Aba Levi 8 - IBAYIBOLO 2024

Ukwimikiwa ukwa Aloni na bana bache

¹ U Mwene akamubuzya u Mozesi akati,

² “Wize nu Aloni na bana bache pamulyango uwa Chisakasa icha Mwene poka na menda ghabo na mafuta aghakupakazya ni nkambaku iyakupepesezya imbibi na badubi babili sona ni chidudunga icha vibama vivyo vite ni chilungo.

³ Po uchibungannye ichilundilo chosi pamulyango uwa Chisakasa icha Mwene.”

⁴ U Mozesi akabomba zizyo u Mwene akamulamula, po ichilundilo chosi chikabungana,

⁵ u Mozesi akachibuzya ichilundilo akati, “Ivi vyo vivyo u Mwene akandamula pakuvibomba.”

⁶ Po u Mozesi akiza nu Aloni na bana bache kuntazi nukubasukuzya na mizi.

⁷ Akamuvwika u Aloni ilaya nukumupinya nu lamba mumusana. Akamuvwika inkazo nu efodi nukumupinya sona mumusana nu lamba umulabannye akiza nkani.

⁸ Akamuvwika ichakuvwala pachifuba nukubikamo u Ulimu nu Tumimu.

⁹ Akamuvwika impumpu kumutu wache nukubika kuntazi kwache intepa iya golide pakuba chimanyilo ichipaghuliwa ngati mumo u Mwene akamulamulila u Mozesi.

¹⁰ Po u Mozesi akasenda amafuta aghakupakazya nukuchipakazya Ichisakasa icha Mwene, na vyosi vivyo vikaba mumo, po bunubu akavipaghulila vyosi kwa Mwene.

¹¹ Akaghanyafila ghamo amafuta akaseveni pachighemo na pavibombelo vyache, ni beseni poka nu bwikalilo bwache umwakuti vibanje vipaghuliwa kwa Mwene.

¹² Akamupungulila u Aloni amafuta ghamo aghakupakazya pamutu wache ukuti amupaghule.

¹³ Pisinda pache u Mozesi akiza na bana aba Aloni pantazi nukubavwika inkazo, akabapinya abalamba mumisana yabo, nukubavwika ivipewa kumitu yabo ukuyana namumo u Mwene akamulamulila.

¹⁴ Po u Mozesi akiza ni nkambaku ukuti yibanje chakwiyipa ichakupepesezya imbibi. U Aloni na bana bache bakabika inyobe zyabo pamutu uwa nkambaku yila.

¹⁵ U Mozesi akayibola inkambaku yila, akasenda ibanda limo na kafingwi kache nukulipaka pampembe izya chighemo pakuchiswefya. Akakupulila ibanda lyosi ilyakusyala pabwikalilo ubwa chighemo. Bunubu u Mozesi akabika ichakwiyipa ichakupepesezya imbibi.

¹⁶ U Mozesi akasenda amafuta ghosi ghagho ghamamatiye amala ni chigaba ichiza nkani icha itima ni figho zyosi zibili poka na mafuta ghache nukuvyocha vyosi pachighemo.

¹⁷ Loli uyoche inyama iya nkambaku yila nikwela lyache ni nyama yache sona na mala ghache nukuvyocha kuzi ukwa visakasa ukuyana namumo u Mwene akamulamulila u Mozesi.

¹⁸ Pisinda pache akiza nu dubi uwa chakwiyipa ichakocha, po u Aloni na bana bache bakabika inyobe zyabo pamutu uwa dubi yula.

¹⁹ Po u Mozesi akamubola udubi yula nukulinyafila ibanda lyache mumbazu zyosi folo izya chighemo.

²⁰ Akamudumulannya udubi muvipuzavipuza, po akocha umutu, ni vipuza vyosi vila, sona na mafuta ghache.

²¹ U Mozesi akasuka amala ni vinama nukumocha udubi wesi yula pachighemo pakuba chakwiyipa ichakocha ukuyana namumo u Mwene akamulamulila. Umunusi uwa chakwiyipa chinichi ghukamuhobosya u Mwene.

