Esitele 3 - IBAYIBOLO 2024

U Hamani akubatika nizya kubaghogha aba Yuda

¹ Bo pachilapo akabalilo, u mwene u Ahaziwelo akamukwezya u Hamani umwana uwa Hamedata, umu Agagi pakumupa ichitengo icha muchizi ukubachila abalongozi abanji bosi.

² Po amakambala ghosi agha kunyumba iya bumwene ghakamufughamilila nukumuchindika u Hamani, pakuti u mwene weyuyo akalamula ukuti zinizi zibanje bunubu. Loli u Molodikayi akakana pakumufughamilila pamo ukumuchindika.

³ Amakambala agha mwene, ghagho ghakaba pamulyango uwa nyumba iya mwene ghakamulalusya u Molodikayi ghakati, “Nkimba choni chicho ukulusulannya ululaghilo ulwa mwene?”

⁴ Isiku ni siku bakanenagha nawe, loli atakabateghelezyanga. Po bakamubuzya u Hamani ukuti amwennye u Molodikayi pankalo yache yiniyi, pakuti bakababuzya ukuti akaba mu Yuda.

⁵ U Hamani akakalala nkani, bo ennya ukuti u Molodikayi atakumufughamilila pamo ukumuchindika.

⁶ Bo azimanya ukuti u Molodikayi akaba mu Yuda, po akadumula ukuti atakamughoghe u Molodikayi mwene. Loli akabatika nizya kubaghogha aba Yuda bosi mubumwene bosi ubwa mwene u Ahaziwelo.

⁷ Mumwezi uwakwanda uwa Nisani, mumwaka uwa 12, bo u mwene u Ahaziwelo akulaghila, bakapanga amayele pamaso pa Hamani ukuti basale isiku ilyenecho sona nu mwezi uwenecho. Po amayele ghala ghakawila umwezi uwa 12 uwa Adala.

⁸ Po u Hamani akamubuzya u mwene u Ahaziwelo akati, “Pali uluko lumo ulwa bantu lulo lunyampanite bulo pakasi pabantu muvigaba vyako vyosi, lulo inyiho zyabo zilekanite ni nyiho izya bantu abanji bosi, sona lulo lutakukonka indaghilo zyako. Inzimenye akiza nkani ukuti wemwene utangabaleka bulo.

⁹ Wee mwene, nanti chingakuhobosya bika ululaghilo ulwakuti uluko losi lughoghiwanje, po ane nkwiza pakubika kunyambi iya bumwene amatalenti agha siliva 345 aghakulipilila bantu babo bakwiza pakuzibomba zinizi.”

¹⁰ Po u mwene akavula impete iya chidindo chache nukumupa u Hamani umwana uwa Hamedata umu Agagi umulwani uwa ba Yuda yula.

¹¹ U mwene akamubuzya u Hamani akati, “Indalama poka na bantu vili munyobe zyako. Ubabombele abantu banaba chosi chicho ukulonda.”

¹² Po pisiku ilya 13 mumwezi uwakwanda akabitizya abasimbi bosi abamwene. Bakasimba abakalata pa zizyo u Hamani akalamula ukuyana na kasimbile sona ni neno iya chigaba chosi nukubatumila abimilili abamwene na balaghili ba muvigaba ivyakulekanalekana sona na bantu abamanyikwe aba inko izyakulekanalekana. Bakasimba abakalata banaba pakubombezya itabwa ilya mwene u Ahaziwelo sona bakadindapo ichidindo icha mpete yache.

¹³ Bakatuma intumi na bakalata bala kuvigaba vyosi ivya mwene ukuti babanangannye, babaghoghe nukubazimizya aba Yuda bosi, manyi abana pamo abasongo, manyi bakolo pamo babonda sona nukuti zinizi zibombiwanje mwisiku lyoka ilya 13 mumwezi uwa Adala, nukubafyula ukatundu wabo wesi.

¹⁴ Zizyo zikasimbiwa mubakalata bala zikaba zyakuti zifumuziwanje muchigaba chosi sona na pakasi pa inko zyosi pakuba lulaghilo, umwakuti umuntu wesi iyanizye zila nizya isiku lilalila.

¹⁵ Bo u mwene alamula, intumi zila zikabuka umwalubilolubilo, po ululaghilo lula lukafumuziwa mukaya akakulu nkani aka Susa. U mwene poka nu Hamani bakikala pasi pakung'wela. Loli abantu aba mukaya akakulu nkani aka Susa bakavulungana nkani.