Amosi 2 - IBAYIBOLO 2024

Mowabu

¹ U Mwene akuti, “Pakuti abantu aba mu Mowabu bakunanga kabilikabili, po ane ntakwiza pakubwisya ubukali bwane. Pachifukwa ichakuti bakocha amafupa agha mwene uwamu Edomu, mupaka ghakaba litoyi.

² Nkwiza pakubawisizya umoto abantu aba mu Mowabu, ghugho ghukwiza pakughalungulizya amalinga agha mu Keliyoti. Abantu aba mu Mowabu bakwiza pakufwila kubwite ubwa chongo nkani, bo abasilikali babo bakukolomoka nukulizya amapati.

³ Nkwiza pakumunangannya umulaghili wabo sona nkwiza pakughaghogha amakambala ghache ghosi.” U Mwene anena.

Yuda

⁴ U Mwene akuti, “Pakuti abantu aba mu Yuda bakunanga kabilikabili, po ane ntakwiza pakubwisya ubukali bwane. Pachifukwa ichakuti balukana ululaghilo ulwa Mwene sona baghasulannya amalamulo ghache. Pakuti abachala abamyasi babasobezizye, abachala babo abanyenya bakabiputagha.

⁵ Nkwiza pakubawisizya umoto abantu aba mu Yuda, ghugho ghukwiza pakughalungulizya amalinga agha mu Yelusalemu.”

Ukulongiwa ukwa ba Izilayeli

⁶ U Mwene akuti, “Pakuti abantu aba mu Izilayeli bakunanga kabilikabili, po ane ntakwiza pakubwisya ubukali bwane. Bakubaghulizya abagholosu nu siliva, sona abapina ni nkwato.

⁷ Bakusendelapo ulusako pabapina nukubasunkila, sona batakubabombela mubwanaloli abantu abakuyivyiwa. Uwise nu mwana wache umulumendo bakwinjila mumulindu weka, umwakuti bakulisamula itabwa lyane izelu.

⁸ Bakulambalala mulubazu ulwa vighemo vyosi sona na pamenda ghagho basenda pakuba chikole. Munyumba izya bachala babo bakung'welelamo u vinyo, yuyo abantu balipila panongwa.

⁹ “Nkabanangannya aba Amoli pamaso papabo, napapo bakaba batali ngati likwi ilya mwale, abamaka ngati likwi ilya mupandapanda. Nkavinangannya ivikomwa vyache sona na magululuzi ghache.

¹⁰ Nkabefyamo mu Ijiputi, nukubalongozya munkolongo amaka 40, sona nkabapa ichisu icha ba Amoli.

¹¹ “Nkabimika bamo pakasi pabana binyu pakuba balaghuzi, sona abalumendo bamo pakasi papinyu pakuba ba Nazili. Mwee ba Izilayeli, nkimba te momumo?” U Mwene anena.

¹² “Loli mukabang'wesya uvinyo aba Nazili, sona mukabalamula abalaghuzi ukuti batakalaghulaye.

¹³ “Po ilelo nkwiza pakubasya, ngati mumo ingolo yikukomela ingano.

¹⁴ Abantu abalubilo nkani batakwiza pakupona, abantu abamaka bakwiza pakuba badedebazu, sona abasilikali batakwiza pakubupoka ubumi bwabo.

¹⁵ Abantu babo bamenye pakusumba utulasilo batakwiza pakujimba, sona abasilikali abakuchimbila pasi batakwiza pakupona, abakukwela pafalasi batakwiza pakubupoka ubumi bwabo.

¹⁶ Bope abasilikali abajivu nkani, bakwiza pakuchimbila nkule pisiku lilalila.” U Mwene anena.