Aba Levi 7 - IBAYIBOLO 2024

Ichakwiyipa ichakupepesezya inongwa

¹ “Ulu lo lulaghilo ulwa chakwiyipa ichakupepesezya inongwa, pakuti ichi cho chakwiyipa ichizelu nkani.

² Ichakwiyipa ichakupepesezya inongwa chiboleliwe pabuzilo bubo ichakwiyipa ichakocha chikuboleliwapo, sona balinyafile ibanda lyache mumbazu zyosi folo izya chighemo.

³ Umuputi abike amafuta ghosi pachighemo pala poka na mafuta agha musinda na mafuta ghagho ghamamatiye amala

⁴ ni figho zyosi zibili na mafuta ghache sona ni chigaba ichiza nkani icha itima chicho akefezya poka nifigho.

⁵ Umuputi avyoche vyosi pachighemo, ukuti chibanje chakwiyipa ichakocha pamoto kwa Mwene. Ichi cho chakwiyipa ichakupepesezya inongwa.

⁶ Umwanavuli wesi uwa munyumba iya buputi angalyako ichakwiyipa chinichi, loli achilyele Mubuzilo Ubuzelu, pakuti ichi cho chakwiyipa ichizelu nkani.

⁷ “Ichakwiyipa ichakupepesezya inongwa chiyanite bulo ni chakwiyipa ichakupepesezya imbibi, sona ivyakwiyipa vyosi vibili vinivi vili nu lulaghilo loka. Inyama yiniyi yikuba ya muputi yuyo akubika ichakwiyipa chinichi.

⁸ Ikwela ilya chakwiyipa ichakocha libanje ilya muputi, yuyo akubika ichakwiyipa chinichi.

⁹ Ichakwiyipa chosi icha busu, chicho chipiyiwe musonta pamo chikazingiwe bulo mu sefuliya, chibanje cha muputi yuyo akubika ichakwiyipa chinichi.

¹⁰ Loli ichakwiyipa chosi icha busu manyi chakongannya na mafuta manyi chumizu abamunyumba iya Aloni babo baputi bagabane umwakuyana bulo.

Ichakwiyipa ichabupoka

¹¹ “Ulu lo lulaghilo ulwa ichakwiyipa ichabupoka chicho umuntu angabika kwa Mwene:

¹² “Nanti umuntu akubika ichakwiyipa pachifukwa ichakuti akumupalizya u Chala, abike poka ni chakwiyipa chache ichakupalizikizya chila, ichibama chicho chite ni chilungo, pamo ichibama ichakongannya na mafuta, pamo utumenyumenyu utwa vibama ivyakupakiwa na mafuta, pamo ichibama icha busu ubwakongannya na mafuta.

¹³ Pamwanya apa ichakwiyipa chila, abikepo ichibama choka icha chilungo.

¹⁴ Asende ichibama choka ukuti chibanje cha Mwene, ichigaba chinichi chibanje cha muputi yuyo akunyafila ibanda ilya chakwiyipa ichabupoka.

¹⁵ Inyama iya chakwiyipa ichabupoka ichakupalizikizya yilyeliwanje pisiku lilyo ichakwiyipa chinichi chikubikiwa. Yitakasyalepo nayimoyimo mupaka pandabindabi.

¹⁶ “Loli nanti umuntu yula abika ichakwiyipa chinichi pachifukwa icha chilapo chache, pamo pachifukwa ichakwiyipa mubwighane bwache, ichakwiyipa chilachila achilye pisiku ilyakubikila, loli ubwika angabulya pisiku ilinji.

¹⁷ Inyama yosi iyakusyala pa chakwiyipa chinichi mupaka pisiku ilyabutatu, yilunguziwanje pamoto.

¹⁸ Nanti inyama iya ichakwiyipa ichabupoka yikulyeliwa pisiku ilyabutatu, u Mwene atakwiza pakuyipokela. Ichakwiyipa chinichi chitangamwavwa umuntu yula, sona chikwiza pakuba chinyazu. Umuntu wesi yuyo akulya ichakwiyipa chinichi akwiza pakuba ni nongwa.

