Daniyeli 9 - IBAYIBOLO 2024

Ulwiputo ulwa Daniyeli

¹ Mumwaka uwakwanda Daliyasi umwana uwa Ahaziwelo yuyo akapapiwa mu Mediya bo akulaghila, yuyo akaba we mwene uwa chisu icha Babiloni,

² mumwaka uwakwanda uwa bulaghili bwache, ane ne Daniyeli nkaghivwisya amasimbo, ukuyana na mazyu ghagho u Mwene akamubuzya umulaghuzi u Yelemiya ukuti ukumongonkana ukwa Yelusalemu kukwiza pakumala amaka 70.

³ Po nkaghalabukila kwa Mwene u Chala nukumulambilizya pakwiputa, nkatuzya pakulya nukuvwala amasaka nukwinyafila itoyi, pachifukwa icha ichitima.

⁴ Nkiputa kwa Mwene u Chala wane nukwilata imbibi zyane nkati, “Wee Mwene, we Chala umukulu sona nu wakuswighisya, ukukwanilisya ulufingo lwako nukubaghana abantu babo bakughanite nukughakonka amalamulo ghako.

⁵ Twananga sona twabomba ububibi. Twabombela mu bubibi sona twasambuka. Twaghasulannya amalamulo sona ni ndaghilo zyako.

⁶ Tutakabateghelezya ababombi bako abalaghuzi, babo bakanenela mwitabwa lyako ku bamwene bitu, na balongozi bitu, na banyenya bitu, sona na bantu bosi aba muchisu.

⁷ “Wee Mwene, awe we mugholosu, loli ilelo tuli ni soni nkani. Abantu babo bakwikala muchisu icha Yuda, ni icha Yelusalemu sona na mu Izilayeli mosi, bosi aba papipi naba kubutali, sona na kuvyisu vyosi kuko ubanyapanizizye, pachifukwa ichakuti tute basubiliwa kukwako.

⁸ Wee Mwene, aswe poka na bamwene bitu, na balaghili bitu, sona na banyenya bitu bosi tuli ni soni pachifukwa ichakuti twakunangila nkani.

⁹ U Mwene u Chala witu wachisa nkani sona waluhobokelo nkani, napapo twamusambukila.

¹⁰ Tutamwivwila u Mwene u Chala witu pamo ukuzisunga indaghilo zizyo akatulekela ukwendela mu babombi abalaghuzi bache.

¹¹ Aba Izilayeli bananga Indaghilo zyako, bazipa inkonto sona bakana pakukwivwila. “Polelo inguno ni chilapo ni Ndaghilo visimbiwe mu Lulaghilo ulwa Mozesi umubombi uwa Chala vyapunguliliwa papitu, pachifukwa ichakuti twakunangila.

¹² Wazikwanilisya zizyo ukatubuzya sona zizyo ukababuzya abanyenya bitu pakutuwisizya intamyo. Zinizi zitabombiwepo nalumo ukuyana namumo chikabombiwa mu Yelusalemu.

¹³ Ukuyana namumo zisimbiwe mu Ndaghilo izya Mozesi, intamyo zyosi zinizi zyatuwila, loli pope bulo tutinong'onitepo pakulaba ichisa icha Mwene u Chala witu pakuzileka imbibi zyitu nukubuteghelezya ubwanaloli.

¹⁴ U Mwene atakazyelapo pakutuwisizya intamyo, pakuti u Mwene u Chala witu we mugholosu muvintu vyosi vivyo akubomba, loli pope bulo tutakamwivwila.

¹⁵ “Wee Mwene u Chala witu ukabefyamo abantu bako mu Ijiputi na maka ghako amakulu nkani, sona itabwa lyako lyamanyikwa mupaka ilelo, loli aswe twananga sona twabomba ububibi.

¹⁶ Wee Mwene, ukuyana ni mbombo zyako ingolosu, tonta umoyo sona efyako ubukali bwako pa Yelusalemu akaya kako akakulu nkani, sona ighamba lyako izelu. Imbibi zyitu sona nu bubibi ubwa banyenya bitu vyamupela u Yelusalemu na bantu bako pakuba chakusesya pakasi pabapalamani bitu bosi.

