Aba Loma 13 - IBAYIBOLO 2024

Nizya kubivwila abalaghili aba muchisu

¹ Umuntu wesi abivwilaye abalaghili aba muchisu pakuti umuntu atangaba mulaghili nanti u Chala atamwimikite. Abalaghili bosi babo baliko bakimikiwa nu Chala.

² Polelo umuntu wesi yuyo akususannya na balaghili banaba, akususannya na chicho u Chala akalamula. Sona umuntu wesi yuyo akubomba bunubu akwiza pakwipelela mwene ubulongi.

³ Abalaghili batakuboghofya abantu babo bakubomba inyiza, loli abantu babo bakubomba ububibi. Nkimba ukulonda pakuba muntu yuyo atakubanyila abalaghili? Bomba chicho chiza, po bakwiza pakukupala,

⁴ pakuti bo babombi aba Chala, babo bakubalongozya pakubomba inyiza. Loli nanti ukubomba ichibibi, po ubanyilaye pakuti amaka ghabo aghakufundila ghanaloli.

⁵ Pachifukwa ichi mubaghiye pakubivwila abalaghili, kute kokuti mukubunyila ubukali ubwa Chala bwene, awe, loli ni chifukwa icha mabyebye winyu bulo.

⁶ Ichi cho chifukwa mukusonka umusonko, pachifukwa ichakuti abalaghili balabala bakumubombela u Chala, bo bakubomba imbombo yabo.

⁷ Po mumulipile umuntu wesi vivyo vimubaghiye: Nanti gho musonko, musonke; nanti gho musonko uwa katundu, musonke ukatundu; nanti umuchizi pamo amapalo vipeghiwe ku bantu babo vibabaghiye.

Nizya kubombelana

⁸ Mutakabanje ni nkongole nu muntu, loli inkongole yibanje iya lughano. Pakuti umuntu wesi yuyo akumughana uwamwabo, akuzikonka Indaghilo.

⁹ Pakuti pali amalamulo aghakuti, “Utakalowaye, utakaghoghaye, utakibaye, utakanyonywanje” na malamulo ghosi aghanji ghonganite pilamulo lyoka ilyakuti, “Umughane umupalamani wako ukuyana namumo wiyighaniye wemwenecho.”

¹⁰ Nanti umuntu amughana uwamwabo, atangamubombela nachimo ichibibi. Ichi cho chifukwa nanti umuntu akumughana uwamwabo, kokuti akuzikonka Indaghilo zyosi.

¹¹ Mubaghiye pakubomba zinizi, pakuti muzimenye ukuti akabalilo kakwana akakuti mulamusye mutulo. Pakuti akabalilo akakupokeliwa kali papipi nkani ukuchila akabalilo kako tukandilagha pakusubila.

¹² Ubusiku buli papipi pakumala, umusanya ghuli papipi pakwanda. Po zagha tuzileke imbombo izya muchisi. Zagha tuvwale ivilwilo ivya bwite ivyakulwila pamusanya.

¹³ Zagha tulanjizye inkalo inyiza ukuyana na bantu babo bakwenda mu lukozyo ulwa musanya. Tutakabe bantu bapafu pamo baching'wela, tutakabe bamalaya pamo bapopo, tutakabe balombwa pamo bakabini.

¹⁴ Loli umwenecho u Mwene u Yesu Kilisitu abanje chilwilo chinyu icha bwite, sona mutakakonkaye ivinyonywa vyinyu ivibibi ivyakupapiwa navyo, nukubomba vivyo ghakulonda.