Daniyeli 8 - IBAYIBOLO 2024

Ichisetuka icha Daniyeli nicha Dubi nu sabwe

¹ Mumwaka wabutatu bo u mwene u Belishazala akulaghila, ane ne Daniyeli nkachennya ichisetuka, pisinda pa chisetuka ichakwanda.

² Nkennya ukuti indi mukaya akakulu nkani aka ilinga ilya Susa muchigaba icha Elamu, sona nkagha ukuti indi mulubazu ulwa lusoko ulwa Ulayi.

³ Po nkatalankannya nukumwennya udubi imiliye mulubazu ulwa lusoko, sona akaba ni mpembe zibili intali nkani. Loli ulupembe loka lukaba lutali ukuluchila ulunji sona lukamela bo ulunji lula lwamela kale.

⁴ Nkamwennya udubi yula akupulila kubwinjililo ubwizuba, kumitu, sona na kuntende. Chitakabapo nachimochimo ichinyamana ichakumupota, sona atakabapo nayumoyumo umuntu uwakuchipoka. Akabombagha namumo akalondelagha, po akaba na maka nkani.

⁵ Bo nkwinong'ona zinizi, umwakuchenusya bulo nkamwennya usabwe yuyo akaba nu lupembe ulukulu nkani pakasi pamaso ghache akafumila kubwinjililo ubwizuba nukudumusannya pachisu chosi ichapasi bo akuchimbila atakukanya pasi.

⁶ Usabwe yula akapalamila kwa dubi uwa mpembe zibili, yuyo nkamwennya imiliye mulubazu ulwa lusoko, po akamunyelela umwenecho na maka nkani.

⁷ Nkamwennya usabwe akalaye, akamupula udubi yula nukupyola impembe zibili zila. Udubi atakaba na maka, usabwe yula akamuwisizya pasi udubi nukumukanyankila, sona atakabapo nayumo uwakumuvighilila udubi yula.

⁸ Po usabwe yula akaba na maka nkani. Loli bo amaka ghache ghaba minji nkani, ulupembe lwache ulukulu nkani lula lukapyoka, papo pakamelapo impembe folo inkulu nkani, zizyo zikennyanga kunkuto zyosi folo izya kumwanya.

⁹ Palupembe loka pakamelapo ulupembe ulunandi lulo lukaba lukulu nkani, lukennyanga kuntende, na kubufumilo ubwizuba, sona na ku Chisu Ichakuboneka akiza nkani.

¹⁰ Ulupembe lula lukakula nkani, umwakuti lukapalamasyanga utubukatila ni ntondwa na basilikali aba kumwanya, po lukabasumbila pasi abasilikali bamo aba kumwanya nukubakanyankila.

¹¹ Akitutumula nkani mupaka nukulonda pakulwana nu songo uwa basilikali aba kumwanya bala. Akamazya ivyakwiyipa ivya isiku ni siku kwa Chala, sona akabumongolannya Ubuzilo Ubuzelu.

¹² Abantu bakananga ubuzilo ubwakubika ichakwiyipa icha isiku ni siku, ichiputo ichanaloli chikasumbiwa pasi chosi chicho ulupembe lula lukabombagha, lukapotagha.

¹³ Po nkivwa uwantumi akumulalusya uwantumi uyunji akuti, “Nkimba ichisetuka chako chikwiza pakukwanilisiwa liyi? Nkimba ichinyazu ichakunangannya chinichi chikwiza pakupyanilaghapo liyi pachakwiyipa icha isiku ni siku? Nkimba abasilikali sona naba Mubuzilo Ubuzelu bakwiza pakukanyankiliwa mupaka liyi?”

¹⁴ Akanyamula akati, “Chinichi chikwiza pakumala 2,300 ichamabwila sona na pandabindabi. Po Ubuzilo Ubuzelu bula bukwiza pakupaghuliwa sona.”

Ubusanuzyi ubwa chisetuka

¹⁵ Bo ane ne Daniyeli nkwennya ichisetuka sona bo nkuyezya pakuchivwisya, pamaso papane pakimilila yumo yuyo akaba ngati muntu.

¹⁶ Nkivwa izyu ilya muntu mulubazu ulwa lusoko ulwa Ulayi likukolomoka likuti, “Gabiliyeli mubuzye umuntu yunuyu chicho ichisetuka chinichi chikusanusya.”

¹⁷ Bo akupalamila papo nkimilila, nkanyila po nkawa ubukupama. Akambuzya akati, “Wee mwana uwa muntu, uchivwisye ichisetuka chikunena nizya masiku aghabumalilo.”

¹⁸ Bo akunena nane nkaghona utulo utwakufwa nato, bo icheni chane chikotamiye pasi. Po akampalamasya nukunyamusya.

¹⁹ Akati, “Nkwiza pakukubuzya zizyo zikwiza pakubombiwa bo ubukali bwamala, pakuti ichisetuka chikunena nizya masiku aghabumalilo.

²⁰ Udubi uwa mpembe zibili yuyo ukamwennya akwimilila abamwene aba Mediya, naba Peleziya.

²¹ Usabwe yula akwimilila ubumwene ubwa Gilisi, sona ulupembe ulukulu nkani lulo luli pakasi pamaso we mwene wakwanda.

²² Impembe folo zizyo zikamela papo pakabapo ulupembe lulo lukapyoka zikwimilila ubumwene folo bubo bukwiza pakuboneka ukufuma pakasi pa baluko lwache, loli amaka ghabo ghatakwiza pakuyana na maka agha mwene uwakwanda yula.

²³ “Mumasiku aghabumalilo agha bulaghili ubwa bamwene banaba, bo ukusambuka kwabo kwaba kubibi nkani, akwiza pakubanangannya abantu sona po pakwiza pakuboneka u mwene umukali nkani umuzimbuli.

²⁴ Akwiza pakuba na maka nkani, loli ghatakwiza pakuba ghache na ghache. Akwiza pakuvinangannya nkani, sona vyosi vivyo akubomba vikwiza pakumwendela akiza. Akwiza pakubanangannya abantu abamaka, na bazelu bulo.

²⁵ Pachifukwa icha buzimbuli bwache akwiza pakupota. Akwiza pakwituvya nukubanangannya abantu abinji nkani, sona akwiza pakumusambukila u mwene uwa bamwene. Pope bulo akwiza pakunanganika loli te namaka agha bantu.

²⁶ “Ichisetuka icha pachamabwila na pandabindabi chicho chipeghiwe kukwako chanaloli, loli utakachivumbulaye ichisetuka chinichi pakuti chikunena nizya muntazi nkani.”

²⁷ Ane ne Daniyeli nkalita nkani, sona nkabinapo amasiku aminji. Po nkanyamuka nukubuka pakubomba imbombo kunyumba iya mwene. Nkaswigha nkani ni chisetuka chila sona intakachivwisyanga.