¹⁷ “Ilelo wee Chala witu, ivwa inyiputo nukulaba kwa mubombi wako. Umwakuti abantu bosi bakumanye ukuti we Mwene, ubwennye ni chisa ubuzilo bwako ubuzelu, bubo bwaba chisami.

¹⁸ Wee Chala, tegha ikutu lyako nukwivwa. Ighula amaso ghako nukwennya ukunanganika ukwa kaya kako kumanyikwe ni Tabwa lyako. Tutakukulambilizya pachifukwa ichakuti twebagholosu awe, loli pachifukwa icha chisa chako ichikulu nkani.

¹⁹ Eee Mwene teghelezya. Wee Mwene utuhobokele. Wee Mwene, ivwa sona bombapo zimo! Wee Chala utakakabaye! Umwakuti abantu bosi bamanye ukuti we Chala, pachifukwa ichakuti akaya kako akakulu nkani sona na bantu bako bamanyikwe pachifukwa icha Itabwa lyako.”

Uwantumi u Gabiliyeli akulingannya nizya bulaghuzi

²⁰ Nkiputagha nukwilata imbibi zyane sona ni mbibi izya bantu bane aba Izilayeli pakumulambilizya u Mwene u Chala wane, pakulyiputila ighamba izelu ilya Chala.

²¹ Bo nkwiputa, u Gabiliyeli yuyo nkamwennya muchisetuka ichakwanda akabulukila papo nkaba. Kanaka kakaba kabalilo aka chamabwila akakubikila ichakwiyipa.

²² Akiza nukumubuzya ukuti, “Wee Daniyeli, ilelo niza ukuti nkupe amahala nukwivwisya ivintu.

²³ Bo wanda bulo pakwiputa, u Chala akamula, lilyo niza pakukubuzya, pakuti we mughaniwa nkani. Polelo winong'onepo na mazyu ghanagha nukuchivwisya ichisetuka ichi.

²⁴ “Amaka 7 agha tubalilo aka 70 twabikiwa ukuti abantu aba mukaya akazelu, poka nakaya kako akakulu nkani akazelu babuleke ububibi bwabo sona ni mbibi. Bapepesyanje imbibi zyabo pakubomba ubugholosu ubwa bwila na bwila ichisetuka nu bulaghuzi vikwiza pakukwanilisiwa, sona Ubuzilo Ubuzelu nkani bula bupaghuliwanje.

²⁵ “Umanye nukwivwisya ichintu ichi: Ukwanda pakabalilo kako indaghilo zikafumuziwanga ukuti akaya aka Yelusalemu kazengiwanje sona mupaka umulaghili umupakiwa afike, pakwiza ukuchilapo amaka 7 aghatubalilo aka 7. Sona amaka 7 aghatubalilo aka 62 pakwiza ukuzengiwa imisebo nukukumba imifolo mu Yelusalemu, loli pakabalilo akantamyo.

²⁶ Bo ghachilapo amaka 7 aghatubalilo aka 62, umupakiwa yula akwiza pakughoghiwa sona atakwiza pakusenda ichintu nachimochimo. Umulongozi poka na basilikali ababwite bakwiza pakukanangannya akaya akakulu nkani kala poka nu Buzilo Ubuzelu. Ubumalilo bwache bukwiza pakuba ngati ko kwizula ukwa mizi. Ubwite bukwiza pakubangako mupaka bo bumalilo bwache. Vinivi u Chala aviyanizizye zila.

²⁷ Umulaghili yula akwiza pakufingana na bantu abinji nkani ukwa maka seveni, loli uhafu uwamasiku ghanagha akwiza pakukanizya ivyakwiyipa ni vyabupi. Akwiza pakubika ichintu icha mwiko mu Nyumba iya Chala, chikwiza pakubanga mulamula. Chinichi chikwiza pakubangako mupaka umuntu yuyo akabomba zinizi afundiwe nukunanganika, kuko u Chala amuyanizizizye.”