Daniyeli 2 - IBAYIBOLO 2024

Ichilota icha mwene u Nebukadineza

¹ Mumwaka uwabubili bo u mwene u Nebukadineza akulaghila, akalota ichilota. Po akayimba nkani mumoyo wache umwakuti atakaghonagha nukughona.

² U mwene akabitizya abamayele na balaghuzi na bakunena ni mizimu, sona na basanuzyi aba vilota umwakuti bamubuzye ichilota chila. Bo binjila, bakimilila pamaso pa mwene,

³ akababuzya akati, “Indotite ichilota chimo chicho chikunjivya nkani, po nkulonda imanye ukuti chikusanusya ichoni.”

⁴ Abasanuzyi aba vilota bala bakamwamula u mwene bakati, “Wee mwene, tukukulondela ubumi ubutali! Tubuzye twe babombi bako ichilota chako, po tukwiza pakukubuzya ukuti chikusanusya ichoni.”

⁵ U mwene akabamula akati, “Nadumula ukuti nanti mutakumbuzya ichilota chicho indotite, sona nukuti chikusanusya ichoni, po nkwiza pakubadumulannya mutuvigaba, sona zyope inyumba zyinyu zikwiza pakuba visami.

⁶ Loli nanti mwambuzya ichilota chicho indotite, sona nukundingannya ukuti chikusanusya ichoni, nkwiza pakubapa ivyabupi nu muvwalo, sona mukwiza pakuchindikiwa nkani. Po mumbuzye ichilota chane, sona nukuti chikusanusya ichoni.”

⁷ Bakamula sona bakati, “Wee mwene, tubuzye twe bambombo bako ichilota chako, po tukwiza pakukubuzya ukuti chikusanusya ichoni.”

⁸ U mwene yula akamula akati, “Naloli inzimenye ukuti mukuzyelazyela bulo pachifukwa ichakuti mwazyaghannya kale zizyo zikwiza pakubawila.

⁹ Nanti mutakumbuzya ichilota chicho indotite, pali ichintu choka bulo chicho nkwiza pakubabombela. Amwe mwivwana ukuti mumbuzye ubumyasi nukunzimbula, pakuti mwinong'onagha ukuti nkwiza pakwandula inyinong'ono. Mbuzya ichilota chicho indotite, po nkwiza pakuzimanya ukuti namwe mukwiza pakumbuzya iching'anamulo chache.”

¹⁰ Abasanuzyi aba vilota bala bakamwamula u mwene bakati, “Wee mwene, atalipo nayumoyumo umuntu pachisu ichapasi, yuyo angazibomba zizyo ukulonda! Atalipo nayumoyumo u mwene usongo sona uwamaka, yuyo abalabitepo abamayele, pamo abalaghuzi, pamo abasanuzyi aba vilota ukuti babombaye ichintu ngati chinichi.

¹¹ Wee mwene, chicho ukulaba chintu ichipalapala nkani. Atalipo nayumoyumo umuntu yuyo angakuvumbulila, loli abachala bene, babo batakwikala pakasi pabantu.”

¹² Bo u mwene ivwa zinizi, akakalala nkani umwakuti akalamula ukuti abantu bosi abamahala aba muchisu icha Babiloni baghoghiwanje.

¹³ Po ululaghilo lukafumuziwa ulwakuti abantu abamahala baghoghiwanje, sona bakabatuma abantu pakumulonda u Daniyeli, poka na bamanyani bache bala ukuti baghoghiwanje.

¹⁴ Bo u Aliyoki yuyo akaba we songo uwa balindilili aba kunyumba iya mwene, akabuka pakubaghogha abantu abamahala aba mu Babiloni, u Daniyeli akanena nawe umwamahala, sona na mumuchizi.

¹⁵ Akamulalusya u Aliyoki akati, “Nkimba choni chicho u mwene abika ululaghilo ulukafu nkani bunubu?” U Aliyoki akamulingannya u Daniyeli ichifukwa chache.

¹⁶ Po u Daniyeli akabuka pamaso pa mwene nukulaba ukuti amupanje akabalilo umwakuti angamulingannya ubusanuzyi ubwa chilota chache chila.

¹⁷ Po u Daniyeli akanyokela kunyumba yache pakumulingannya u Hananiya nu Mishayeli, sona nu Azaliya, babo bakaba bamanyani bache.

