Daniyeli 1 - IBAYIBOLO 2024

U Daniyeli na bamanyani bache munyumba iya Nebukadineza

¹ Mumwaka uwabutatu, bo u mwene u Yehoyakimu akulaghila muchisu icha Yuda, u mwene u Nebukadineza uwamu Babiloni akakazyungulila akaya akakulu nkani aka Yelusalemu ukuti alwe nako ubwite.

² Po u Mwene akamubika u Yehoyakimu munyobe zyache, sona akasenda ivibombelo vimo ivya mu Nyumba iya Chala nukubuka navyo kunyumba iya bachala bache muchisu icha Babiloni, sona akavibika ivibombelo vila muvipinda ivyakusungilamo ubukabi.

³ Po u mwene akamulamula u Ashipenazi, yuyo akaba we songo uwa makambala ukuti ize na bakayidi bamo aba mu Izilayeli, babo bakaba bamunyumba iya bumwene, sona na bamunyumba zimo inchindamu.

⁴ Banaba bakaba balumendo babo batakaba ni chilema nachimochimo, bakaba bakuboneka akiza na bamahala na bakumanyila lubilolubilo na bankalo inyiza, sona babo bangabomba imbombo munyumba iya mwene. U Ashipenazi akamanyisya pakubelenga na pakusimba ineno iya muchisu icha Babiloni.

⁵ U mwene akalamula ukuti babapanje ichakulya chicho akalyanga sona nu vinyo yuyo akang'welagha. Akalamula sona ukuti bamanyile amaka matatu, po nanti bamala pakumanyila, bamubombelaye u mwene.

⁶ Bamo aba balumendo bala bo aba: U Daniyeli nu Hananiya nu Mishayeli nu Azaliya, sona bosi bakaba ba muchisu icha Yuda.

⁷ Usongo uwa makambala yula akabita abalumendo bala amatabwa aghanji. Amatabwa ghabo ghakaba gho agha: U Daniyeli akaba we Belitishazala, u Hananiya akaba we Shadilaki, u Mishayeli akaba we Meshaki, sona u Azaliya akaba we Abedinego.

⁸ Loli u Daniyeli akadumula ukuti atakinyazye mwene pakulya ichakulya nukung'wela uvinyo uwa kunyumba iya bumwene, po akamulaba usongo uwa makambala yula, ukuti amwitikizye ukuti atakinyazye mwene pakulya ichakula chilachila.

⁹ U Chala akamupa usongo uwa makambala yula u moyo uwakuti amupelele ichisa u Daniyeli.

¹⁰ Loli ikambala likamubuzya u Daniyeli likati, “Nkumunyila u mwene wane, yuyo akalamula ukuti imbape ichakulya ni chakung'wela. Po nanti akubennya ukuti mwaghanda nkani ukubachila abalumendo abanji bala, akwiza pakungogha.”

¹¹ Po u Daniyeli akamubuzya usongo uwa makambala, yuyo akamusala pakumwenelezya u Daniyeli nu Hananiya nu Mishayeli, sona nu Azaliya akuti,

¹² “Utuyele aswe twe babombi bako amasiku teni, pakutupa inyanyi izya mani zyene, sona na mizi aghakung'wela.

¹³ Po ungatufwanikizya akabonekele naka balumendo babo bakulya ichakulya chicho u mwene akulya, sona ungatubombela aswe twe babombi bako zizyo ukulonda.”

¹⁴ Po akitika nukubayela amasiku teni.

¹⁵ Pisiku ilya bumalilo ilya teni bakaboneka akiza nkani ukubachila abalumendo babo bakalyanga ichakulya chicho u mwene akalyanga.

¹⁶ Po umulindilili yula akefyapo ichakulya icha mwene nu vinyo yuyo bakabaghila ukuti bang'wele, po akabapa inyanyi izya mani.

¹⁷ U Chala akabapa abalumendo folo bala amahala na kivwisizye aka vimanyilo ivya mu mabuku aghakulekanalekana. Po u Daniyeli akavimanya ivisetuka ni vilota ivyakulekanalekana.

¹⁸ Bo akabalilo kafika kako u mwene akakasala akakuti abalumendo bala bizaye kunyumba iya bumwene, usongo uwa makambala yula akiza nabo pamaso pa mwene u Nebukadineza.

¹⁹ U mwene akanenezannya nabo, po akagha ukuti atakabapo nayumoyumo uwakuyana nu Daniyeli nu Hananiya nu Mishayeli, sona nu Azaliya, po bakanda pakumubombela u mwene.

²⁰ Akabalilo kosi kako u mwene akalalusyanga nizya vintu vivyo vikalondagha amahala pamo akivwisizye, abalumendo banaba bakaba na mahala aka teni ukubachila abamayele na balaghuzi aba mubumwene bwache bosi.

²¹ U Daniyeli akikala kulakula mupaka mumwaka uwakwanda bo u mwene u Sayilasi anda pakulaghila.