Daniyeli 12 - IBAYIBOLO 2024

Akabalilo akabumalilo

¹ Uwantumi uwa Chala yuyo akavwala amenda amatonte akati, “Pakabalilo kalakala uwantumi usongo nkani u Mikayeli, yuyo akubavighilila abantu bako babo basimbiwe mwibuku ilya bumi bakwiza pakupokiwa. Po akabalilo akantamyo kakwiza pakufikila kako katabonekitepo nalumo ukwanda pakabalilo kako inko zikandila mupaka pakabalilo kalakala. Bo akabalilo kalakala kafikila, abantu bako bosi babo amatabwa ghabo ghasimbiwe mwibuku ilya bumi bakwiza pakupona.

² Abantu abinji babo bakafwa kale sona bakasyiliwa bakwiza pakuzyuka. Abanji bakwiza bakwilaghagha ubumi ubwa bwila na bwila sona bamo bakwiza pakufundiwanga bwila na bwila.

³ Abantu babo bali na mahala bakwiza pakulama ngati yo mwanya. Bope abantu babo bakubalongozezya abantu abinji ku zila ingolosu, bakwiza pakulamagha ngati zyo ntondwa bwila na bwila.

⁴ Loli awe Daniyeli ghasungaye amazyu aghakubusyefu sona wighalile ibuku mupaka pakabalilo akabumalilo, abantu abinji bakwiza pakwenda uku na kula loli amahala ghakwiza pakonjelela.”

⁵ Po ane ne Daniyeli, nkatalankannya nukwennya abantu abanji babili bimiliye, yumo akaba mulubazu ulwa lusoko sona uyunji akimilila kulubazu ulunji ulwa lusoko lula.

⁶ Weka uwa babo akamulalusya umuntu yula yuyo akavwala amenda amatonte yuyo akimilila palusoko, akati, “Nkimba ivintu ivyakuswighisya vinivi vikwiza pakumala liyi?”

⁷ Umuntu yuyo akavwala amenda amatonte yula, sona yuyo akimilila pamizi agha lusoko akakwezezya inyobe zyache zyosi zibili kumwanya, po nkamwivwa akulapa mwitabwa ilya yuyo akubangako bwila na bwila akuti, “Ghakwiza pakuba maka matatu nu hafu. Bo amaka agha abantu abazelu ghamala, ivintu vyosi vinivi vikwiza pakukwanilisiwa.”

⁸ Nkivwa loli intakivwisya. Po nkalalusya nkati, “Wee mwene wane, nkimba ivintu vinivi vikwiza pakumala bulibuli?”

⁹ Akamula akati, “Daniyeli, bukagha pakuti amazyu ghanagha ghakubusyefu sona ghamatiwe mupaka pakabalilo akabumalilo.

¹⁰ Abantu abinji bakwiza pakuswefyiwa, nukusukiwa sona baswepite, loli abantu ababibi bakwiza pakubanga babibi. Atalipo nayumoyumo umuntu umubibi yuyo akwiza pakwivwisya, loli abantu abamahala bene bo babo bakwiza pakwivwisyanga.

¹¹ “Ukwanda pakabalilo kako ivyakwiyipa ivya isiku ni siku vikumalila sona ukwanda pakabalilo kako ichintu ichibibi ichakunangannya chikwimikiliwa, pakwiza ukubapo amasiku 1,290.

¹² Basayiwa abantu babo bakulindilila mupaka amasiku 1,335 ghamale.

¹³ “Loli awe Daniyeli, bukagha bulo mupaka pabumalilo. Ukwiza pakufwa, sona pabumalilo ukwiza pakuzyuka ukuti upeghiwe umuvwalo wako.”