Amosi 4 - IBAYIBOLO 2024

¹ Ivwa kuno, mwe bakolo aba mu Samaliya mwe mwinite ngati ngwata izya mu Bashani. Mwe mukubayivya abapina na bapotwe mukubabuzya abalume binyu mukuti, “Tupe chimo ichakung'wela!”

² U Mwene Uwamaka Ghosi alapila mwitabwa lyache izelu ati, “Naloliloli akabalilo kakwiza kako mukwiza pakusikuliwa bulo ni ndobani, umuntu wesi akwiza pakuba ngati yo swi ku ndobani.

³ Mukwiza pakufyengiwa bulo pakufumila muvidobozwi ivya malinga, umuntu wesi pamwene, sona mukwiza pakusumbiwa pighamba ilya Halimoni.” U Mwene anena.

U Izilayeli akupotwa pakumanyila

⁴ “Buka ku Beteli nukubomba imbibi, sona buka ku Giligali, nukubomba imbibi inyinji. Zagha ni vyakwiyipa vyinyu pandabindabi posi, sona mubikaye ichigaba choka icha vigaba 10, pisiku ilyabutatu.

⁵ Bika ivibama vyinyu ivya chilungo, pakuba chakwiyipa ichakupalizikizya, sona mwituvyanje pachifukwa icha vyabupi, vivyo mukwiyipa mubwighane bwinyu. Mwee ba Izilayeli, pakuti vinivi vyo vivyo muvighanite nkani pakubomba.” U Mwene Uwamaka Ghosi anena.

⁶ “Ane nkabawisizya izala mutwaya twinyu tosi utukulu nkani, sona nukuti mutwaya tutakabanje ni vibama vimo, loli pope bulo mutakanyokela kukwane.” U Mwene anena.

⁷ “Nkayilema ivula, bo inyinulo yinyu yasyala amezi matatu. Nkatimizya ivula mukaya kamo akakulu, loli intakayitimizya mukaya akanji akakulu. Ivula yikatima mumughunda ghumo, loli mumughunda ughunji ivula yitakatimamo, po imbeyu zikuma.

⁸ Abantu bakatantalilatantalila ukufuma mukaya akakulu aka na kala, pakulonda amizi aghakung'wela, loli batakaghagha aghakubakwana, loli pope bulo mutakanyokela kukwane.” U Mwene anena.

⁹ “Utubalilo utwinji nkababula amaghunda ghinyu, sona na maghunda ghinyu agha mampesya, pakuwisya ububine ni chuku. Umakanta akalya amakuyu ghinyu, sona na makwi agha misyunguti, loli pope bulo mutakanyokela kukwane.” U Mwene anena.

¹⁰ “Nkabawisizya iviwaya ngati mumo nkabombela mu Ijiputi. Nkabaghogha abalumendo binyu nupanga, poka ni falasi zyinyu zizyo mukazifyula. Nkazipela impuno zyinyu pakunusya umunusi uwa mivimba iyakufuma muvisakasa ivya basilikali, loli pope bulo mutakanyokela kukwane.” U Mwene anena.

¹¹ “Nkabanangannya abantu bamo pakasi pa papinyu, ngati mumo nkabananganizizya abantu aba mu Sodomu naba mu Gomola. Mukaba ngati ko kachizinka kako kazompoliwa pamoto, loli pope bulo mutakanyokela kukwane.” U Mwene anena.

¹² “Mwee ba Izilayeli, zinizi zyo zizyo nkwiza pakubabombela, sona pachifukwa ichakuti nkwiza pakubabombela zinizi, mwee ba Izilayeli, mwiyannye pakukomana nu Chala winyu.”

¹³ Yuyo akupela amaghamba akupela impepo, nukubavumbulila abantu inyinong'ono zyache, yuyo akughupela umusanya pakuba chisi, akwenda pamwanya pachisu ichapasi: Itabwa lyache we Mwene u Chala Uwamaka Ghosi.