Daniyeli 6 - IBAYIBOLO 2024

U Daniyeli muchiliba icha nkalamu

¹ Chikamuhobosya u mwene u Daliyasi pakubimika abalaghili 120 ukuti balaghilaye mubumwene bwache bosi.

² Po akamusala u Daniyeli poka na banji babili ukuti benelezyanje imbombo iya balaghili, umwakuti u mwene atakayimbaye nachimochimo.

³ U Daniyeli akalanjizya ukuti angabombako imbombo akiza nkani ukughachila amakambala aghanji ghosi, sona na balongozi bosi, po u mwene akamusala pakuba mulaghili uwa chisu chosi.

⁴ Pachifukwa chinichi amakambala na balongozi bala bakanda pakumulondelezya ivifukwa u Daniyeli nizya mumo akalongozezya ichisu chila, loli bakapotwa. Batakamwaghapo ni chifukwa icha mabeko, pakuti akaba musubiliwa, akaghabenga nkani amabeko, sona atakabombaghapo chimo ichibibi.

⁵ Pabumalilo abantu bala bakati, “Tutangamwagha ni chifukwa nachimochimo umuntu yunuyu, nanti tutakutambulako nizya chiputo chache.”

⁶ Po amakambala na balongozi bala bakabuka ngati kabukatila pakukomana nu mwene, po bakati, “Wee mwene Daliyasi, tukukulondela ubumi ubutali!

⁷ Aswe twebosi poka twe balongozi na balaghili na makambala sona na balaghili twivwana ukuti ubike ululaghilo ulwakuti nanti umuntu yumo aghiwa akubiputa abachala abanji, pamo umuntu uyunji mumasiku 30 ghagho ghakwiza, ukwefyako awe wemwene asumbiwanje muchiliba icha nkalamu.

⁸ Wee mwene, ululaghilo lunulu lubanje lusimbe, umwakuti lutakanduliwanje, ukuyana ni ndaghilo izya ba Medi, naba Peliziya zizyo zitanganduliwa.”

⁹ Po u mwene u Daliyasi akabika ululaghilo ulusimbe.

¹⁰ Bo u Daniyeli azyaghannya ukuti ululaghilo lula lwabikiwa, akabwela nukwinjila muchipinda chache icha pamwanya, chicho amabwindo ghache ghakighuliwa umwakwenannya nakaya akakulu nkani aka Yelusalemu. Akafughamagha katatu pisiku pakwiputa, nukumupalizya u Chala ukuyana namumo akabombelagha pakwanda.

¹¹ Abantu bala bakabuka ngati kabukatila nukumwagha u Daniyeli ali pakwiputa ukuti u Chala amwavwe.

¹² Po bakabuka pamaso pa mwene nukumulalusya ukuti, “Wee mwene, nkimba utabikite ululaghilo ulusimbe ulwakuti mumasiku 30 ghagho ghakwiza, nanti umuntu yumo aghiwa akubiputa abachala abanji pamo umuntu uyunji ukwefyako awe wemwene asumbiwanje muchiliba icha nkalamu?” U mwene yula akamula akati, “Eee ululaghilo luli bulo bulabula, ukuyana ni ndaghilo izya Medi naba Peliziya lutakwanduka nalumolumo.”

¹³ Po bakamubuzya u mwene yula bakati, “Wee mwene, u Daniyeli weka uwa bantu babo bakafuma ku Yuda bala atakukwivwila, pamo ukulukonka ululaghilo lulo ukalusimikizya pakusimba. Achili akwiputa katatu pisiku.”

¹⁴ Bo u mwene ivwa zinizi, akatamiwa nkani mumoyo, po akayezya nkani pakumupoka u Daniyeli, mupaka izuba likinjila.

¹⁵ Po abantu bakabuka ngati kabukatila pamaso pa mwene nukumubuzya ukuti, “Wee mwene, kumbuka ukuti ukuyana nu lulaghilo ulwa ba Medi nulwa ba Peliziya lutalipo ululaghilo pamo ilamulo ilyakususannya nu mwene lulo lunganduliwa.”

¹⁶ Po u mwene akalamula ukuti bamusende u Daniyeli nukumusumbila muchiliba icha nkalamu chila. U mwene yula akamubuzya u Daniyeli akati, “U Chala wako yuyo ukumwiputa akupokaye!”

¹⁷ Bakiza nibwe, po bakighalilapo pamulyango uwa chiliba chila, u mwene akadindapo ni chidindo chache sona nicha makambala ghache, umwakuti patakabapo umuntu nayumo uwakwandulapo zimo ukuyana nizya Daniyeli.

¹⁸ U mwene akanyokela kunyumba yache, po ubusiku bulabula atakalyapo nachimochimo ichintu, pamo pakuba nacho chimo ichakumusekelezya, sona atakaghona utulo.

¹⁹ Kubuche nkani u mwene akanyamuka nukuchimbilila kuchiliba icha nkalamu chila.

²⁰ Bo apalamila kuchiliba chila, akamwitizya u Daniyeli nubogha nkani akati, “Wee Daniyeli, we mubombi uwa Chala umumi, yuyo ukumubombelagha akabalilo kosi, nkimba akakupoka ku nkalamu?”

²¹ U Daniyeli akamula akati, “Wee mwene, nkukulondela ubumi ubutali!

²² U Chala wane atumite uwantumi wache nukwighalila imilomo iya nkalamu. Wee mwene, zitakanvulazya napo panandi pachifukwa ichakuti intakaba ninongwa nayimoyimo pamaso papache pamo ukukubombela chimo ichibibi pamaso papako.”

²³ U mwene yula akahoboka nkani umwakuti akalamula ukuti bamwefyemo u Daniyeli muchiliba icha nkalamu chila. Bo bamwefyamo u Daniyeli muchiliba mula, atakabapo ni chilonda nachimochimo, pachifukwa ichakuti akamusubila u Chala wache.

²⁴ U mwene akalamula, po abantu bosi babo bakamususyanga u Daniyeli bakalemiwa nukusumbiwa muchiliba icha nkalamu poka na bachi babo, sona na bana babo. Bo batafikite pasi pachiliba, inkalamu zila zikabakanyankila nukughapyolannya amafupa ghabo.

²⁵ Po u mwene u Daliyasi akabasimbila abantu bosi, naba inko zyosi, nuluko losi sona na baneno zyosi muchisu chosi akati, “Mwaghona mwebosi!

²⁶ Nkabika ululaghilo ulwakuti abantu bamuchindikaye u Chala uwa Daniyeli mubumwene bwane bosi. Pakuti we Chala umumi, sona wa bwila na bwila, ubumwene bwache butakwiza pakunanganika nalumolumo, ubulaghili bwache butakumalapo nalumolumo.

²⁷ Akumwimila umuntu sona akumupoka, akupela iviswigho ni vyika, kumwanya na pachisu ichapasi. Amupoka u Daniyeli kumaka agha nkalamu.”

²⁸ Po ivintu vikamwendela akiza nkani u Daniyeli pakabalilo aka Daliyasi, sona napakabalilo aka Sayilasi uwamu Peliziya.