Aba Loma 9 - IBAYIBOLO 2024

U Chala na bantu bache abasaliwa

¹ Nkunena ubwanaloli: Ane ne wa Kilisitu, sona intakutamanta. Umabyebye wane yuyo akulamuliwa nu Muzimu Umuzelu sona wepe akunsimikizya ukuti intakutamanta

² bo nkunena ukuti indi ni chitima ichikulu nkani, sona umoyo wane ghukubaba ukusita ukumala,

³ pakuti ane nemwene nalondagha ngali nkaba pasi pachighune icha Chala nukusatuliwa ukwa Kilisitu, pachifukwa icha bakamu bane, abantu abaluko lwane.

⁴ Abene bo ba Izilayeli babo u Chala akabasala ukuti babanje bana bache nukubavumbulila ubuchindamu bwache. U Chala akafingana nabo nukubapa Indaghilo. Bali ni chiputo ichanaloli, sona bapokela vivyo u Chala akabalayizya.

⁵ Abene bo baluko aba banyenya bitu abamanyikwe aba Chihebeli, po ukuyana nizya buntu ubwa Kilisitu, akafuma mu luko lwabo. U Chala yuyo ali nu bulaghili pavintu vyosi achindikiwanje bwila na bwila. Ameni.

⁶ Kute kokuti u Chala akapotwa pakukwanilisya ilayizyo lyache. Awe, pakuti bate ba Izilayeli bosi, babo bantu ba Chala.

⁷ Kute kokuti abaluko losi ulwa Abulahamu bana ba Chala, awe. U Chala akamubuzya u Abulahamu akati, “Ukwendela mwa Yisaki mwene, ukwiza pakuba na baluko ukuyana namumo nkafingila nawe.”

⁸ Ichi chikung'anamula ukuti bate bana bosi aba Abulahamu babo bana ba Chala, awe. Loli abana babo bakapapiwa pachifukwa icha layizyo ilya Chala bakupimiwa ngati bo baluko ulwenecho.

⁹ Pakuti u Chala akalayizya akati, “Pakabalilo kanaka nkwiza sona, po u Sala akwiza pakuba nu mwana umulumendo.”

¹⁰ Sona chite cho chinichi chene, awe. Loli abana babili aba Labeka bakaba nu wise weka, yuyo munyenya witu u Yisaki.

¹¹ Loli bo amapasa ghala ghachili pakupapiwa, sona bo ghatabombitepo nachimo ichiza pamo ichibibi, u Chala akabomba bunubu ukuti ukusaliwa ukwa muntu weka kubanje ukayana namumo kukabatilikiwa. Po akasalile kache katakima pambombo izya muntu, loli kakima pakuti umwene akamwitizya umuntu yulayula.

¹² U Chala akamubuzya u Labeka akati, “Umukulu akwiza pakumubombela umuzuna.”

¹³ Pakuti Amasimbo ghakuti, “Nkamughana u Yakobo, loli nkamubenga u Esabu.”

¹⁴ Panapa tungati choni? Nkimba tunganena ukuti u Chala ate mugholosu? Awe, napo panandi.

¹⁵ U Mwene akamubuzya u Mozesi akati, “Nkwiza pakuba ni chisa pa muntu wesi yuyo nkumulonda, sona nkwiza pakumupelela ichililizi umuntu wesi yuyo nkumulonda.”

¹⁶ Polelo ivintu vyosi vyimite pachisa icha Chala mwene, pate pavintu vivyo umuntu akulonda pamo ukuyezya pakuvibomba.

¹⁷ Pakuti Amasimbo ghakunena kwa Falabo ghakuti, “Nkakupakazya pakuba we mwene ukuti nkubombele ukuti indanjizye amaka ghane, sona ukuti ufumusye itabwa lyane pachisu chosi ichapasi.”

¹⁸ Polelo u Chala ali ni chisa pa muntu wesi yuyo akumulonda, sona u Chala akughupela umoyo uwa muntu wesi pakuba mukafu ukuyana namumo u Chala umwenecho akulondela.

