Amosi 5 - IBAYIBOLO 2024

Abantu bakwitiziwa ukuti bapinduke

¹ Mwee ba Izilayeli, teghelezya ulwimbo ulwa pamfwa lulo nkubimbila,

² “Umulindu u Izilayeli, atakanyamuka nalumolumo. Bamulekite mwene muchisu chache, atalipo nayumoyumo uwakumunyamusya.”

³ U Mwene Uwamaka Ghosi akuti, “Akaya akakulu nkani kako kakubuka kubwite na basilikali abamaka 1,000 kakwiza pakusyala na basilikali 100 mpela. Akaya akakulu kako kakubuka kubwite na basilikali abamaka 100, kakwiza pakusyala na basilikali 10 mpela.”

⁴ U Mwene akubabuzya aba Izilayeli akuti, “Mundondelezye, po mukwiza pakuba nubumi.

⁵ Mutakabuke pakwiputa ku Beteli, mutakabuke ku Giligali, pamo ku Belisheba. Pakuti naloli abantu aba mu Giligali bakwiza pakusendiwa nukubuka kubuzya, sona u Beteli akwiza pakuzimila ngati chintu ichabulo.”

⁶ Mumulondelezye u Mwene, po mukwiza pakuba nubumi, lumo akwiza pakubazimizya, aba inko izya Yosefu ngati moto, ghukwiza pakubalungulizya abantu aba mu Beteli, po atalipo nayumoyumo umuntu uwakughuzimya.

⁷ Mwabwandula ubwanaloli pakuba bubavu, nukubusumbila ubugholosu palufumbi.

⁸ U Mwene akapela intondwa nukuzibika mubuzilo bwache, sona akachipela ichisi pakuba ndabindabi, akaghupela umusanya pakuba busiku, weyuyo mwene akughitizya amizi agha munyanja, nukughapungulila pachisu, itabwa lyache we Mwene.

⁹ Weyuyo akubanangannya abantu abamaka, sona ukunanganika kukwiza pa malinga agha kaya akakulu nkani.

¹⁰ Amwe mumubengite umuntu yuyo akulongela mubwanaloli, sona mukumusula umuntu yuyo akunena ubwanaloli pabulongi.

¹¹ Mukumuyivya umuntu umupina, nukumufyenga ukuti abape ingano. Napapo muzengite inyumba inyiza nkani izya mabwe, loli mutakwiza pakwikalaghamo. Napapo mubyalite amaghunda agha mampesya amiza nkani, loli mutakwiza pakung'wela uvinyo.

¹² Pakuti inzimenye mumo ukunanga kwinyu kubeleye, sona nu bwinji ubwa mbibi zyinyu. Mukubayivya abantu abagholosu, nukupokela amabeko sona mukunyongannya ubwanaloli panongwa izya bantu abapina.

¹³ Polelo, umuntu uwa mahala akuba bulo myee, pakabalilo ngati kanaka, pakuti ko kabalilo akabibi nkani.

¹⁴ Mubulondaye ubwiza, sona mutakabulondaye ububibi, umwakuti mubanje nubumi. Po u Mwene u Chala Uwamaka Ghosi akwiza pakuba namwe, ukuyana namumo mukunenela ukuti momumo abeleye.

¹⁵ Mububenge ububibi, mubughane ubwiza, sona mubombe ubwanaloli pabulongi. Lumo u Mwene u Chala Uwamaka Ghosi akwiza pakubapelela ichisa abantu abakusyalako abaluko ulwa Yosefu.

¹⁶ Polelo u Mwene u Chala Uwamaka Ghosi akuti, “Mumisebo mukwiza pakuba ukulila, sona muminalo mukwiza pakuba kulila kwene, pachifukwa icha ntamyo, bope abalimi bakwiza pakwitiziwa pakulila, poka na bantu babo bamenye pakulila pamfwa.

¹⁷ Mumaghunda agha mampesya, mukwiza pakuba ichililo pakuti nkwiza pakudumusannya pakasi papinyu.” U Mwene anena.

Isiku ilya Mwene

¹⁸ Chighune nkani, mwe mukulisamba isiku ilya Mwene! Nkimba choni chicho mukulisamba isiku ilya Mwene? Isiku lila likwiza pakuba lisiku ilya chisi, te kukabanje ulukozyo.

¹⁹ Likwiza pakuba ngati po umuntu akuchimbila inkalamu, nukukomana nu labwe. Likwiza pakuba ngati po umuntu injiye munyumba yache nukweghamizya inyobe zyache palubumba, nukulumiwa ni njoka.

²⁰ Isiku ilya Mwene likwiza pakuba chisi chene, sona kutakwiza pakubako ulukozyo.

²¹ U Mwene akuti, “Indubengite, sona indusulite ulusekelo lwinyu ulwa lwiputo, zyope inkomano zyinyu zitakunhobosya napo panandi.

²² Napapo mukubika ivyakwiyipa ivyakocha ni vyakwiyipa ivya busu, ntakwiza pakuvipokela. Napapo mukubika ivyakwiyipa ivyabupoka, ntakwiza pakuvipokela, awe.

²³ Mutakanzumaye ni nyimbo zyinyu, ntangateghelezya inyimbo zyinyu izya ipango, awe.

²⁴ Loli buleke ubwanaloli bwendaye ngati lusoko, bope ubugholosu bwendaye ngati kasoko kako katakupwa nalumo.

²⁵ “Mwee ba Izilayeli, nkimba mukansendela ivyakwiyipa ni vyabupi munkolongo amaka 40 ghala?

²⁶ Loli ilelo mwavyiputa ivifwani ivya Sakuti u mwene u chala winyu, sona nu lutondwa ulwa chala winyu u Kayiwani yuyo mukipangila mwebene.

²⁷ Polelo nkwiza pakubatuma pakuba mwe bazya ukuchila ichisu icha Damasika.” U Mwene anena, yuyo itabwa lyache we Chala Uwamaka Ghosi.