¹⁸ Akababuzya ukuti biputaye kwa Chala uwakumwanya pakubapelela ichisa ukuti abavumbulilaye izyakubusyefu zinizi, umwakuti yuyo na bamanyani bache batakaghoghiwanje poka na bantu abamahala aba mu Babiloni.

¹⁹ Pabusiku izyakubusyefu zila zikavumbuliwa muvisetuka kwa Daniyeli. Po u Daniyeli akamupala u Chala uwakumwanya

²⁰ akati, “Itabwa ilya Chala lichindikiwanje bwila na bwila, yuyo mwenecho uwa mahala na maka.

²¹ Wee yuyo akwandula amasiku nu tubalilo, sona weyuyo akubakwezya abamwene nukubisya. Akubapa amahala abantu abamahala, sona nu bumanyi ku bantu abakwivwisya ivintu.

²² Akuvivumbula ivintu ivyakubusyefu ivyibizu, azimenye zyosi zizyo zikubombiwa muchisi, sona wemwenecho uwa lukozyo.

²³ Wee Chala uwa banyenya bane, nkukupalizya, sona nkukukwezya. Wampa amahala na maka, wanvumbulila zizyo tukakulaba, sona watuvumbulila ichilota icha mwene.”

U Daniyeli akusanusya ichilota

²⁴ Po u Daniyeli akamubuzya u Aliyoki, yuyo u mwene akamusala ukuti abaghoghe abantu abamahala aba mu Babiloni akati, “Utakabaghoghaye abantu abamahala aba mu Babiloni. Twende unsindikile pamaso pa mwene, po nkwiza pakumusanuzizya.”

²⁵ Lubilolubilo u Aliyoki akamusindikila u Daniyeli pamaso pa mwene, po akati, “Wee mwene, namwagha umukayidi yumo pakasi paba Yuda, yuyo angakusanuzizya ichilota chako.”

²⁶ U mwene akamulalusya u Daniyeli yuyo bakatinji we Belitishazala akati, “Nkimba ungambuzya vivyo nkavyennya muchilota nukunsanuzizya?”

²⁷ U Daniyeli akamula akati, “Atalipo nayumoyumo umuntu uwamahala nu wakunena ni mizimu nu wamayele nu mulaghuzi, yuyo angakulingannya izyakubusyefu zizyo ukulonda pakumanya.

²⁸ Loli aliko u Chala kumwanya, yuyo akuvumbula izyakubusyefu. Amulanjizya u mwene u Nebukadineza zizyo zikwiza pakubombiwa muntazi. Ichilota ni chisetuka vivyo ukavyennya bo ulambalaye pachitala chako vyo ivi:

²⁹ “Wee mwene, bo ulambalaye palapala ukinong'onagha nizya muntazi, po yuyo avumbula izyakubusyefu akakulanjizya vivyo vikwiza pakubombiwa muntazi.

³⁰ Izyakubusyefu zinizi, zitakuvumbuliwa kukwane pachifukwa ichakuti indi na mahala nkani, ukubachila abantu, loli ukuti awe we busanuzyi bwache, sona nukuti wivwisye zizyo ukinong'onagha.

³¹ “Wee mwene, ukachennya ichifwani ichikulu nkani, ichifwani chinichi chikaba chikulu sona chikanyezimilagha nkani, chikimilila pamaso papako, po akabonekele kache kakaba kakoghofya nkani.

³² Umutu uwa chifwani chila ghukaba uwa golide umwenecho, ichifuba ni nyobe zyache vikaba vya siliva, sona ulwanda lwache ni ntapatapa zyache vikaba vya mukuba.

³³ Ivinama vyache vikaba vya chela, zyope inyayo zyache zikaba chela ichakongannya ni tope.

³⁴ Bo ukwennya, ibwe lilyo litakapangiwa ni nyobe izya muntu, likadumuliwa. Ibwe lila likatizannya inyayo izya chela ichakongannya ni tope izya chifwani chila.

³⁵ Po ichela ni tope nu mukuba nu siliva, sona nu golide vikatiziwa pakabalilo koka, nukuba ngati lufumbi pabuzilo ubwakukomelapo inyinulo. Impepo yikavipupuzya sona patakasyalapo nakamokamo akantu. Loli ibwe lilyo likatizannya ichifwani chila likanduka pakuba lighamba ikulu nkani, sona likizula pachisu chosi ichapasi.