²² Po u Mozesi akasenda udubi uyunji uwakubimikila abaputi, sona u Aloni na bana bache bakabika inyobe zyabo pamutu uwa dubi yula.

²³ U Mozesi akamubola udubi yula, po akusenda ibanda limo na kafingwi kache nukulipaka kubumalilo ubwa ikutu ilyandilo ilya Aloni, na pamusumwe uwa nyobe yache iya ndilo, sona numusumwe uwa lwayo lwache ulwa ndilo.

²⁴ Po akiza na bana aba Aloni pantazi nukupaka ibanda limo kubumalilo ubwa makutu ghabo agha ndilo, na pamusumwe wabo uwa nyobe indilo, sona numusumwe wabo uwa lwayo ulwa ndilo. U Mozesi akalinyafila ibanda ilyakusyala mumbazu zyosi folo izya chighemo.

²⁵ Pisinda pache akasenda amafuta na mafuta agha musinda na mafuta ghosi ghagho ghamamatiye amala ni chigaba ichiza nkani icha itima ni figho zyosi zibili poka na mafuta ghache sona ni ntapatapa indilo.

²⁶ Po akasenda ichibama choka chicho chite ni chilungo muchidudunga mula chicho chikaba pamaso pa Mwene, ni chibama choka chicho chipakiwe na mafuta sona ni chitumbuwa choka ichipapate nukuvibika vyosi pamwanya pa mafuta ghala sona na pantapatapa iya chinama icha ndilo yila.

²⁷ Akavibika vyosi vinivi munyobe izya Aloni na bana bache, umwakuti vibanje chakwiyipa ichakuzyunguzya mumwanya pamaso pa Mwene.

²⁸ Pisinda pache u Mozesi akefyamo munyobe zyabo nukuvyocha pachighemo pamwanya pa chakwiyipa ichakocha ukuti chibanje ichakubimikila abaputi. Umunusi uwa chakwiyipa chinichi ghukamuhobosya u Mwene.

²⁹ Po u Mozesi akasenda akajimbi aka dubi yula akakumwimikila u Aloni pamaso pa Mwene ukuti chibanje chakwiyipa ichakuzyunguzya mumwanya, ukuyana namumo u Mwene akamulamulila u Mozesi. Ichigaba chinichi icha dubi uwakubimikila abaputi chikaba cha Mozesi.

³⁰ U Mozesi akasenda amafuta aghakupakazya ghala sona ni banda limo pachighemo nukumunyafila u Aloni na bana bache na menda ghabo. Bunubu u Mozesi akamupaghula u Aloni poka na menda ghache na bana bache poka na menda ghabo.

³¹ U Mozesi akamubuzya u Aloni na bana bache akati, “Mupiye inyama pamulyango uwa Chisakasa icha Mwene nukuyilyela palapala poka ni vibama vivyo vili muchidudunga ichakubimikila abaputi, ukuyana namumo u Mwene akalamulila ukuti u Aloni na bana bache balyanje.

³² Mulungulizye inyama yosi poka ni vibama.

³³ Mutakepepo pamulyango uwa Chisakasa icha Mwene ukwa masiku seveni mupaka amasiku aghakubimikila kwinyu ghamale, pakuti ukwimikiwa kwinyu kukwiza pakumala bo ghachilapo amasiku seveni.

³⁴ Ichintu chicho chabombiwa umusanya ughu, cho chicho u Mwene akatulamula pakubomba, ukuti chibanje chakwiyipa ichakupepesezya imbibi.

³⁵ Mwikalaye pamulyango uwa Chisakasa icha Mwene amasiku seveni, umusanya nu busiku, sona mubombaye zizyo u Mwene akubalamula. Nanti mutakubomba zinizi, mukwiza pakufwa pakuti ichi cho chicho u Mwene akandamula.”

³⁶ Po u Aloni na bana bache bakabomba zyosi zizyo u Mwene akamulamula u Mozesi.