¹⁹ “Inyama yiyo yapalamasya ichintu ichinyazu, yitakalyewanje, loli yilunguziwanje pamoto. Umuntu wesi yuyo muzelu pamaso pa Chala angalya inyama iya ichakwiyipa chinichi.

²⁰ Loli nanti umuntu umunyazu akulya inyama iya chakwiyipa ichabupoka kwa Mwene, umuntu yulayula epusiwanjepo pakasi paba Izilayeli.

²¹ Nanti umuntu apalamasya ichintu ichinyazu manyi bo bunyazu ubwa muntu manyi ubwa chinyamana pamo ubunyazu ubwakulekanalekana, po akulya inyama iya ichakwiyipa ichabupoka kwa Mwene, umuntu yulayula epusiwanjepo pakasi paba Izilayeli.”

²² U Mwene akamubuzya u Mozesi akati,

²³ “Ubalamule aba Izilayeli ukuti batakalyanje amafuta agha ng'ombe pamo agha ng'ozi pamo agha mbuzi.

²⁴ Amafuta agha chinyamana ichifwe chene pamo ichakulika ghangabombeziwa imbombo iyinji, loli mutakalye amafuta ghalaghala.

²⁵ Umuntu wesi yuyo akulya amafuta agha nyama iya ichakwiyipa ichakocha pamoto kwa Mwene, epusiwanjepo pakasi paba Izilayeli.

²⁶ Kosi kuko mukwikala, nayumo umuntu pakasi papinyu atakalyanje ibanda nalimolimo manyi lya chiyuni manyi lya chinyamana.

²⁷ Umuntu wesi yuyo akulunangannya ululaghilo lunulu, epusiwanjepo pakasi paba Izilayeli.”

²⁸ U Mwene akamubuzya u Mozesi akati,

²⁹ “Ubalamule aba Izilayeli uti, ‘Umuntu wesi yuyo akubika ichakwiyipa ichabupoka kwa Mwene, abike ichigaba chache chimo ichakwiyipa chila kwa Mwene.

³⁰ Ni nyobe zyache ni zyache, umuntu yula ize ni chakwiyipa ichakocha kwa Mwene. Umuntu yula ize na mafuta, poka na kajimbi, po akazyunguzye mumwanya akajimbi kala pamaso pa Mwene.

³¹ Umuputi oche amafuta pachighemo, loli akajimbi kabanje ka Aloni na bana bache.

³² Bamupe umuputi intapatapa iya ndilo iya chakwiyipa ichabupoka chila pakuba chabupi.

³³ Umwana uwa Aloni yuyo akulinyafila ibanda nukocha amafuta agha chakwiyipa ichabupoka, bamupe intapatapa iya ndilo pakuba chigaba chache.

³⁴ Pa chakwiyipa ichabupoka icha ba Izilayeli, nasendapo akajimbi akakuzyunguzya mumwanya kala, sona ni ntapatapa iya ndilo yiyo yikabikiwa kwa Mwene nukumupa umuputi u Aloni na bana bache pakuba chigaba chabo icha bwila na bwila.’ ”

³⁵ Ichi cho chigaba icha chakwiyipa ichakocha kwa Mwene, chicho chikapeghiwa kwa Aloni na bana bache pisiku lilyo bakimikiwanga pakuba baputi aba Mwene.

³⁶ Pisiku lilyo bakimikiwanga pakuba baputi, u Mwene akabalamula aba Izilayeli pakubapa abaputi ichigaba chinichi icha chakwiyipa pakuba chigaba chabo icha bwila na bwila mupaka inkulilo zyosi izya muntazi.

³⁷ Zinizi zyo ndaghilo izya ichakwiyipa ichakocha ni chakwiyipa icha busu ni chakwiyipa ichakupepesezya imbibi ni chakwiyipa ichakupepesezya inongwa ni chakwiyipa ichakubimikila abaputi sona ni chakwiyipa ichabupoka

³⁸ ghagho u Mwene akamubuzya u Mozesi pighamba ilya Sinayi pisiku lilyo akabalamula aba Izilayeli pakwiza ni vyakwiyipa vyabo kwa Mwene munkolongo iya Sinayi.