Esitele 1 - IBAYIBOLO 2024

U Vashiti akukana pakumwivwila u mwene u Ahaziwelo

¹ Ivi vyo vivyo vikabombiwa pakabalilo aka Ahaziwelo, yuyo akalaghilagha ivigaba 127 ukwandila ku Indiya mupaka ku Etiyopiya.

² Pakabalilo kalakala u mwene u Ahaziwelo akikala pachitengo chache icha bumwene mukaya akakulu nkani aka Susa.

³ Po mumwaka uwabutatu bo akulaghila, akabayanizizya ulusekelo ulukulu nkani abalongozi na makambala ghache ghosi. Palapala pakabapo abasongo aba basilikali aba mu Peleziya naba mu Mediya na bana aba bamwene sona na balongozi aba muvigaba.

⁴ Akabalanjizya ubukabi ubwa bumwene bwache nu buchindamu sona nu bukulu ubwa bumwene bwache ukwa masiku 180.

⁵ Bo amasiku ghala ghamala, u mwene akayannya ulusekelo ulwa masiku seveni mulupaso palubinjilo ulwa nyumba iya bumwene. Akabayanizizya abantu bosi abakabi na bapina bulo, babo bakikalagha mukaya akakulu nkani aka Susa.

⁶ Mulupaso mula bakalabannyamo na menda amatonte amaswepu nagha buluu nukughupinya ni mpote izya menda amatonte amaswepu sona bakabika utwela utuchesamile mumpete izya siliva, zizyo zikaba mumpanda izya mabwe aghamutengo. Mulupaso mulamula bakalamo na mabwe amiza nkani amachesamu nagha malabulo nagha kunyezimila sona na ghanji aghamutengo nkani, po bakabikamo ivitengo ivyakweghamilako ivya golide nu siliva.

⁷ Abantu bakapeghiwa uvinyo mumbako izyakulekanalekana izya golide sona uvinyo uwa bumwene akaba mwinji nkani, ukuyana nukupa ukwa mwene.

⁸ Po umuyeni wesi akang'wela ukuyana namumo akalondelagha, pakuti u mwene akabalamula bosi babo bakabagabilagha abantu uvinyo ukuti bamupanje umuntu wesi ukuyana namumo akalondelagha.

⁹ U mwene umukolo u Vashiti wepe akabayanizizya ulusekelo abakolo, babo bakabombagha imbombo munyumba iya bumwene iya Ahaziwelo.

¹⁰ Pisiku ilyaseveni ilya lusekelo lula, bo u mwene u Ahaziwelo akolwa nu vinyo akabalamula abambombo bache abapase seveni, kokuti u Mehumani nu Bizita nu Halibona nu Bigita nu Abagita nu Zetali sona nu Kalakasi,

¹¹ ukuti bize pamaso papache nu mwene umukolo u Vashiti, bo avwalite impumpu yache iya bumwene, umwakuti abantu na abalongozi bache bennye namumo akabonekelagha akiza, pakuti akaba wakuboneka akiza nkani.

¹² Loli bo abambombo bala bamubuzya u Vashiti amazyu agha mwene, atakabukako. Po u mwene akakalala nkani, umwakuti ubukali bwache bukakagha mumoyo wache.

¹³ Po u mwene akababuzikizya abantu abamahala, babo bakamanya namumo ivintu vikwendela ukuyana ni nyiho, pakuti lukaba lwiho ulwakuti u mwene anenezannyanje na bantu bosi, babo bakamanya nkani indaghilo ni nyiho,

¹⁴ sona babo bakaba kupipi nkani nu mwene. Abantu banaba bakaba bo aba: U Kalishena nu Shetali nu Adimata nu Talishishi nu Melesi nu Malisena sona nu Memukani, abalongozi seveni aba mu Peleziya sona naba mu Mediya, babo bakaba kupipi nkani nu mwene, sona bakaba pachitengo icha pamwanya nkani mubumwene bula.

¹⁵ U mwene akabalalusya akati, “Nkimba u mwene umukolo u Vashiti tubombe nawe choni ukuyana ni ndaghilo, pakuti akalusulannya ululaghilo lwane lulo ane ne mwene u Ahaziwelo nkalamula ukwendela mu bambombo bane abapase bala?”

¹⁶ Po u Memukani akamula pamaso pa mwene, napa balongozi akati, “U mwene umukolo u Vashiti atamusamuye u mwene bulo awe, loli abasamuye bope na balongozi sona na bantu bosi aba muvigaba ivya mwene u Ahaziwelo.

¹⁷ Pakuti inkalo iya mwene umukolo yikwiza pakumanyikwa pakasi pa bakolo bosi, po bope bakwiza pakubasamula abalume babo nukuti, ‘U mwene u Ahaziwelo akamwitizya u mwene umukolo u Vashiti ukuti ize pamaso papache, loli u mwene umukolo yula atakabukako.’

¹⁸ Mupaka nilelo bulo abachi aba balongozi aba mu Peleziya, naba mu Mediya, babo bivwa nizya nkalo iya mwene umukolo uyu, bakwiza pakughabombela bunubu amakambala agha mwene. Po ukusamulana nukukalalizannya kutakwiza pakumalapo nalumolumo.

¹⁹ “Wee mwene, nanti chingakuhobosya, sona nanti ungitikizya, usimbe ululaghilo mu ndaghilo izya Peleziya, nizya Mediya, lulo lutanganduliwa ulwakuti u Vashiti atakize nalumolumo pamaso papako we mwene u Ahaziwelo. Po umupanje ichitengo chache umuntu uyunji yuyo mwizapo ukumuchila.

²⁰ Nanti ululaghilo lulo wabika lwafumuziwa muchisu chako chosi, abakolo bosi bakwiza pakubachindika abalume manyi bakabi, manyi bapina.”

²¹ Amazyu ghanagha ghakamuhobosya nkani u mwene poka na balongozi bala, po u mwene akabomba zizyo u Memukani akasakizya.

²² U mwene akatuma abakalata kuvigaba vyosi mubumwene bwache, ukuzitumila inko zyosi, muneno zyabo ukuti umwanavuli wesi abanje mutu uwa nyumba yache.