Aba Levi 3 - IBAYIBOLO 2024

Ivyakwiyipa ivyabupoka

¹ “ ‘Nanti umuntu akubika inkambaku pamo ing'ombe inkolo ukuti yibanje chakwiyipa ichabupoka kwa Mwene, ing'ombe yila yitakabanje ni chilema nachimochimo.

² Umuntu yula abike inyobe yache pamutu uwa nkambaku yila nukuyibolela pamulyango uwa Chisakasa icha Mwene. Po abamunyumba iya Aloni, babo baputi banyafile ibanda lila mumbazu zyosi folo izya chighemo.

³ Abike ichigaba chimo icha chakwiyipa ichabupoka kwa Mwene ukuti chibanje chakwiyipa ichakocha. Ivigaba vinivi vyo ivi: Amafuta ghagho ghamamatiye amala,

⁴ ni figho zyosi zibili na mafuta ghache, sona ni chigaba ichiza nkani icha itima chicho akwiza pakwefezya poka nifigho.

⁵ Po abana aba Aloni boche vyosi vinivi pamwanya pa chakwiyipa ichakocha pankwi izya moto pachighemo ukuti chibanje chakwiyipa ichakocha. Umunusi uwa chakwiyipa chinichi ghukumuhobosya u Mwene.

⁶ “ ‘Nanti umuntu akubika ing'ozi pamo imbuzi iya pamudimo wache ukuti chibanje chakwiyipa ichabupoka kwa Mwene, yingaba nyanavuli pamo inkolo yiyo yite ni chilema nachimochimo.

⁷ Nanti umuntu akubika ing'ozi ukuti chibanje chakwiyipa chabupoka, ize nayo pamaso pa Mwene.

⁸ Umuntu yula abike inyobe yache pamutu uwa ng'ozi yila nukuyibolela kuntazi ukwa Chisakasa icha Mwene. Po abana aba Aloni banyafile ibanda lyache mumbazu zyosi folo izya chighemo.

⁹ Asende ichigaba chimo icha chakwiyipa ichabupoka nukwiza nacho kwa Mwene ukuti chibanje chakwiyipa ichakocha. Ivigaba vinivi vyo ivi: Amafuta na mafuta ghosi agha musinda agha papipi nu mongololo na mafuta ghosi ghagho ghamamatiye kumala

¹⁰ ni figho zyosi zibili na mafuta ghache sona ni chigaba ichiza nkani icha itima chicho akwiza pakwefezya poka nifigho.

¹¹ Po umuputi avyoche vyosi pachighemo ukuti chibanje chakwiyipa kwa Mwene.

¹² “ ‘Nanti umuntu akubika imbuzi ukuti chibanje chakwiyipa, ize nayo pamaso pa Mwene.

¹³ Abike inyobe yache pamutu uwa mbuzi yila nukuyibolela kuntazi ukwa Chisakasa icha Mwene. Po abana aba Aloni banyafile ibanda lyache mumbazu zyosi folo izya chighemo.

¹⁴ Achibike ichigaba chimo icha chakwiyipa chinichi kwa Mwene ukuti chibanje chakwiyipa ichakocha. Ivigaba vinivi vyo ivi: Amafuta ghosi ghagho ghamamatiye kumala,

¹⁵ ni figho zyosi zibili na mafuta ghache, sona ni chigaba ichiza nkani icha itima chicho akwiza pakwefezya poka nifigho.

¹⁶ Umuputi oche vyosi vinivi pachighemo pakuba chakulya, ichakwiyipa ichakocha chicho umunusi wache ghukumuhobosya u Mwene. Amafuta ghosi gha Mwene.

¹⁷ “ ‘Ulu lubanje lulaghilo ulwa bwila na bwila mupaka inkulilo zyosi izya muntazi ukuti mutakalyanje amafuta pamo ibanda kosi kuko mukwikala.’ ”