelo

¹ Pisiku ilyabutatu u Esitele akavwala inkazo yache iya bumwene nukwimilila mukasi muntanda iya nyumba iya mwene, kuntazi ukwa chipinda ichikulu icha mwene. Pakabalilo kalakala u mwene akikalagha pachitengo chache icha bumwene muchipinda ichikulu umwakwenannya nu mulyango.

² Bo amwennya u mwene umukolo u Esitele yula imiliye muntanda, akahoboka nawe, po akamusonta ni ndisa iya bumwene iya golide, yiyo yikaba munyobe yache. U Esitele akapalamila nukuyipalamasya indisa yila kusonga.

³ Po u mwene akamulalusya akati, “Wee mwene umukolo u Esitele, nkimba kwawachi? Nkimba ukulonda ichoni? Napo angaba we hafu uwa bumwene bwane, naloli ukwiza pakuchipokela.”

⁴ U Esitele akamula akati, “Wee mwene, nanti chingakuhobosya, nkukulaba ukuti ilelo wize poka nu Hamani kulusekelo lulo nakuyanizizye.”

⁵ U mwene akalamula akati, “Losi ulu mwize nu Hamani, umwakuti tungabomba chicho u Esitele akuchilonda.” Po u mwene akabuka poka nu Hamani kulusekelo lulo u Esitele akabayanizizya.

⁶ Bo bali pakung'wela uvinyo, u mwene akamulalusya sona u Esitele akati, “Nkimba ukulonda ichoni? Nena, ukwiza pakuchipokela. Napo angaba we hafu uwa bumwene bwane, naloli ukwiza pakuchipokela.”

⁷ U Esitele akamula akati, “Chicho nkulaba cho ichi:

⁸ Wee mwene, nanti wampelela naloli ichisa nukukwanilisya zizyo nkulaba, awe poka nu Hamani indabi mwize kulusekelo lulo nkwiza pakubayanizizya amwe. Po nkwiza pakukwamula zizyo ukundalusya.”

U Hamani akumukalalila u Molodikayi

⁹ Pisiku lilalila u Hamani akabuka kulusekelo lula bo ahobokite nkani. Loli bo amwennya bulo u Molodikayi pamulyango uwa nyumba iya bumwene sona bo azyaghannya ukuti atakwimilila pamo ukumupa umuchizi, akamukalalila nkani u Molodikayi.

¹⁰ Loli u Hamani akilema umoyo nukubwela. Po akabitizya abamanyani bache, poka nu muchi u Zeleshi.

¹¹ U Hamani akanda pakwituvya bo akubalingannya nizya bukabi bwache, na bana bache abalumendo abinji, na mosi mumo u mwene akamuchindikila, sona namumo u mwene akamukwezezya pachitengo icha muchizi ukubachila abalongozi na makambala ghosi.

¹² U Hamani akonjelezya pakunena ukuti, “Te zyo zinizi zyene awe. U mwene umukolo u Esitele atakamwitizya nayumoyumo umuntu ukuti abuke poka nu mwene kulusekelo lulo amuyanizizya, loli ane ne mwene. Anyitizya ukuti indabi imbuke poka nu mwene kulusekelo lula.

¹³ Loli zyosi zinizi zitakunhobosya nanti namwennya bulo u Molodikayi umu Yuda yula ikaye pamulyango uwa nyumba iya mwene.”

¹⁴ Umuchi u Zeleshi poka na bamanyani bache bosi bakamubuzya bakati, “Upange ichikwi icha mamita 23 mumwanya. Pandabindabi umulabe u mwene ukuti u Molodikayi apayikiwanjepo. Po ubukaye poka nu mwene kulusekelo umwakuhoboka.” Ifundo yiniyi yikamuhobosya nkani u Hamani, umwakuti akapangisya ichikwi chila.