Aba Levi 6 - IBAYIBOLO 2024

¹ U Mwene akamubuzya u Mozesi akati,

² “Nanti umuntu ananga umwakusita ukusubiliwa kwa Mwene, pachifukwa icha buzimbuli pakukana ukumunyosezya umupalamani wache ivintu vivyo akamusungisya pamo ukumwibila pamo ukumuzimbula

³ pamo pakutamanta ukuti atasebite ivintu vivyo vikasobela pamo pakulapa ubumyasi pa chintu chosi,

⁴ nanti umuntu ananga bunubu, kokuti naloli apalaghula inongwa. Po anyosye ivintu vivyo akasenda umwabuzimbuli.”

⁵ Pisiku lilyo aghiwa ukuti naloli umuntu yula apalaghula inongwa, amunyosezye umwenecho ivintu vyache vyosi, sona onjelezyepo ichigaba choka pavigaba vyosi fayivi.

⁶ Umuntu yula amupe umuputi udubi uwa pamudimo wache umusita chilema nachimochimo ukuti chibanje chakwiyipa kwa Mwene ichakupepesezya inongwa zyache. Umutengo wache ghuyane bulo ni chakwiyipa ichakupepesezya inongwa yiyo apalaghula.

⁷ Umuputi abike kwa Mwene ichakwiyipa ichakupepesezya imbibi izya muntu yula, po imbibi zyache zikwiza pakuhobokeliwa.

Ichakwiyipa ichakocha chosi

⁸ U Mwene akamulamula u Mozesi akati,

⁹ “Umubuzye u Aloni na bana bache uti, ‘Ulu lo lulaghilo ulwa chakwiyipa ichakocha chosi: Ichakwiyipa ichakocha chibanje pamoto pachighemo palapala busiku bosi mupaka pandabindabi, sona umoto ghutakazimaye.

¹⁰ Po umuputi avwale inkazo yache intonte yila nu kabuntu umutonte. Ayole itoyi ilya chakwiyipa ichakocha pachighemo pala nukulibika palubazu ulwa chighemo.

¹¹ Avule amenda ghache ghala nukuvwala amenda aghanji, sona ayole itoyi lila nukulibika pabuzilo ubuzelu kuzi ukwa visakasa.

¹² Umoto uwa pachighemo wakaye bulo sona ghutakazimaye. Pandabindabi posi umuputi asonkezyanje inkwi pamoto nukulambalika ichakwiyipa ichakocha pachighemo pala, sona ochelepo amafuta agha chakwiyipa ichabupoka.

¹³ Umoto wakaye akabalilo kosi pachighemo pala, sona ghutakazimaye.’ ”

Ichakwiyipa icha busu

¹⁴ “Ulu lo lulaghilo ulwa chakwiyipa icha busu: Abana aba Aloni babike ichakwiyipa icha busu pamaso pa Mwene kuntazi ukwa chighemo.

¹⁵ Po umuputi atapeko ichikufi choka icha busu ubutinye, na mafuta panandi, sona nu twakufukizya utwakununkila, tuto tuli pa chakwiyipa icha busu. Avyoche pachighemo pakuba chikumbusyo. Umunusi uwa chakwiyipa chinichi ghukumuhobosya u Mwene.

¹⁶ U Aloni na bana bache balye ivyakusyala. Bavilyele mu Buzilo Ubuzelu, mulubinjilo ulwa Chisakasa icha Mwene, loli vitakabanje ni chilungo.

¹⁷ Bo bali pakuvipiya, batakabikemo ichilungo. Nabapavyo pakuba chigaba chabo icha chakwiyipa ichakocha pamoto. Ichi cho chakwiyipa ichizelu nkani ukuyana bulo ni chakwiyipa ichakupepesezya imbibi, sona ni chakwiyipa ichakupepesezya inongwa.

¹⁸ Abana bosi abalumendo aba Aloni balyanje ichakwiyipa ichakocha pamoto chinichi, pakuti cho chigaba chabo ichakwiyipa kwa Mwene. Umuntu wesi uwakuchipalamasya ichakwiyipa chinichi abanje mupaghuliwa.”

¹⁹ U Mwene akamubuzya u Mozesi akati,

²⁰ “Ichakwiyipa chicho u Aloni na bana bache babikaye kwa Mwene pisiku lilyo bakumwimika pakuba muputi cho ichi: Babikaye ikilogalamu lyoka ilya busu ubutinye ukuti chibanje chakwiyipa icha bwila na bwila. Babikaye uhafu weka pandabindabi, sona uhafu uyunji babikaye pachamabwila.

²¹ Ongannyemo amafuta nukuvikazinga pachakukazingila. Avibikaye kwa Mwene mutumenyu ukuti chibanje chakwiyipa icha busu. Umunusi uwa chakwiyipa chinichi ghukumuhobosya u Mwene.

²² Umwana wesi uwa Aloni yuyo akumupyana uwise pakuba muputi umupakiwa weyuyo achibike pakuba chigaba icha chakwiyipa icha bwila na bwila icha Mwene, sona achoche chosi.

²³ Ichakwiyipa chosi icha busu chicho umuputi akubika chochiwe chosi ukusita ukulyako nachimochimo.”

Ichakwiyipa ichakupepesezya imbibi

²⁴ U Mwene akamulamula u Mozesi akati,

²⁵ “Umubuzye u Aloni na bana bache uti, ‘Ulu lo lulaghilo ulwa chakwiyipa ichakupepesezya imbibi: Ichakwiyipa ichakupepesezya imbibi chiboleliwanje pamaso pa Mwene papo ichakwiyipa ichakocha chikuboleliwapo. Ichi cho chakwiyipa ichizelu nkani.’ ”

²⁶ Umuputi yuyo akubika ichakwiyipa chinichi, alyeko. Achilyele Mubuzilo Ubuzelu, mulubinjilo ulwa Chisakasa icha Mwene.

²⁷ Umuntu wesi uwakuchipalamasya ichakwiyipa chinichi abanje mupaghuliwa. Nanti ibanda lyache lyatonyela umwenda, umwenda ghulaghula ghuchapiwe Mubuzilo Ubuzelu.

²⁸ Isonta yiyo mwapiyiyemo inyama yiniyi muyifwantannyanje, loli nanti yapiyiwa musonta iya mukuba, muyipalaye nkani nukuyisuka akiza na mizi.

²⁹ Umwanavuli wesi uwa munyumba iya buputi angalyako chakwiyipa chinichi, pakuti ichi cho chakwiyipa ichizelu nkani.

³⁰ Loli atakalye ichakwiyipa ichakupepesezya imbimbi, nanti ibanda lyache bizite nalyo mu Chisakasa icha Mwene, ukuti chibanje chakwiyipa ichakupepesezya imbibi, loli chochiwe pamoto.