Aba Loma 5 - IBAYIBOLO 2024

Twaneniwa ukuti twe bantu bagholosu pamaso pa Chala

¹ Ilelo pakuti twaneniwa ukuti twe bantu bagholosu pamaso pa Chala ukwendela mu lwitiko, tuli nu mutende nu Chala ukwendela mwa Yesu Kilisitu u Mwene witu.

² Ukwendela mumwache atwighulila izila ukwendela mu lwitiko ukuti tuchimanye ichisa icha Chala, chicho tuli nacho losi ulu. Po zagha tusekelaye, bo tukulindilila ukugabana nabo ubuchindamu ubwa Chala.

³ Loli ukuchilapo pazinizi, zagha tusekelaye sona pachifukwa icha mayimba ghitu pakuti tuzimenye ukuti amayimba ghakumumanyisya umuntu pakuba mufisalyoyo,

⁴ ubufisalyoyo bukumumanyisya umuntu pakuba ni nkalo inyiza, sona inkalo inyiza yikumumanyisya umuntu pakuba nu lusubilo.

⁵ Ulusubilo ulu lutakutukozya isoni, pachifukwa ichakuti u Chala pakwendela mu Muzimu Umuzelu, yuyo akatupa, akizuzya amoyo ghitu nu lughano lwache.

⁶ Bo tuchili tuli badedebazu, u Kilisitu akabafwila abantu ababibi pakabalilo akiza kako u Chala umwenecho akakasala.

⁷ Chintu chipala nkani ukuti umuntu amufwile umuntu yumo, napapo umuntu yula mugholosu. Pamo angabapo yumo yuyo angalonda ukuti mupaka amufwile umuntu umwiza.

⁸ Loli u Chala atulanjizya namumo atughaniye aswe pakuti u Kilisitu akatufwila bo tuchili twe bambibi.

⁹ Pakuti ukwendela mwibanda lyache, twaneniwa ukuti twe bantu bagholosu pamaso pa Chala. Po naloli tukwiza pakupona u bukali ubwa Chala ukwendela mumwache.

¹⁰ Pakuti tukaba balwani aba Chala, loli akasayana naswe ukwendela mu bufwe ubwa Mwana wache. Pakuti ilelo twaba bamanyani aba Chala, naloliloli tukwiza pakupokiwa ukwendela mubumi ubwa Kilisitu!

¹¹ Loli ukuchilapo pazinizi, tukusekela pachifukwa icha zizyo u Chala abomba ukwendela mwa Mwene witu u Yesu Kilisitu, yuyo ilelo atusayannya aswe nu Chala.

Nizya Adamu nu Kilisitu

¹² Polelo ukuyana namumo imbibi yikizila muchisu ichapasi ukwendela mumuntu weka, sona nu bufwe ukwendela mu mbibi, momumo bope ubufwe bukiza pabantu bosi pakuti abantu bosi banangite.

¹³ Imbibi yikabamo muchisu ichapasi bo Indaghilo zitapeghiwe. Loli nanti Indaghilo zitalipo, u Chala atangazibelengelapo imbibi.

¹⁴ Loli ukwandila pakabalilo aka Adamu mupaka pakabalilo aka Mozesi, ubufwe bukaba nu bulaghili pabantu bosi, sona na pabantu bulo babo batakananga ukuyana namumo u Adamu akabombela pakusita ukukonka amalamulo agha Chala. U Adamu akaba chifwanikizyo icha yuyo akizagha.

¹⁵ Loli babili banaba batayanite, pakuti ichabupi ichabulo icha Chala chitayanite nukunanga ukwa Adamu. Momumo ukuti abantu abinji bakafwa pachifukwa icha kunanga ukwa muntu weka yula. Loli ichisa icha Chala chikulu nkani, sona ni chabupi ichabulo icha bantu abinji ukwendela muchisa icha muntu weka, u Yesu Kilisitu.

¹⁶ Pali ukulekana pakasi pachabupi icha Chala nukunanga ukwa muntu weka. Bo umuntu weka yula ananga lyoka, u Chala akadumula ukuti afundiwe. Loli ichabupi ichabulo icha chisa icha Chala chakuti abantu baneniwe pakuba bagholosu pamaso pa Chala napapo imbibi zyabo zikaba nyinji.

¹⁷ Momumo ukuti pachifukwa icha kunanga muntu weka ubufwe bukanda pakuba nu bulaghili pachifukwa icha muntu weka yula. Loli umuntu weka, u Yesu Kilisitu akabomba ivintu ivikulu nkani, umwakuti abantu bosi babo bakapokela ichisa icha Chala nukuneniwa ukuti twe bagholosu pamaso papache, bakwiza pakuba nubumi, sona nu bulaghili ukwendela mwa Kilisitu.

¹⁸ Po ukuyana namumo imbibi iya muntu weka yikabapelela abantu bosi ukuti bafundiwanje, umwakuyana bulo, yope imbombo iya bugholosu iya muntu weka yikubanena abantu bosi pakuba bagholosu pamaso pa Chala nukubapa ubumi.

¹⁹ Pakuti ukuyana namumo abantu abinji bakabila bambibi pachifukwa ichakusita kwivwila ukwa muntu weka, umwakuyana bulo, abantu abinji bakwiza pakuneniwa ukuti bagholosu pamaso pa Chala pachifukwa icha kwivwila ukwa muntu weka.

²⁰ Indaghilo zikapeghiwa ukuti imbibi zyonjelele, loli kuko imbibi zikonjelela, ichisa icha Chala chope chikonjelela nkani.

²¹ Po ukuyana namumo imbibi zikaba nu bulaghili pachifukwa icha bufwe, momumo ichisa icha Chala chibanje nu bulaghili ukwendela mubugholosu ukutulongozezya aswe ku bumi ubwa bwila na bwila ukwendela mwa Yesu Kilisitu, u Mwene witu.