Amosi 3 - IBAYIBOLO 2024

¹ Mwee ba Izilayeli, ivwa zizyo u Mwene akunena nizya amwe, mwe luko lulo nkalwefyamo mu Ijiputi:

² “Pakasi pa inko zyosi izya muchisu ichapasi, nkabasala mwemwe mwebene polelo nkwiza pakubafunda pachifukwa icha mbibi zyinyu zyosi.”

Imbombo iya mulaghuzi

³ Nkimba abantu babili bangenda poka, bo bativwanite?

⁴ Nkimba inkalamu yikubuluma mumusitu bo yitalemite inyama? Nkimba yikubuluma mumpako, bo yitalemite nachimochimo?

⁵ Nkimba ichiyuni chikuwila muchipingo, bo umuntu atateghite ichipingo? Nkimba ichipingo chikuvwimpuka, bo chitalemite nachimochimo ichintu?

⁶ Nanti ipati likulila mukaya akakulu nkani, nkimba abantu batakutetema? Nanti intamyo zyawa mukaya akakulu nkani, nkimba te we Mwene aziwisya?

⁷ Naloliloli u Mwene Uwamaka Ghosi atakubombapo nachimochimo, nanti atabavumbuliye ababombi bache abalaghuzi imbatiko zyache.

⁸ Inkalamu yabuluma, nkimba wewenu atanganyila? U Mwene Uwamaka Ghosi anena, nkimba wewenu yuyo atangalaghula?

Ukunanganika ukwa Samaliya

⁹ Lumbilila mumalinga agha mu Ashidodi, sona na mumalinga agha mu Ijiputi: “Bungana mumaghamba agha mu Samaliya, umwakuti mwennye ukuvulungana ukukulu nkani, nukuyiviwa kuko kuli pakasi pabantu.”

¹⁰ U Mwene akuti, “Batamenye na pakubomba ubugholosu, babo bakusunga ivintu ivyakufyula mumalinga ghabo.”

¹¹ Polelo u Mwene Uwamaka Ghosi akuti, “Umulwani akwiza pakuchizyungulila ichisu nukughamongolannya amalinga ghinyu, akwiza pakubafyula ivintu vyosi mumalinga ghinyu.”

¹² U Mwene akuti, “Ngati mumo umudimi akufyulila intapatapa zibili kumulomo uwa nkalamu, pamo akachigaba aka ikutu ilya ng'ozi, momumo aba Izilayeli bope bakwiza pakupokeliwa, babo bakwikala mu Samaliya pakutuzya mulubazu muvitala vyabo, sona na pavitengo vyabo mu Damasika.”

¹³ U Mwene u Chala Uwamaka Ghosi akuti, “Teghelezya zinizi sona mususannye na baluko ulwa Yakobo.

¹⁴ Pisiku lilyo nkwiza pakubafundila aba Izilayeli pachifukwa icha mbibi zyabo. Nkwiza pakuvimongolannya ivighemo mu Beteli, impembe izya vighemo zikwiza pakudumuliwa sona zikwiza pakuwa pasi.

¹⁵ Nkwiza pakuyimongolannya inyumba iya pachisiku, poka ni nyumba iya pachisanya. Inyumba zizyo zikalabiwa namino agha zovu zikwiza pakumongoliwa, sona inyumba izya pamwanya zikwiza pakunanganika.” U Mwene anena!