Esitele 4 - IBAYIBOLO 2024

U Molodikayi akumulaba u Esitele ukuti amwavwe

¹ Bo u Molodikayi azyaghannya zizyo zikabombiwa, akazepula amenda ghache sona akavwala amasaka nukwinyafila itoyi kumutu pachifukwa icha chitima, po akinjila mukasi nkani mukaya akakulu nkani kala, bo akukolomoka nkani pachifukwa icha chitima.

² Loli akimilila pamulyango uwa nyumba iya mwene, pakuti umuntu uwakuvwala amasaka atakitikiziwa pakwinjilamo.

³ Muvigaba vyosi mumo mukafumuziwa ululaghilo ulwa mwene mukabamo ichililo ichikulu nkani pakasi paba Yuda. Bakatuzya pakulya, bakalila nukukolomoka sona abinji bakavwala amasaka nukwinyafila itoyi pachifukwa icha chitima.

⁴ Bo abambombo abalindu aba Esitele sona na bapase bamubuzya u Esitele zizyo u Molodikayi akabombagha, akavulala nkani mumoyo wache. Po akamutumila amenda ukuti avwale nukuvula amasaka ghala, loli u Molodikayi akakana.

⁵ U Esitele akamwitizya u Hataki, usongo uwa bapase abamwene, babo bakamubombelagha nukumulamula ukuti abuke kwa Molodikayi pakumulalusya ichifukwa chicho akabombela bunubu.

⁶ Po u Hataki akabuka kwa Molodikayi palubinjilo ulwa kaya akakulu nkani kala pamulyango uwa nyumba iya mwene.

⁷ U Molodikayi akamubuzya zyosi zizyo zikamuwila sona ni ndalama zizyo u Hamani akalayizya pakubika kunyambi iya bumwene ukuti zibanje zyakulipilila abantu babo bakalondagha pakubaghogha aba Yuda.

⁸ U Molodikayi akamupa sona ukalata yuyo akanenagha nizya kughoghiwa ukwa ba Yuda bosi, yuyo akafumuziwa mukaya akakulu nkani aka Susa. Akamulaba ukuti amulanjizye u Esitele ukalata yula nukumupangila zyosi zinizi sona nukumulaba ukuti abuke kwa mwene pakumulambilizya ukuti abapelelaye ichisa abantu bache.

⁹ U Hataki akanyokela kwa Esitele nukumupangila zizyo u Molodikayi akamubuzya.

¹⁰ Po u Esitele akamubuzya u Hataki ukuti abuke pakumubuzya u Molodikayi ukuti,

¹¹ “Amakambala ghosi agha mwene na bantu bosi aba muvigaba ivya muchisu icha mwene bazimenye ukuti pali ululaghilo loka ulwakuti nanti umwanavuli pamo umukolo injila mulubinjilo ulwa mwene, bo u mwene atamwitizizye, aghoghiwanje. Loli umuntu yuyo u mwene amusonta ni ndisa yache iya golide iya bumwene, weyuyo angaba nubumi. Ghachilapo amasiku 30 ukwandila pisiku lilyo nkitiziwa ukuti imbuke pamaso pa mwene.”

¹² Bo u Molodikayi ivwa zizyo u Esitele akanena,

¹³ akamusoka akati, “Utakinong'onaye ukuti awe we mwene ukwiza pakupona pakasi paba Yuda bosi pachifukwa ichakuti uli munyumba iya mwene.

¹⁴ Pakuti nanti uli bulo myee pakabalilo ngati aka, ubwavwilizi nukupona ukwa ba Yuda kungafumila kubunji, loli awe poka na bamunyumba iya ghuso mukwiza pakuzimila. Nkimba wewenu yuyo angazimanya ukuti lumo cho chifukwa ukizila kunyumba iya bumwene pakabalilo ngati aka?”

¹⁵ Po u Esitele akamwamula u Molodikayi akati,

¹⁶ “Buka ubabungannye poka aba Yuda bosi babo bali mukaya akakulu nkani aka Susa nukuntuzikizya pakulya. Mutakalyanje pamo ukung'wela pamusanya na pabusiku ukwa masiku matatu. Ane na bambombo bane abalindu tukwiza pakutuzya pakulya. Po nkwiza pakubuka pamaso pa mwene, napapo chitakwitikiziwa ni ndaghilo. Nanti nkufwa, infwanje bulo.”

¹⁷ Po u Molodikayi akabuka nukuzibomba zyosi zizyo u Esitele akamubuzya.