Amosi 7 - IBAYIBOLO 2024

Ichisetuka icha makanta

¹ Izi zyo zizyo u Mwene Uwamaka Ghosi akandanjizya: Akayannyanga umakanta umwinji nkani, bo u mwene inula bulo imbeyu zyache, sona bo imbeyu zizyo bakakaba pakubyala zyamela bulo.

² Bo umakanta yula amala ivibyalwa vyosi vila, nkalila nkati, “Wee Mwene Uwamaka Ghosi, bahobokele abantu bako! Nkimba u Izilayeli angapona bulibuli? Pakuti munandi nkani!”

³ Po u Mwene akabwisya ubukali bwache nukuti, “Zinizi zitakwiza pakubombiwa.”

Ichisetuka icha moto

⁴ Izi zyo zizyo u Mwene Uwamaka Ghosi akandanjizya: Akitizya indimi izya moto ukuti abafunde abantu, po zikalungulizya inyanja inkulu nkani nukunangannya amaghunda ghosi pachisu ichapasi.

⁵ Po nkalila nkati, “Wee Mwene Uwamaka Ghosi, nkukulaba ukuti leka! Nkimba u Izilayeli angapona bulibuli? Pakuti munandi nkani!”

⁶ Po u Mwene akabwisya ubukali bwache nukuti, “Zinizi zitakwiza pakubombiwa sona.” U Mwene Uwamaka Ghosi anena.

Ichisetuka icha lukusa ulwakupimila

⁷ Zizyo akandanjizya zikaba zyo izi: U Mwene akimilila papipi nulubumba bo alemite ulukusa ulwakupimila.

⁸ U Mwene akandalusya akati, “Wee Amosi, nkimba ukwennya ichoni?” Nkamula nkati, “Ulukusa ulwakupimila ulubumba.” Po u Mwene akati, “Ennya, nkupima ulukusa pakasi paba Izilayeli, ntakwiza pakubaleka bulo awe.

⁹ Ubuzilo ubwapamwanya ubwa Yisaki bukwiza pakunanganika, bope Ubuzilo Ubuzelu ubwakwiputilamo ubwa Izilayeli bukwiza pakuba chisami. Nkwiza pakubaghogha abamunyumba iya Yelobowamu.”

U Amosi nu Amaziya

¹⁰ Po u Amaziya umuputi uwaku Beteli akamutumila amazyu u Yelobowamu u mwene uwa Izilayeli aghakuti, “U Amosi akubatika pakukusambukila pakasi paba Izilayeli bosi. Abantu batangazyivwa zizyo akuzinena.

¹¹ Pakuti u Amosi akuti, ‘U Yelobowamu akwiza pakughoghiwa nupanga, bope aba Izilayeli bakwiza pakuba bazya, kubutali nkani ni chisu icha bakamu babo.’ ”

¹² Po u Amaziya akamubuzya u Amosi akati, “Awe we mwenelezyi, epapo pano! Bukagha kuchisu chako icha Yuda. Kalaghulaye kulakula, abantu bakupanje ivibama.

¹³ Utakachele pakulaghula sona mu Beteli muno, pachifukwa ichakuti bunubu bo buzilo ubuzelu ubwa mwene witu u Yelobowamu, sona yo nyumba iya bumwene.”

¹⁴ U Amosi akamwamula u Amaziya akati, “Ane intakaba ne mulaghuzi, pamo umwana uwa mulaghuzi, loli nkaba ne mudimi bulo, sona ne mulimi uwa makwi agha makuyu.

¹⁵ Loli u Mwene akanyefya kuko nkadimagha ing'ozi nukumbuzya ukuti, ‘Bukagha pakulaghula pakasi pabantu bane aba Izilayeli.’

¹⁶ Polelo ivwa amazyu agha Mwene. Awe ukunena ukuti, ‘Utakachele pakulaghula pakasi paba Izilayeli, sona uleke pakulumbilila kubaluko ulwa Yisaki.’

¹⁷ “Polelo u Mwene akuti, ‘Umuchi wako akwiza pakuba we malaya mukaya akakulu nkani, sona abana bako abalumendo na balindu bakwiza pakughoghiwa nupanga. Ichisu chako chope chikwiza pakupimiwa nukugabiwa, sona amwe mwebene mukwiza pakufwila muchisu chicho chitamumenye u Chala. Aba Izilayeli bosi bakwiza pakuba bazya, kubutali ni chisu chabo.’ ”