Amosi 1 - IBAYIBOLO 2024

¹ Agha gho mazyu ghagho u Amosi yuyo akaba yumo uwa badimi aba mukaya aka Tekowa. U Amosi akennya ichisetuka nizya Izilayeli bo ghachilipo amaka mabili bo akasenyenta katafikite. Pakabalilo kalakala u Uziya akalaghilagha mu Yuda, sona u Yelobowamu umwana uwa Yehowashi akalaghilagha mu Izilayeli.

² U Amosi akati, “U Mwene akubuluma mu Ziyoni, sona akujilimisya mu Yelusalemu. Apakudimilapo ivitekwa pumiye, sona isote ilya pighamba ilya Kalimeli likufoka.”

U Mwene akubalonga abapalamani aba Izilayeli Siliya

³ U Mwene akuti, “Pakuti abantu aba mu Damasika bakunanga kabilikabili, po ane ntakwiza pakubwisya ubukali bwane, pachifukwa ichakuti bakabayivya nkani abantu aba mu Giliyadi ni vyela ivyakukomelapo ingano.

⁴ Nkwiza pakuwisizya umoto panyumba iya Hazayeli, ghugho ghukwiza pakughalungulizya amalinga agha Beni Hadadi.

⁵ Nkwiza pakuzipyolannya impingwi izya milyango iya Damasika, sona nkwiza pakumunangannya u mwene, yuyo akwikala mwikombe ilya Aveni, sona na yuyo akulaghila mu Beti Edeni. Abantu aba mu Siliya bakwiza pakubuka kuchisu icha buzya icha Kili.” U Mwene anena!

Filisiti

⁶ U Mwene akuti, “Pakuti abantu aba mu Gaza bakunanga kabilikabili, po ane ntakwiza pakubwisya ubukali bwane. Bakabalema abantu bosi, nukubaghulizya mu Edomu.

⁷ Nkwiza pakuluwisizya umoto ulubumba mu Gaza, ghugho ghukwiza pakughalungulizya amalinga ghache.

⁸ Nkwiza pakumunangannya u mwene uwamu Ashidodi, sona na yuyo akulaghila mu Ashikeloni. Nkwiza pakubafunda abantu aba mu Ekiloni, mupaka aba Filisiti bamale bosi pakufwa.” U Mwene Uwamaka Ghosi anena.

Tile

⁹ U Mwene akuti, “Pakuti abantu aba mu Tile bakunanga kabilikabili, po ane ntakwiza pakubwisya ubukali bwane. Pachifukwa ichakuti bakabaghulizya abazya bosi mu Edomu, sona bakaluvya ulufingo ulwa bukamu bwabo.

¹⁰ Nkwiza pakuluwisizya umoto ulubumba ulwa mu Tile, ghugho ghukwiza pakughalungulizya amalinga ghache.”

Edomu

¹¹ U Mwene akuti, “Pakuti abantu aba mu Edomu bakunanga kabilikabili, po ane ntakwiza pakubwisya ubukali bwane. Akamuchimbizya umukamu wache nupanga, sona atakamupelela ichisa, pachifukwa ichakuti ubukali bwache bukakagha, sona ukukalala kwache kutakisiwa.

¹² Nkwiza pakuwisizya umoto mu Temani, ghugho ghukwiza pakughalungulizya amalinga agha mu Bozila.”

Amoni

¹³ U Mwene akuti, “Pakuti abantu aba mu Amoni bakunanga kabilikabili, po ane ntakwiza pakubwisya ubukali bwane. Pachifukwa ichakuti bakabatumbula akabibi abakolo abanyanda aba mu Giliyadi, umwakuti babanje ni chisu ichikulu nkani.

¹⁴ Nkwiza pakuluwisizya umoto ulubumba lwache mu Laba, ghugho ghukwiza pakughalungulizya amalinga ghache. Po kukwiza pakuba ichongo ichikulu nkani pisiku ilya bwite, yope impepo yikwiza pakubako ngati we kankungu.

¹⁵ U mwene wabo akwiza pakulemiwa nukubuka nawe kuchisu icha bukayidi poka na makambala ghache.” U Mwene anena!