Aba Levi 9 - IBAYIBOLO 2024

U Aloni akubika ivyakwiyipa

¹ Pisiku ilya eyiti, u Mozesi akamwitizya u Aloni na bana bache, poka na balongozi aba ba Izilayeli.

² U Mozesi akamulamula u Aloni akati, “Usende ingwata inyanavuli yiyo yite ni chilema nachimochimo ukuti chibanje chakwiyipa ichakupepesezya imbibi, sona nu dubi umusita chilema ukuti chibanje chakwiyipa ichakocha kwa Mwene.

³ Po ubabuzye aba Izilayeli uti, ‘Musende usabwe ukuti chibanje chakwiyipa ichakupepesezya imbibi. Musende sona ingwata inyanavuli iya mwaka ghoka yiyo yite ni chilema nachimochimo, sona nu mwana uwa ng'ozi uwa mwaka ghoka umusita chilema ukuti chibanje chakwiyipa ichakocha.

⁴ Musende sona inkambaku nu dubi ukuti chibanje chakwiyipa ichabupoka. Musende ichakwiyipa icha busu ichakongannya na mafuta nukuchibika kwa Mwene, pakuti umusanya ughu u Mwene akwiza pakubabonekela.’ ”

⁵ Abantu bala bakiza pantazi pa Chisakasa icha Mwene ni vintu vyosi, vivyo u Mwene akamulamula u Mozesi. Po ichilundilo chosi chikapalamila nukwimilila palapala pamaso pa Mwene.

⁶ U Mozesi akati, “Ivi vyo vivyo u Mwene akubalamula ukuti mubombaye, umwakuti ubuchindamu bwache bubabonekele.”

⁷ Po u Mozesi akamubuzya u Aloni akati, “Palamila kupipi kuchighemo nukubika ichakwiyipa ichakupepesezya imbibi, ni chakwiyipa ichakocha ukuti chibanje chakupepesezya imbibi zyako, sona nizya bantu. Bika ichakwiyipa ichakupepesezya imbibi izya bantu, ukuyana namumo u Mwene akalamulila.”

⁸ Po u Aloni akapalamila kupipi kuchighemo nukubola ingwata inyanavuli yila ukuti yibanje chakwiyipa ichakupepesezya imbibi zyache.

⁹ Abana bache bakamupa ibanda, po u Aloni akadwibika akafingwi kache mwibanda lila nukulipaka pampembe izya chighemo. Akapungulila ibanda ilyakusyala lila mubwikalilo ubwa chighemo.

¹⁰ Amafuta, ni figho ni chigaba ichiza nkani icha itima, vivyo vikaba chakwiyipa ichakupepesezya imbibi akavyochela pachighemo ukuyana namumo u Mwene akamulamulila u Mozesi.

¹¹ Loli inyama nikwela lyache akavyochela kuzi ukwa visakasa.

¹² Pisinda pache akabola udubi uwa chakwiyipa ichakocha yula. Abana bache bakamupa ibanda, po u Aloni akalinyafila ibanda lila mumbazu zyosi folo izya chighemo.

¹³ Bakamupa ivipuza ivya chakwiyipa ichakocha chila poka nu mutu, po akavyocha pachighemo pala.

¹⁴ Akasuka na mizi amala ni vinama nukuvyocha pachighemo ukuti chibanje chakwiyipa ichakocha.

¹⁵ Pisinda pache u Aloni akabika ichakwiyipa icha bantu chila. Akasenda imbuzi nukuyibola, po akayibika ukuyana namumo akabikila ichakwiyipa ichakwanda ichakupepesezya imbibi zyache.

¹⁶ Po akiza ni chakwiyipa ichakocha nukuchibika ukuyana nu lulaghilo lwache.

¹⁷ Akiza sona ni chakwiyipa icha busu, po akasenda ichikufi nukubocha pachighemo ukonjelezyapo pa chakwiyipa ichakocha icha pandabindabi chila.

¹⁸ U Aloni akayibola inkambaku nu dubi pakuba ichakwiyipa ichabupoka icha bantu. Abana bache bakamupa ibanda, po akalinyafila mumbazu zyosi folo izya chighemo.

¹⁹ Po u Aloni akabika ichigaba icha mafuta agha nkambaku nagha dubi na mafuta agha musinda na mafuta ghagho ghamamatiye amala ni figho ni chigaba ichiza nkani icha itima,

²⁰ pamwanya pa tujimbi tula nukocha amafuta pachighemo.

²¹ U Aloni akatuzyunguzya mumwanya utujimbi tula poka ni chinama icha ndilo pamaso pa Mwene, ukuti chibanje chakwiyipa ichakuzyunguzya mumwanya ukuyana namumo u Mozesi akalamulila.

²² Bo u Aloni amala pakubika ichakwiyipa ichakupepesezya imbibi, ni chakwiyipa ichakocha, sona ni chakwiyipa ichabupoka, akakwezya inyobe zyache mumwanya pakubasaya abantu. Po akika pachighemo pala.

²³ U Mozesi poka nu Aloni bakinjila mu Chisakasa icha Mwene. Bo bepamo, bakabasaya abantu bala, po ubuchindamu ubwa Mwene bukababonekela abantu bosi.

²⁴ Panapo na panapo u Mwene akatuma umoto nukocha ichakwiyipa ichakocha chila, ni vipuza ivya mafuta pachighemo pala. Bo abantu bosi bawennya umoto ghula, bakakolomoka nukufughama pakumwiputa u Mwene.