Daniyeli 7 - IBAYIBOLO 2024

Ichisetuka icha Daniyeli

¹ Mumwaka uwakwanda bo u mwene u Belishazala akulaghila mu Babiloni, u Daniyeli akalota ichilota, sona akennya ivisetuka bo alambalaye pachitala chache pabusiku. Po akachisimba ichilota chache chila umwabupimpa bulo ngati ulu:

² “Ane ne Daniyeli, pabusiku nkachennya ichisetuka icha mpepo yikuputa iyakufuma kunkuto zyosi folo, nukuyivundula inyanja inkulu nkani.

³ Munyanja mula mukazubuka ivinyamana folo ivikulukulu, ichinyamana choka chikaba chakulekana ni chamwabo.

⁴ “Ichinyamana ichakwanda chikaboneka ngati yo nkalamu, sona chikaba ni vipapande ngati vya lizwanga. Nkachenelezya mupaka ivipapande vyache vikazepuka, sona chikanyamuziwa nukwimilila ni vinama folo ngati muntu. Po chikapeghiwa inyinong'ono izya muntu.

⁵ “Nkachennya sona ichinyamana ichabubili, chicho chikabonekagha ngati we zyela. Chikakwela ulubazu loka, sona mumulomo wache chikaba ni mbazu zitatu pakasi pa mino ghache. Chikabuziwa ukuti, ‘Wee nyamuka lyanga inyama mumo ungalyela!’

⁶ “Pisinda pache nkachennya sona ichinyamana ichinji, chicho chikabonekagha ngati we zyela. Panyuma chikaba ni vipapande folo ngati vya chiyuni. Ichinyamana chinichi chikaba ni mitu folo, sona chikapeghiwa amaka aghakulaghilila.

⁷ “Po nkachennya ichinyamana ichafolo, chicho chikabonekagha chakoghofya sona ni chamaka. Chikaba na mino amakulu nkani agha chela. Chikalyanga nukukavulannya, sona nukukanyankila vyosi vivyo vikasyala. Ichinyamana chinichi chikaba chakulekana nkani ni vinyamana ivyakwanda vila, sona chikaba ni mpembe teni.

⁸ “Bo nkwinong'ona nizya mpembe zila, nkennya sona akampembe akanji kako kakamela pakasi pa zinji zila. Kakazinyunkula impembe zitatu pakasi pampembe izyakwanda zila umwakuti paghiwepo ubuzilo. Akampembe kanaka kakaba na maso ngati gha muntu, sona nu mulomo ghugho ghukanenagha umwakwitutumula.

⁹ Bo nkwennya, ivitengo ivya bumwene vikabikiwa mubuzilo bwache, po Uwavula Intazi akikala pachitengo chache. Amenda ghache ghakaba swee ngati we kabefu, zyope isisi zyache zikaba swee ngati bo busapa. Ichitengo chache chikakagha indimi izya moto, sona ivingelengele vyache vyosi vikakagha umoto.

¹⁰ Ulusoko ulwa moto lukendagha, ukufuma pamaso papache. Abantu amasabuzani na masabuzani bakamubombelagha, sona abantu abinji nkani bakimilila pamaso papache. Po ubulongi bukanda, ghope amabuku ghakighuliwanga.

¹¹ “Po nkendelela pakwenelezya pachifukwa icha mazyu ghagho ulupembe lukanenagha umwakwitutumula. Nkennyanga bulo mupaka ichinyamana chila chikaghoghiwa, umuvimba wache bakaghunangannya nukughusumba mumoto, uwakwaka nkani.

¹² Ivinyamana ivinji vikafyuliwa ubulaghili, loli vikitikiziwa pakwikala nubumi ukwa kabalilo kamo.

¹³ “Pabusiku palapala muchisetuka nkamwennya yumo yuyo akaba ngati mwana uwa muntu akwika mu mabingu. Akapalamila papipi nu Wavula Intazi yula nukwimilila pamaso papache.

