Amosi 8 - IBAYIBOLO 2024

Ichisetuka icha chidudunga icha vikomwa

¹ Izi zyo zizyo u Mwene Uwamaka Ghosi akandanjizya: Mulamula nkennyamo ichisetuka icha chidudunga icha vikomwa ivitonu.

² U Mwene akalalusya akati, “Amosi nkimba ukwennya ichoni?” Nkamula nkati, “Nkwennya ichidudunga icha vikomwa ivitonu.” Po u Mwene akambuzya akati, “Ubumalilo ubwa bantu bane aba Izilayeli bwafikila. Ntakwiza pakubaleka bulo.”

³ U Mwene Uwamaka Ghosi akati, “Pisiku lilalila inyimbo izya mu Nyumba iya Chala zikwiza pakuba chililo. Imivimba imyinji yikwiza pakulambalala bulo myee posi na posi!”

Ukunanganika ukwa ba Izilayeli

⁴ Ivwa kuno, amwe mwe mukubayivya abapina, sona mukulonda pakubamala abakusobelwa,

⁵ Mukuti, “Nkimba Ukupanta ukwa Mwezi kukumala liyi, umwakuti tughulizye amapemba, nkimba Isiku Ilyakutuzya likumala liyi, umwakuti tughulizye amalezi? Ukuti tubachevye abantu indobo, nukukwezya imitengo sona tubazimbule ni vipimilo ivyabumyasi,

⁶ tubaghule abapina nu siliva, sona abakusobelwa tubaghule ni nkwato, po tughulizye ni lyelelo bulo.”

⁷ Pachifukwa icha kwituvya ukwa bamunyumba iya Izilayeli, u Mwene alapa ukuti, “Ntakwiza pakuluvyapo nalumo ichintu chosi chicho babomba.

⁸ Nkimba ichisu chitakwiza pakutetema pachifukwa icha chinichi, sona abantu babo bakwikala mulamula, nkimba batakwiza pakulila? Ichisu chosi chila chikwiza pakwizula ngati lusoko ulwa Nayilo, nukupwa nkani ngati lusoko ulwa mu Ijiputi.”

⁹ Po u Mwene Uwamaka Ghosi akuti, “Pisiku linilyo nkwiza pakulyinjizya izuba pakasi pachamabwila, sona ichisu chikwiza pakuba muchisi pamusanya,

¹⁰ Ulusekelo lwinyu ulwanyiputo, lukwiza pakuba chililo, kope ukwimba kwinyu kukwiza pakuba kulila. Umuntu wesi akwiza pakuvwinkiwa amasaka, nukumwa isisi kumitu yinyu, pachifukwa icha chitima. Nkwiza pakukapela akabalilo kalakala pakuba ngati ko kabalilo akakumulila umwana mwene na mwene, sona ubumalilo bwisiku lilalila bukwiza pakuba bwakubaba nkani.”

¹¹ U Mwene Uwamaka Ghosi akuti, “Amasiku ghakwiza ghagho nkwiza pakubawisizya izala muchisu chosi, te zala iya chakulya pamo inyota iya amizi awe, loli izala iya kwivwa amazyu agha Mwene.

¹² Abantu bakwiza pakwendakwendagha bulo kunyanja iyi na yila, sona bakwiza pakwendakwendagha kumitu na kubufumilo bwizuba, pakughalondelezya amazyu agha Mwene, loli batakwiza pakughagha.

¹³ Pisiku linilyo, abalindu abakuboneka akiza sona na balumendo abamaka, bakwiza pakuzilika pachifukwa icha nyota.

¹⁴ Abantu bosi babo bakulapila mwitabwa ilya Ashima ichifwani icha Samaliya, pamo bakuti, ‘Naloli nkulapila mwa chala umumi uwaku Dani,’ pamo ukuti, ‘Naloli nkulapila mwa chala umumi uwaku Belisheba’ bosi banaba bakwiza pakuwa, batakwiza pakunyamuka sona.”