Amosi 9 - IBAYIBOLO 2024

Ubulongi ubwa Mwene

¹ Nkamwennya u Mwene imiliye papipi ni chighemo, po akati, “Koma pamwanya pa mpanda umwakuti akasonje kaneng'ene, kawisizye pamitu iya bantu bosi babo bapona nkwiza pakubaghogha nupanga. Atakwiza pakubapo nayumoyumo uwakuchimbila, pamo uwakupona.

² Napapo bangakumba nkani mupaka kuchisu icha bafwe, inyobe yane yikwiza pakubasokola kulakula. Napapo bangakwela ukufika ko kumwanya, nkwiza pakubisizya pasi.

³ Napapo bangavwama pamwanya pighamba ilya Kalimeli, nkwiza pakubalonda nukubalema. Napapo banganvwama pasi panyanja, nkwiza pakuyilamula injoka ukuti yibalume.

⁴ Napapo bangalemiwa pakuba bazya na balwani babo, kulakula nkwiza pakulamula ukuti baghoghiwe nupanga. Nkwiza pakubalolotela ukuti imbabombele ichintu ichibibi, ntakwiza pakubabombela ichiza.”

⁵ U Mwene, u Mwene Uwamaka Ghosi, yuyo achipalamasya ichisu ichapasi chikusunguluka, sona abantu babo bakwikalamo bakulila. Ichisu chosi chikwizula ngati lusoko ulwa Nayilo, sona chikupwa ngati lusoko ulwa mu Ijiputi.

⁶ U Mwene akuzenga inyumba izya bumwene kumwanya, sona akwala ulwalo pachisu ichapasi, akughitizya amizi agha munyanja sona akughapungulila pachisu, itabwa lyache we Mwene.

⁷ U Mwene akuti, “Nkimba amwe te mwe ba Izilayeli, babo bayanite bulo na bantu aba ku Etiyopiya? Fwandi te nene nkabefyamo aba Izilayeli muchisu icha Ijiputi, naba Filisiti muchisu icha Kileti sona naba Siliya muchisu icha Kili?”

⁸ Naloliloli amaso agha Mwene Uwamaka Ghosi ghakubwennya ubumwene bubo bukubomba imbibi. “Nkwiza pakubuzimizya pachisu ichapasi, loli ntakwiza pakubananganizizya zila abamunyumba iya Yakobo.” U Mwene anena.

⁹ “Pakuti nkwiza pakulamula sona nkwiza pakubaneng'ennya aba Izilayeli, pakasi pa inko zyosi, ngati malezi musefa katakwiza pakubapo nakamokamo akakuwila pitope.

¹⁰ Ababomba mbibi bosi pakasi pabantu bane, bakwiza pakufwa nupanga, sona abantu bosi babo bakuti, ‘Chitalipo nachimochimo ichibibi ichakutuwila pamo ukuti ubupalapala butuwile.’ ”

Ukunyokelamo ukwa ba Izilayeli

¹¹ U Mwene akuti, “Pisiku lilalila nkwiza pakunyosezyamo ubumwene ubwa Devedi bubo buli ngati nyumba yiyo yighuye. Nkwiza pakuluzenga sona ulubumba lwache, nukuyannya sona mumo lwamongoka po nukuzenga sona ngati mumo lukabela kale,

¹² umwakuti abakusyala mu Edomu sona ninko zyosi zizyo zikwitiziwa ni tabwa lyane.” U Mwene anena, yuyo akwiza pakuzibomba zinizi.

¹³ U Mwene akuti, “Mumasiku ghagho ghakwiza uwakwinula akwiza pakumuchila yuyo akulima, wepe uwakubyala akwiza pakumuchila yuyo akukanyankila amampesya. Mumaghamba mosi mukwiza pakutonya uvinyo umupya, po uvinyo akwiza pakwenda mutughamba tosi.

¹⁴ Nkwiza pakubanyosya sona abantu bane kuchisu chabo. “Bakwiza pakutuzenga sona utwaya twabo utukulu nkani utwakunanganika nukwikala mulamula. Bakwiza pakubyala amampesya nukung'wela uvinyo wabo, bakwiza pakulima amaghunda, nukulya ivikomwa vyabo.

¹⁵ Nkwiza pakubikazya aba Izilayeli muchisu ichabo ni chabo, batakwiza pakunyunkuliwamo sona muchisu chicho nabapa.” U Mwene u Chala winyu anena.