Aba Loma 10 - IBAYIBOLO 2024

¹ Mwee bakamu bane, chicho nkulonda nkani nu moyo wane ghosi, sona nkwiputa nkani kwa Chala chakuti aba Izilayeli bangapokiwa!

² Nkubasimikizizya ukuti bipiye nkani pavintu ivya Chala, loli ukwiyipa kwabo kute kwa mahala.

³ Batazimenye mumo u Chala akubanenela abantu pakuba bagholosu pantazi papache, loli bakuyezya pakubika izila izinji, po batakwibikila bene izila yiyo u Chala akubanenela abantu pakuba bagholosu pantazi papache.

⁴ Pakuti u Kilisitu amalizya Indaghilo, umwakuti umuntu wesi yuyo akusubila aneniwanje pakuba mugholosu pamaso pa Chala.

Ubupoki bwa bantu bosi

⁵ Pakunena nizya mumo abantu bakuneneliwa pakuba bagholosu pamaso pa Chala ukwendela mu Ndaghilo, u Mozesi akasimba akati, “Umuntu wesi yuyo akukonka Indaghilo, akwiza pakuba nubumi ukwendela mu Ndaghilo zilazila.”

⁶ Loli pakunena nizya mumo u Chala akubanenela pakuba bagholosu pantazi papache ukwendela mu lwitiko, Amasimbo ghakuti, “Utakilalusye wemwene ukuti, ‘Nkimba wewenu yuyo angakwela kumwanya?’ ” (Kokuti ukumwisya pasi u Kilisitu ukufuma kumwanya.)

⁷ “Pamo ukuti, ‘Nkimba wewenu angikila muchibanka ichibizu nkani?’ ” (Kokuti ukumuzyusya u Kilisitu kubuzilo ubwa bantu abafwe.)

⁸ Loli chicho nkunena cho ichi, “Amazyu agha Chala ghali papipi namwe, pamalomo ghinyu, sona na mumoyo ghinyu.” Kokuti amazyu agha lwitiko ghagho tukulumbilila.

⁹ Nanti ukwitika nu mulomo wako ukuti u Yesu we Mwene, sona nukuti ukusubila ukuti u Chala akamuzyusya kubufwe, ukwiza pakupokiwa.

¹⁰ Pakuti u Chala akumunena umuntu pakuba mugholosu pantazi papache, yuyo akusubila mumoyo wache, sona umuntu akupokiwa nanti akwitika nu mulomo wache.

¹¹ Amasimbo ghakuti, “Umuntu wesi yuyo akusubila mumwache, atakwiza pakukoziwa isoni.”

¹² Pakuti butalipo ukulekana pakasi paba Yuda na bantu babo bate ba Yuda. U Chala we Mwene uwa bosi, sona akubasaya nkani abantu bosi babo bakwitizya kukwache.

¹³ Pakuti Amasimbo ghakuti, “Umuntu wesi yuyo akulabila mwitabwa ilya Mwene akwiza pakupokiwa.”

¹⁴ Po nkimba abantu bangamwitizya bulibuli yuyo batamusubiye? Sona bangasubila bulibuli, nanti bativuyepo amazyu? Sona bangivwa bulibuli amazyu, nanti amazyu ghatakulumbililiwa kukwabo?

¹⁵ Po amazyu ghangalumbililiwa bulibuli nanti abalumbilili batakutumiwa? Pakuti Amasimbo ghakuti, “Bo bwiza boni ubwa muntu yuyo akwiza na mazyu amiza.”

¹⁶ Loli bate bantu bosi babo bakapokela Amazyu Amiza. Umulaghuzi u Yesaya akati, “Mwene, wewenu akasubila amazyu ghagho tukalumbilila?”

¹⁷ Po ulwitiko lukwiza bo umuntu ivwa amazyu, sona umuntu akwivwa amazyu pakulumbilila nizya Kilisitu.

¹⁸ Loli imbalalusye: Nkimba kokuti aba Izilayeli batakivwa Amazyu Amiza? Naloli bakaghivwa pakuti Amasimbo ghakuti, “Izyu lyabo likivwika pachisu chosi ichapasi, amazyu ghabo ghakafika mupaka kubumalilo ubwa chisu ichapasi.”

¹⁹ Imbalalusye sona: Nkimba kokuti aba Izilayeli batakivwisya? U Mozesi akaba wakwanda pakwamulapo ukuti, “Nkwiza pakubapela pakuba bantu abakabini pakubombela uluko lulo lute luko lwenecho. Nkwiza pakubakalalizya pakubombela uluko lulo lupunganu.”

²⁰ Sona u Yesaya akanena nu bujivu nkani akati, “Nkaghiwa na babo batakandondagha. Nkababonekela babo batakandaba.”

²¹ Loli nizya ba Izilayeli akati, “Umusanya ghosi nkagholosya inyobe zyane pakubapokela abantu babo batakanyivwilagha, sona na babo bakansambukila.”