Esitele 2 - IBAYIBOLO 2024

U Esitele aba we mwene umukolo

¹ Pisinda pache bo umoyo uwa mwene u Ahaziwelo watonta, akanda pakwinong'ona ivintu vivyo u Vashiti akabomba sona nu lulaghilo ulusimbe lulo akabika pachifukwa icha yuyo.

² Ababombi babo bakamubombelagha u mwene bakasakizya bakati, “Wee mwene, itikizya ukuti bakulondele abalindu abakuboneka akiza nkani sona babo batamumenye umwanavuli.

³ Usale intumi muvigaba vyosi ivya bumwene bwako, ukuti bize na balindu abakuboneka akiza nkani kumpanga mukaya akakulu nkani aka Susa. U Hagayi umupase ukapitawa uwa mwene abanje ni mbombo iyakusungilila abakolo banaba sona bapeghiwanje ivyakupakala.

⁴ Umulindu yuyo amuhobosya nkani u mwene, weyuyo abanje we mwene umukolo mubuzilo ubwa Vashiti.” Ifundo yiniyi yikamuhobosya nkani u mwene, po akabomba zizyo bakamubuzya.

⁵ Pakabalilo kalakala mukaya akakulu nkani aka Susa mukabamo umu Yuda yumo yuyo akaba we Molodikayi, umwana uwa Yayili, umwana uwa Shimeyi sona umwana uwa Kishi uwaluko ulwa Benjamini.

⁶ U Molodikayi akaba mukasi mubantu babo u mwene Nebukadineza uwamu Babiloni akabasenda ku Yelusalemu pakuba bazya poka nu mwene u Yehoyakini uwamu Yuda.

⁷ U Molodikayi akaba nu muvyala wache u Hadasa, kokuti u Esitele, yuyo akiza nawe poka pachifukwa ichakuti atakaba nu wise pamo unyina. Umulindu yunuyu akaba wakuboneka akiza nkani. Bo uwise nu nyina bafwa, u Molodikayi akikala nawe ngati mwana uwache nu wache.

⁸ Bo ululaghilo ulwa mwene lwafumuziwa bulo, abalindu abinji bakiza nabo mukaya akakulu nkani aka Susa. Wepe u Esitele akaba pakasi pa balindu bala. Po bakabuka nawe kunyumba iya bumwene nukumubika munyobe izya Hegayi, yuyo akenelezyanga impanga iya balindu.

⁹ Umulindu yula akamuhobosya nkani u Hegayi sona akamughana nkani. Panapo na panapo akanda pakumupa ivyakupakala sona ni chakulya ichiza nkani. Po akamupa abambombo abalindu seveni aba kunyumba iya bumwene ukuti bamubombelaye sona akamubika muchipinda ichiza mumpanga yila poka na bambombo bache bala.

¹⁰ U Esitele atakivumbula mwene nizya luko lwache pamo nizya bakamu bache, pachifukwa ichakuti u Molodikayi akamusoka ukuti atakivumbulaye.

¹¹ Isiku ni siku u Molodikayi akendagha mulubinjilo ulwa mpanga yila ukuti ennye mumo u Esitele akikalilagha sona namumo ivintu vikamubelagha akiza.

¹² Akabalilo kafika akakuti umulindu wesi abuke pamaso pa mwene u Ahaziwelo, bo amala amezi 12 aghakwiyanizizya, kokuti amezi sikisi aghakupakala amafuta agha mule sona amezi aghanji sikisi aghakupakala amafuta aghakununkila ni vyakupakala ivinji ivyakulekanalekana.

¹³ Bo akabalilo kafika akakuti Esitele abuke pamaso pa mwene, akapeghiwa chosi chicho akachilondagha ukuti asende mumpanga iya balindu yila ukuti abuke nacho kunyumba iya bumwene.

¹⁴ Pachamabwila akabukagha kulakula nukunyokako pandabindabi kuchipinda ichinji icha mpanga iya balindu yila munyobe izya Shashagazi, umupase uwa mwene, yuyo akabasungililagha abachi abazya bala. Umulindu yula atakanyokelagha sona kwa mwene yula, pene papo nanti u mwene yula akahoboka nawe nukumwitizya pakulitambula itabwa lyache.

¹⁵ Bo akabalilo kafika akakuti u Esitele, umwana uwa Abihayili, uwise umunandi uwa Molodikayi yuyo akamusenda pakuba mwana wache, abuke pamaso pa mwene, atakalaba ichintu nachimochimo, loli chene chicho akasakizya u Hegayi umupase, yuyo akenelezyanga impanga iya balindu yila. Po bosi babo bakamwennya u Esitele bakahoboka nkani.

¹⁶ Mumwezi uwa 10 uwa Tebeti, mumwaka waseveni bo u mwene u Ahaziwelo akulaghila, bakamusenda u Esitele nukwiza nawe pamaso pa mwene u Ahaziwelo kunyumba iya bumwene.

¹⁷ Po u mwene akamughana nkani u Esitele ukubachila abakolo bosi sona akahoboka nkani nawe ukubachila abalindu abanji bosi bala, umwakuti akamuvwika impumpu iya bumwene nukumupela pakuba we mwene umukolo mubuzilo ubwa Vashiti.

¹⁸ Po u mwene akamuyanizizya u Esitele ulusekelo ulukulu nkani, nukubitizya abalongozi na makambala ghache ghosi. U mwene akalamula ukuti isiku lilalila libanje lisiku ilyakutuzya muvigaba vyosi sona akagaba ivyabupi mubwighane bwache.

U Molodikayi akubupoka ubumi ubwa mwene

¹⁹ Bo bababungannya abalindu bala ulwabubili, u Molodikayi akikalagha pamulyango uwa nyumba iya mwene.

²⁰ Loli u Esitele atakivumbulagha nizya bakamu bache, sona nuluko lwache, ukuyana mumo u Molodikayi akamubuzizya. Pakuti u Esitele akamwivwilagha nkani u Molodikayi ngati mumo akabombelagha ukwanda pakabalilo kako akikalagha nawe.

²¹ Pakabalilo kalakala u Molodikayi akaba wakwenelezya pamulyango uwa nyumba iya mwene, po u Bigitana nu Teleshi amakambala agha mwene, ghagho ghakalindililagha pamulyango palapala bakakalala nkani, umwakuti bakabatika nizya kumughogha u mwene u Ahaziwelo.

²² Loli u Molodikayi akazyaghannya zizyo bakabatika pakubomba, po akamubuzya u mwene umukolo u Esitele, yuyo akamubuzya u mwene nizya chintu ichibibi chicho u Molodikayi akachaghannya.

²³ Bo babuzikizya nukwagha ukuti zikaba zyanaloli, amakambala mabili ghala ghakapayikiwa pikwi. Po zyosi zinizi zisimbiwe mwibuku ilya mbili pamaso pa mwene.