Daniyeli 5 - IBAYIBOLO 2024

Ulusekelo ulwa Belishazala

¹ U mwene u Belishazala akaba nu lusekelo ulukulu nkani, po akaghitizya amakambala ghache 1,000, nukung'wela nabo poka uvinyo.

² Bo u Belishazala akung'wela uvinyo, akalamula abantu ukuti bize ni mbako izya golide, nizya siliva zizyo uwise u Nebukadineza akasenda mu Nyumba iya Chala mu Yelusalemu, umwakuti yuyo na makambala ghache na bachi bache, poka na bachi bache abazya bang'welelayemo.

³ Abantu bakiza ni mbako izya golide, zizyo bakasenda mu Nyumba iya Chala mu Yelusalemu, po yuyo na makambala ghache, na bachi bache, poka na bachi bache abazya bakang'welelamo.

⁴ Bo bakung'wela uvinyo bakabapalagha abachala aba golide naba siliva naba mukuba naba chela naba makwi sona naba mabwe.

⁵ Umwalubilolubilo inyobe iya muntu yikaboneka nukwanda pakusimba palubumba papipi ni chakubikapo inyale munyumba iya bumwene. Po u mwene akayennya inyobe yila yikusimba.

⁶ Po icheni chache chikasulumannya umwakuti akanyila nkani, umwakuti ivimpevu vyache vikanda pakutetema.

⁷ U mwene yula akabitizya abalaghuzi abakunena ni mizimu na basanuzyi aba vilota, ukuti bize pamaso papache. Po akababuzya abantu abamahala akati, “Umuntu wesi yuyo angabelenga amasimbo ghanagha nukumubuzya ukuti ghakusanusya choni, akwiza pakuvwikiwa inkazo inchesamile, sona nu bunyololo ubwa golide musingo yache, po akwiza pakukweziwa pachitengo pakuba wabutatu mubumwene bwane.”

⁸ Abantu bosi abamahala bala bakinjila, loli bakapotwa pakughabelenga amasimbo ghala pamo ukumubuzya chicho ghakasanusyanga.

⁹ Po u mwene u Belishazala akayimba nkani mumoyo wache sona chope icheni chikasulumannya. Amakambala ghache ghatakaba ni chakunena.

¹⁰ Bo unyina uwa mwene ivwa izyu ilya mwene, sona nilya makambala ghala, akinjila munyumba iya lusekelo mula nukuti, “Wee mwene nkukulondela ubumi ubutali! Utakanyilaye, sona chope icheni chako chitakasulumannyanje.

¹¹ Mubumwene bwako muno alipo umuntu yumo, yuyo ali nu muzimu uwa bachala abazelu mumwache. Pakabalilo aka ghuso akaba muntu yula uwakuvyaghannya ivintu nu mumanyi, sona nu wamahala ngati gha bachala. Ughuso u Nebukadineza akamusala pakuba we songo uwa bamayele, nuwa balaghuzi nuwa bantu abakunena ni mizimu nuwa basanuzyi aba vilota, sona.

¹² U Daniyeli yunuyu, yuyo u mwene u Nebukadineza akamusapila itabwa ilya kuti we Belitishazala akaghiwa ukuti ali na mahala, nakivwisizye, sona nu bumanyi ubwa kusanuzizya ivilota, pakulingannya ivyili sona nukumazya intamyo impalapala nkani. Mwitizye u Daniyeli, po akwiza pakubabuzya ubusanuzyi ubwa masimbo ghanagha.”

¹³ Bakiza nu Daniyeli pamaso pa mwene, po u mwene akamulalusya akati, “Nkimba awe we Daniyeli weka uwa bazya, yuyo utata u mwene akabasenda muchisu icha Yuda?

¹⁴ Nivwa ukuti umuzimu uwa bachala ghuli mumwako, nukuti we wakuvyaghannya ivintu, we mumanyi, sona we wamahala.

¹⁵ Abantu abamahala na bakulaghula bakiza nabo pantazi papane ukuti baghabelenge amasimbo ghanagha nukumubuzya ukuti ghakusanusya ichoni, loli bakapotwa.

