Aba Loma 16 - IBAYIBOLO 2024

U Pabuli akubalamuka abitiki

¹ Nkumubika u Febe, umuyemba witu munyobe zyinyu, sona yuyo mubombi uwa chipanga icha mu Kenkeleya.

² Mumupokele akiza mwitabwa ilya Mwene, ukuyana namumo abantu abazelu aba Chala babaghiye pakubombela, sona mumwavwe ni vintu vivyo akusobelwa navyo pakuti umwene akabavwa abantu abinji poka nane bulo.

³ Mundamukileko u Pulisika nu Akwila, ababombi abamwitu mumbombo iya Kilisitu u Yesu,

⁴ babo bakabika ubumi bwabo pachulu ukuti bampoke ane. Inte nene nemwene nkubapalizya, awe, loli ni vipanga vyosi ivya bantu babo bate ba Yuda.

⁵ Mundamukileko sona na bantu babo bakukomana munyumba zyabo pakwiputa. Mundamukileko umughaniwa wane u Epaneta, yuyo akaba muntu wakwanda muchigaba icha Asiya pakumusubila u Kilisitu.

⁶ Mundamukileko u Maliya, yuyo akiyula nkani pakubabombela amwe.

⁷ Mundamukileko sona nu Andoloniko nu Yuniya, babo bakaba poka nane mujele. Abene bantu bamanyikwe nkani pakasi pa batumiwa, sona bakaba bakwanda pakuba bakilisitu, bo nane inchili.

⁸ Mundamukileko u Ampiliyati, umughaniwa wane mwa Mwene.

⁹ Mundamukileko sona nu Ulubana, umubombi uwamwitu mumbombo iya Kilisitu, sona nu Sitaki, yuyo mughaniwa wane.

¹⁰ Mundamukileko u Apele, yuyo muntu umusubiliwa nkani pambombo iya Kilisitu; mundamukileko abamunyumba iya Alisitobula.

¹¹ Mundamukileko u Helodiyoni, umukamu wane. Mundamukileko abakilisitu bosi abamunyumba iya Nalikisi, babo bantu ba Mwene.

¹² Mundamukileko u Tilifena nu Tilifosa, abakolo babo bakwiyula nkani pambombo iya Mwene. Mundamukileko umughaniwa wane u Pelesi, umukolo yuyo iyula nkani pambombo iya Mwene.

¹³ Mundamukileko u Lufu, umusaliwa uwa Mwene, sona nu nyina, yuyo ali ngati we mayi wane.

¹⁴ Mundamukileko u Asinkilita, nu Filegoni, nu Helemesi, nu Patiloba, nu Helima, sona na bakamu bosi babo bali poka nabo.

¹⁵ Mundamukileko u Filologa nu Yuliya, sona mundamukileko u Neliya nu muyemba wache, sona nu Olimpa, poka na bantu abazelu aba Chala bosi babo bali poka nabo.

¹⁶ Mulamunkanaye mwebene pakulanjizya ulughano ulwenecho. Ivipanga vyosi ivya Kilisitu vikubalamuka.

Ukulayizya ukwabumalilo

¹⁷ Mwee bakamu bane, nkubalaba ukuti muchebaye na bantu babo bakubagabannya abantu, sona na babo bakubika ivipunulo muzila zyinyu pakumanyisya ivimanyisyo vivyo vilekanite na vivyo mukamanyisiwa. Epako kukwabo!

¹⁸ Pakuti abantu banaba batakumubombela u Mwene witu u Kilisitu, loli bakuvibombela ivinyonywa vyabo. Sona na mazyu ghabo manoni, sona mazimbuli bakubazimbula abantu babo batamenye nachimochimo.

¹⁹ Abantu bosi bivuye nizya kwivwila kwinyu, po ane nahoboka nkani pachifukwa icha mwemwe. Loli nkulonda ukuti mubanje bamahala pachintu chicho chiza, sona nukuti mutakinong'onelayeko ni mbibi.

²⁰ Po u Chala umwenecho uwa mutende akwiza pakumusya u Satana ni nyayo zyinyu. Ichisa icha Mwene witu u Yesu Kilisitu chibanje namwe.

²¹ U Timoti, umubombi uwamwitu, akubalamuka. U Lusiyasi nu Yasoni, sona nu Sosipateli, aba Yuda abamwitu bope bakubalamuka.

²² Ane ne Telitiyo, umusimbi bulo uwa kalata uyu, nkubalamukila mwa Mwene.

²³ Wepe nu Gayi bulo, yuyo ampokelite ane poka ni chipanga chosi munyumba yache, akubalamuka. U Elasita, umusungi uwa ndalama izya kaya akakulu nkani, sona nu mukamu witu u Kwaliti bakubalamuka.

Amapalo aghabumalilo

²⁵ U Chala achindikiwanje. Ali na maka pakubakazya mulwitiko lwinyu, ukuyana na Mazyu Amiza agha Yesu Kilisitu ghagho nalumbilila, sona ukuyana nu buvumbuli ubwa vintu izyakubusyefu vivyo vikafisiwa ukwanda kale.

²⁶ Loli, ilelo vyavumbuliwa pabuzelu ukwendela mu masimbo agha balaghuzi; sona ukwendela mu malamulo agha Chala uwa bwila na bwila vyavumbuliwa ku bantu abaluko losi, umwakuti basubile nukwivwila.

²⁷ Kwa Chala mwene, yuyo we Chala uwamahala ghosi, kubanje ubuchindamu bwila na bwila ukwendela mwa Yesu Kilisitu! Ameni.