Daniyeli 10 - IBAYIBOLO 2024

Ichisetuka icha Daniyeli pa lusoko ulwa Tigilisi

¹ Mumwaka uwabutatu, bo u mwene u Sayilasi akulaghila ichisu icha Peleziya, ubuvumbuli bukapeghiwa kwa Daniyeli, yuyo akaba we Belitishazala. Amazyu ghache ghakaba ghanaloli, sona ghakanenagha nizya bwite ubukulu. U Daniyeli akivwisya nkani amazyu ghala, bo achennya ichisetuka.

² Pakabalilo kalakala ane ne Daniyeli nkalila abasabata batatu.

³ Intakalyapo ivyakulya ivinoni, pamo ukulya inyama pamo ukung'wela uvinyo pamo ukupesa isisi mupaka pakamala abasabata batatu.

⁴ Pisiku ilya 24 ilya mwezi uwakwanda, nkimilila mulubazu ulwa lusoko ulukulu nkani ulwa Tigilisi,

⁵ Nkatalankannya, po nkamwennya umuntu avwalite amenda amatonte, sona nu lamba umwiza uwa golide mumusana wache.

⁶ Umubili wache ghukanyezimilagha ngati mabwe aghamutengo, icheni chache chikalamagha ngati kamesya, amaso ghache ghakakagha ngati nkozyo, zyope inyobe ni vinama vikanyezimilagha ngati mukuba, izyu lyache likivwikagha ngati chilundilo icha bantu.

⁷ Ane ne Daniyeli nkaba nemwene nene nkachennya ichisetuka chinichi. Abantu babo bakaba poka nane, batakachennya, loli bakanyila nukutetema, umwakuti bakachimbila nukuvwama.

⁸ Po ane nkasyala nemwene bulo, bo nkuchenelezya ichisetuka ichikulu nkani chinichi. Icheni chane chikanduka umwakuti intakaba sona na maka.

⁹ Po nkamwivwa akunena, sona bo nkumuteghelezya, nkaghona utulo utwakufwa nato, bo icheni chane chikotamiye pasi.

¹⁰ Inyobe yikampalamasya nukunyamusya, bo ivimpevu ni nyobe vikutetema.

¹¹ Akati, “Wee Daniyeli, we mughaniwa nkani, inong'onapo akiza nkani nizya mazyu ghagho nkulonda pakukubuzya, sona imilila, pakuti natumiwa kukwako.” Bo anena zinizi nkimilila bo nkutetema.

¹² Akambuzya akati, “Wee Daniyeli, utakanyilaye. Pakuti ukwanda pisiku ilyakwanda lilalila ukabikilako inyinong'ono ukuti wivwisye ivintu, sona nukuti wiyisya wemwene pamaso pa Chala wako, inyiputo zyako zikivwika, niza pachifukwa icha nyiputo zyako.

¹³ Loli u mwene uwa muchisu icha Peleziya akalwana nane amasiku 21. Po u Mikayeli weka uwa bantumi aba kumwanya usongo nkani, akiza pakunyavwa, pachifukwa ichakuti nkasyala bulo nemwene mubumwene ubwa mu Peliziya.

¹⁴ Ilelo niza pakukulingannya zizyo zikwiza pakubawila aba inko yako muntazi muno, pakuti ichisetuka chinichi chikunena nizya muntazi.”

¹⁵ Bo akumbuzya zinizi, nkakotamila bulo pasi icheni chane intakanenapo nachimochimo.

¹⁶ Po yumo yuyo akabonekagha ngati muntu, Akapalamasya imilomo yane nukunyighula umulomo, po nkanda pakunena. Nkamubuzya yuyo akimilila pamaso papane ukuti, “Wee songo, ivintu vivyo navyennya muchisetuka vyambaba nkani mumoyo, sona inte na maka.

¹⁷ Nkimba ane ne mubombi wako ninganena nawe bulibuli? Amaka ghamalila, sona nkupotwa na pakufuta bulo.”

¹⁸ Po yumo yuyo akaba ngati muntu akampalamasya nukumpa amaka.

¹⁹ Akati, “Awe we mughaniwa, utakanyilaye Umutende ghubanje nawe, banga na maka, sona ubanje we mujivu.” Bo ambuzya bulo, nkaba namaka nukunena ukuti, “Wee songo, nena pakuti wampa amaka.”

²⁰ Polelo akati, “Nkimba wachimanya chicho nkwiziye? Niza pakulwa ubwite nu wantumi uwa Peleziya, umwakuti namalana nawe, uwantumi usongo uwa Gilisi izaye.

²¹ Ichakwanda nkulonda nkubuzye zizyo zisimbiwe mwi Buku ilya Bwanaloli. Atalilpo nayumoyumo uwakunyavwa, loli mwene u Mikayeli uwantumi wako uwakumwanya usongo nkani.