¹⁶ Polelo nivwa ukuti ungambuzya ubusanuzyi bwache, sona nukumazya intamyo inkafu. Nanti ungaghabelenga amasimbo ghanagha nukumubuzya ghakusanusya ichoni, ukwiza pakuvwikiwa inkazo inchesamile iya bumwene nu bunyololo ubwa golide musingo, sona ukwiza pakuba we songo uwabutatu mubumwene bwane.”

¹⁷ U Daniyeli akamwamula u mwene akati, “Ungachisunga ichabupi chako, pamo ungamupa umuvwalo wako umuntu uyunji. Loli ane nkwiza pakukubelengela amasimbo ghanagha nukukubuzya ukuti ghakusanusya choni.

¹⁸ “Wee mwene, ivwa kuno, u Chala Uwakumwanya Nkani akamupela ughuso u Nebukadineza pakuba we mwene umukulu nkani, sona akamupa ubuchindamu nu bumwene.

¹⁹ Akaba mukulu nkani umwakuti, naba inko zyosi, nuluko losi sona na baneno zyosi bakamunyilagha nkani nukutetema pamaso papache. Nanti akalondagha pakumughogha umuntu yumo, naloli akamughogha. Nanti akalondagha pakumuleka mumi umuntu yumo, naloli akamulekagha mumi. Nanti akalondagha pakumukwezya umuntu yumo, naloli akamukwezyanga. Nanti akalondagha pakumukozya isoni umuntu yumo, naloli akamukozyanga isoni.

²⁰ Loli pachifukwa ichakuti akituvyanga, nukukazya umoyo sona nukwitutumula nkani, akefiwapo pachitengo chache icha bumwene nukumufyula ubuchindamu.

²¹ Akefiwapo pakasi pabantu, sona inyinong'ono zyache zikaba ngati zya chinyamana. Akikalagha pakasi pampunda sona akalyanga isote ngati ng'ombe, nukunyeka ni nganda mupaka pabumalilo akazyaghannya ukuti u Chala Uwakumwanya Nkani, weyuyo akulaghila sona akumusala wesi yuyo akulonda pakumusala.

²² “Loli awe, we mwana wache u Belishazala utakiyisya wemwene napapo ukazimanya zyosi zinizi.

²³ Loli ukamusambukila u Mwene uwakumwanya pakubalamula abantu ukuti bize ni mbako ni mbale pamaso papako zizyo zikaba mu Nyumba iya Chala. Po awe na makambala ghako, na bachi bako sona na bachi bako abazya mukang'welelaghamo uvinyo. Mukabapala abachala aba siliva naba golide naba mukuba na bachela naba makwi sona naba mabwe abachala babo batakwennya pamo ukwivwa pamo ukumanya ivintu. Loli utakamuchindika u Chala, yuyo akubusungilila ubumi bwako, sona yuyo ivintu vyosi vili munyobe zyache.

²⁴ “Ichi cho chifukwa u Chala akatuma inyobe yiniyi pakusimba amazyu ghanagha.

²⁵ “Amazyu ghagho ghasimbiwe gho agha: MENE, MENE, TEKELI, PELESI.

²⁶ “Amazyu ghanagha ghakusanusya ukuti: “Mene: Chikusanusya ukuti u Chala aghabelenga amasiku agha bulaghili bwako, po aghamazya.

²⁷ “Tekeli: Chikusanusya ukuti wapimiwa pachipimilo sona utakung'wama.

²⁸ “Pelesi: Kokuti ubumwene bwako bwagabinkana, po bwabikiwa munyobe izya ba Medi naba Pelesi.”

²⁹ Po u Belishazala akalamula ukuti bamuvwikaye u Daniyeli amenda amachesamile nu bunyololo ubwa golide musingo yache, sona akamukwezya pachitengo ukuti abanje wabutatu muchisu chilachila.

³⁰ Ubusiku bulabula u mwene u Belishazala uwamu Babiloni akaghoghiwa,

³¹ po Daliyasi uwamu Medi akanda pakulaghila, bo ali na maka 62.