Nizya bukali ubwa Chala ni chisa chache

¹⁹ Loli umuntu yumo pakasi papinyu akwiza pakunena ukuti, “Nanti zili bunubu, nkimba choni chicho u Chala akubasusya abantu? Nkimba wewenu angakana ubwighane ubwa Chala?”

²⁰ Loli awe we muntu bulo, nkimba wewenu awe ukuti umwamule u Chala? Nkimba isonta yikumulalusyapo umumatasonta ukuti, “Choni chicho ukamata bunubu?”

²¹ Umumatasonta yula ali na maka pakubombezya itope ukuyana namumo akulondela, sona nukumata isonta zibili ni tope lilalila, yimo yakubombezya mumasikumumasiku, iyinji iyakubombezya isiku ni siku.

²² Umwakuyana bulo, wepe u Chala akalondagha pakulanjizya ubukali bwache, po akalondagha sona ukuti amaka ghache ghamanyikwe. Loli akabalanjizya abantu ubufisalyoyo bwache babo akabakalalila, sona babo bakabaghila pakuzimila.

²³ Sona akalondagha pakubuvumbula ubuchindamu bwache ubukulu, bubo akatupungulila twe bantu babo akaba naswe ni chisa, sona babo abayanizizya pakupokela ubuchindamu bwache.

²⁴ Pakuti twe bantu babo u Chala akatwitizya, tute mo mu ba Yuda bene, loli na bantu bope babo bate ba Yuda.

²⁵ Izi zyo zizyo akunena mwibuku ilya mulaghuzi u Hoseya ukuti, “Abantu babo batakaba bane nkwiza pakubitizya ukuti, ‘Bantu bane’. Uluko lulo lutakaba ulwa pamoyo wane nkwiza pakulwitizya ukuti, ‘Lughaniwa lwane’.

²⁶ Sona pabuzilo bulabula po papo bakabuziwa ukuti, ‘Amwe te mwe bantu bane,’ bakwiza pakwitiziwa ukuti, ‘Bana aba Chala umumi.’ ”

²⁷ U Yesaya akakolomoka nkani nizya ba Izilayeli akati, “Napapo aba Izilayeli bangaba binji nkani ngati musesenga uwa munyanja, loli abakusyalako bakwiza pakupokiwa.

²⁸ Pakuti u Mwene akwiza pakudumula inongwa izya bantu aba muchisu ichapasi umwalubilolubilo sona nukumalizizya zila.”

²⁹ Izi ziyanite bulo namumo umulaghuzi u Yesaya akanenela kale ukuti, “Nanti u Mwene Uwamaka Ghosi atakabalekapo abaluko bamo, ngali twaba ngati we Sodomu nu Gomola.”

U Pabuli akubiputila aba Izilayeli

³⁰ Po nkimba tungati choni? Tunganena ukuti abantu babo bate ba Yuda babo batakalondagha ukwinena bene pakuba bantu bagholosu pamaso pa Chala, ilelo baneniwa ukuti bantu bagholosu pantazi papache ukwendela mu lwitiko,

³¹ loli aba Izilayeli babo bakayezya nkani pakuneniwa bantu bagholosu pamaso pa Chala pakuzikonka Indaghilo, batakazyagha.

³² Po nkimba choni? Pachifukwa ichakuti bakalondagha ukwinena bene pakuba bagholosu pamaso pa Chala, chite chifukwa icha lwitiko, loli pachifukwa ichakuti bakasubila imbombo zizyo bakabombagha. Po bakipunula pibwe,

³³ ukuyana na Masimbo aghakuti, “Ennya, nkwala ibwe mu Ziyoni lilyo likwiza pakubapela abantu ukwipunula, ilyalabwe lilyo likwiza pakubawisya abantu. Loli umuntu wesi yuyo akusubila mumwache, atakwiza pakukoziwa isoni.”