³⁶ “Wee mwene, ichi cho chikaba chilota chako, po tukwiza pakukusanuzizya.

³⁷ Awe we mukulu nkani pakasi pa bamwene bosi, po u Chala uwakumwanya akupiye ubumwene, na maka nu bulaghili, sona nu buchindamu.

³⁸ Akupiye ubulaghili pabantu ni vinyamana ni viyuni vyosi sona akulonda ukuti uvilaghilaye vyosi kosi kuko vikwikala. Umutu uwa golide ghula wewe.

³⁹ “Pisinda papako pakwiza pakuba sona ubumwene ubunji, bubo butakwiza pakuba na maka nkani ngati bumwene bwako. Pisinda pache pakwiza ubumwene ubwabutatu ubwa mukuba, bubo bukwiza pakuchilaghila ichisu chosi ichapasi.

⁴⁰ Pabumalilo pakwiza ubumwene ubwafolo, bubo bukwiza pakuba na maka ngati chela, pakuti ichela chikutizannya nukusya ivintu vyosi. Po bukwiza pakuvitizannya ivintu vyosi ngati mumo ichela chikutizanizizya ivintu.

⁴¹ Ukuyana namumo ukazyenezya inyayo ni salala zyache vikaba vya chela ichakongannya ni tope, po bunubu bukwiza pakuba bumwene ubwakugabinkana. Loli bukwiza pakubanga na maka ghamo panandi pachifukwa icha chela chila.

⁴² Ukuyana namumo ukazyenezya isalala zila, ichigaba chimo zikaba zya chela, sona ichigaba ichinji zikaba zya litope. Po ubumwene bunubu ichigaba choka bukwiza pakuba bwamaka, sona chigaba ichinji chikwiza pakuba chidedebazu.

⁴³ Ukuyana namumo ukachenezya ichela chicho chikonganiziwa ni tope, po bope abantu bakwiza pakonganiziwa pakusendana, sona batakwiza pakwivwanagha, ngati mumo ichela ni tope vitangonganiziwa.

⁴⁴ “Pakabalilo aka bamwene banabo, u Chala uwakumwanya akwiza pakubwikazya ubumwene, bubo butakwiza pakunanganika nalumolumo pamo pakubikiwa munyobe izya bantu abanji. Bukwiza pakughanangannya amabumwene aghanji ghosi mupaka nukughazimizya, loli ubumwene bunubu bukwiza pakubangako bwila na bwila

⁴⁵ Ubu bo busanuzyi ubwa chisetuka icha libwe lilyo likadumuliwa kwighamba, te muntu akalibunguluzya awe, kokuti ibwe lilyo likatizannya ichifwani icha chela nicha mukuba nicha litope nicha siliva sona nicha golide. “U Chala umukulu nkani akulanjizya zizyo zikwiza pakuboneka muntazi. Ichilota chinichi chanaloli, sona nakubuzya ubwanaloli bosi.”

⁴⁶ Po u mwene u Nebukadineza akafughama pamaso pa Daniyeli, sona akamuchindika nkani, umwakuti akalamula ukuti ichakwiyipa poka nu twakufukizya utwakununkila vibikiwanje pamaso papache.

⁴⁷ U mwene yula akamubuzya u Daniyeli akati, “Naloliloli u Chala wako we Chala uwa bachala, sona we Mwene uwa bamwene, yuyo akuvumbula izyakubusyefu pakuti wanvumbulila izyakubusyefu zinizi.”

⁴⁸ Po u mwene akamupa u Daniyeli ichitengo icha pamwanya nkani nukumulundikila ivyabupi ivyiza ivyinji nkani. Akamubika pakuba mulaghili uwa chisu chosi icha Babiloni, akamubika sona pakuba we songo uwa bantu bosi abamahala.

⁴⁹ Pachifukwa icha zizyo u Daniyeli akalaba, u mwene akamusala u Shadiliki nu Meshaki sona nu Abedinego pakuba balongozi aba muvigaba ivya mu Babiloni, sona u Daniyeli umwenecho akikalagha kunyumba iya bumwene.