¹⁴ Akapeghiwa ubulaghili nu buchindamu, sona na maka amakulu nkani, ni inko zyosi, nuluko losi sona na baneno zyosi bakamwiputagha. Ubulaghili bwache bwa bwila na bwila, sona ubumwene bwache butakwiza pakunanganika nalumo.

Ukusanuziwa ukwa visetuka

¹⁵ “Ane ne Daniyeli, nkatamiwa nkani mumoyo, sona nkaba nubogha nkani pachifukwa icha zizyo nkazyennya muvisetuka vyane, po zikanvulungannya nkani.

¹⁶ Nkapalamila ku muntu uwa bamo yuyo akimilila palapala ukuti ambuzye na chicho ivintu vinivi vikusanusya. “Po umuntu yula akambuzya ubusanuzyi ubwa vintu vinivi akati,

¹⁷ ‘Ivinyamana folo ivikulu nkani vila, bo bumwene folo, bubo bukwiza pakuboneka pachisu ichapasi.

¹⁸ Loli abantu abazelu aba kumwanya nkani bakwiza pakubupokela ubumwene sona bukwiza pakubanga bwabo bwila na bwila.’

¹⁹ “Polelo nkalondagha pakubumanya ubusanuzyi ubwanaloli ubwa chinyamana ichafolo, chicho chikalekana ni vinyamana ivinji vyosi, sona chikaba chakoghofya nkani. Ichinyamana chicho chikaba na mino agha chela, ni zula zyache zikaba zya mukuba. Ichinyamana chinichi chikavulazyanga nukulya sona nukukanyankila vyosi vivyo vikasyala.

²⁰ Nkalondagha sona pakumanya nizya mpembe teni zizyo zikaba pamutu wache sona nu lupembe ulunji lulo lukamela pisinda pache, pakuziwisya zitatu. Lunulu lo lupembe lulo lukaba na maso nu mulomo lulo lukanenagha umwakwitutumula lukaba lukulu ukuchila izinji.

²¹ Bo nkwenelezya ulupembe lunulu lukalwanga ubwite na bantu abazelu, nukubapota.

²² Mupaka Uwavula Intazi yula akafika, po inongwa yikabendela akiza abantu abazelu aba Kumwanya Nkani. Akabalilo kakakwana akakuti abantu abazelu bala bapokele ubumwene.

²³ “Po akandingannya akati, ‘Ichinyamana ichafolo, bo bumwene ubwafolo bubo bukuboneka pachisu ichapasi. Ubumwene bunubu bukwiza pakulekana na mabumwene aghanji sona chikwiza pakulya nukuvulazya sona nukukanyankila.

²⁴ Impembe teni bo bamwene teni, babo bakufuma mubumwene bunubu. Pisinda pabanaba, u mwene uyunji akwiza pakuboneka, yuyo akwiza pakulekana na bakwanda bala sona nukubapota abamwene batatu bala.

²⁵ Akwiza pakumususya Uwakumwanya Nkani nukubayivya abantu abazelu. Akwiza pakwandula utubalilo utwa lusekelo ni ndaghilo. Abantu abazelu bakwiza pakubikiwa munyobe zyache amaka matatu nu hafu.

²⁶ “ ‘Loli abalongi bakwiza pakulonga, bakwiza pakughefya amaka ghache, umwakuti ghananganike nukuzimila zila.

²⁷ Po ubumwene na maka sona nu bukulu nkani ubwa mabumwene pasi pachisu chosi icha kumwanya, vikwiza pakupeghiwa ku bantu abazelu, aba Wakumwanya Nkani. Ubumwene bunubu bukwiza pakubangako bwila na bwila, pisinda pache abalaghili bosi bakwiza pakumwiputa nukumwivwila.’

²⁸ “Ubu bo bumalilo ubwa fundo yiniyi. Po ane ne Daniyeli nkatamiwa nkani mumoyo wane, sona chope icheni chane chikasulumannya, loli nkavisunga bulo mumoyo wane.”