Aba Levi 27 - IBAYIBOLO 2024

Amalamulo aghakunena nizya vyabupi kwa Mwene

¹ U Mwene akamubuzya u Mozesi akati,

² “Ubabuzye aba Izilayeli uti, ‘Nanti umuntu akumubika umuntu yumo kwa Mwene ukuti akwanilisye ichilapo chache ichipaghuliwa, loli pisinda pache akulonda pakumutabula,

³ abike ivi: Nanti mwanavuli uwa maka 20 mupaka 60, umutengo wache ghubanje isalabazya izya siliva 50, ukuyana ni chipimilo icha Mubuzilo Ubuzelu ubwa Chala.

⁴ Nanti mukolo, umutengo wache ghubanje isalabazya izya siliva 30

⁵ Nanti mulumendo uwa maka fayivi mupaka 20, umutengo wache ghubanje isalabazya izya siliva 20.

⁶ Nanti mwana umulumendo uwa mwezi ghoka mupaka amaka fayivi umutengo wache ghubanje isalabazya izya siliva fayivi, loli nanti mwana umulindu, umutengo wache ghubanje isalabazya izya siliva zitatu.

⁷ Nanti mwanavuli uwakuchila amaka 60, umutengo wache ghubanje isalabazya izya siliva 15, loli nanti mukolo uwakuchila amaka 60, umutengo wache ghubanje isalabazya izya siliva teni.

⁸ Nanti umuntu yuyo akulapa mupina nkani umwakuti atangalipila umutengo uwa isiku ni siku, po ize ku muputi nu muntu yuyo akamubika, po umuputi yula apime umutengo, ukuyana namumo umuntu yuyo akalapa angalipilila.’ ”

⁹ “Nanti chicho akalapa pakubika chinyamana chicho chititikiziwe pakuba chakwiyipa kwa Mwene, po ichinyamana chilachila chikuba chipaghuliwa kwa Mwene.

¹⁰ Umuntu yula atakatanannye ichinyamana ichiza mubuzilo ubwa ichinyamana ichibibi, pamo ichinyamana ichibibi mubuzilo ubwa ichiza. Nanti akutanannya ichinyamana mubuzilo ubwa chinyamana, po vyosi vibili vipimiwanje pakuba vizelu.

¹¹ Loli nanti chicho akalapa pakubika ukuti chibanje chakwiyipa kwa Mwene cho chinyamana ichinyazu, umuntu yula amupe umuputi ichinyamana chila.

¹² Umuputi apime umutengo wache ukuyana nu bwiza pamo ububibi ubwa chinyamana chila, sona umutengo ghukwiza pakuba gho ghulaghula.

¹³ Loli nanti umwenecho akulonda pakuyitabula, umutengo wache ghubanje gho ghulaghula, loli onjelezyepo ichigaba choka pavigaba fayivi.”

¹⁴ “Nanti umuntu akuyipaghulila inyumba yache kwa Mwene, umuputi apime umutengo wache ukuyana nu bwiza pamo nu bubibi ubwa nyumba yila, sona umutengo ghukwiza pakuba gho ghulaghula.

¹⁵ Nanti umuntu yuyo akuyipaghulila inyumba yache kwa Mwene akulonda pakuyitabula, onjelezyepo ichigaba choka pavigaba fayivi, po inyumba yila yikwiza pakuba yache sona.

¹⁶ “Nanti umuntu akuchipaghulila kwa Mwene ichigaba chimo icha chisu chache, umutengo wache ghuyane ni mbeyu yiyo angabyala mumughunda ghula. Imbeyu iya mapemba iyakukwana amakilogalamu 20 umutengo wache ghubanje isalabazya izya siliva 50.

¹⁷ Nanti akughupaghulila umughunda wache mumwaka uwa lusekelo, umutengo wache ghubanje gho ghulaghula.

¹⁸ Loli nanti akughupaghulila umughunda wache, bo wachila umwaka uwa lusekelo, po umuputi apime umutengo wache ukuyana na maka ghagho ghasyalako mupaka umwaka ughunji uwa lusekelo ghufike, loli umutengo wache ghukwiza pakuba wakwikapo.

¹⁹ Nanti umuntu yuyo akapaghulila umughunda wache akulonda pakughutabula, onjelezyepo ichigaba choka pavigaba fayivi, po umughunda ghula ghukwiza pakuba wache sona.

²⁰ Loli nanti atakulonda pakughutabula pamo nanti amughulizizye umuntu uyunji, umwenecho yula atangaghutabula sona umughunda wache.

²¹ Nanti umughunda ghula ghukutabuliwa mumwaka uwa lusekelo, ghukuba mupaghuliwa kwa Mwene, sona ghukuba uwa muputi.”

²² Nanti akughupaghulila kwa Mwene, umughunda ghugho aghulite, sona ghugho ghute chigaba icha mpyana yache,

²³ umuputi apime umutengo wache mupaka mumwaka uwa lusekelo. Po umuntu yula alipile umutengo wache pisiku lilalila pakuba mupaghuliwa kwa Mwene.

²⁴ Mumwaka uwa lusekelo, umughunda ghula ghukwiza pakunyokela ku mwenecho.

²⁵ Umutengo ghosi ghupimiwanje ukuyana ni chipimilo icha mu Ubuzilo Ubuzelu ubwa Chala, kokuti ishekeli lyoka liyanaye na magela 20.

²⁶ “Nayumo umuntu atakabike kwa Mwene umwana uwakwanda pakupapiwa uwa chinyamana pakuba chakwiyipa manyi ng'ombe manyi ng'ozi pakuti vyosi vya Mwene kale.

²⁷ Nanti akubika umwana uwa uwakwanda pakupapiwa uwa chinyamana ichinyazu, angamutabula pamutengo ghugho umuputi apimite, sona onjelezyepo ichigaba choka pavigaba fayivi ivya mutengo wache. Loli nanti atakumutabula, aghuliziwanje pamutengo ghugho umuputi apimite.”

²⁸ Patakabepo nayumo umuntu uwakughulizya ichintu chimo pamo uwakuchitabula chicho chipaghuliliwe kwa Mwene manyi muntu manyi chinyamana manyi mughunda ghugho mpyana yache.

²⁹ Umuntu wesi yuyo apaghuliliwe kwa Mwene atakatabuliwanje, loli aghoghiwanje.

³⁰ Ichigaba choka pavigaba 10 ivya mumughunda manyi mbeyu manyi vikomwa, vya Mwene, pakuti vipaghuliliwe kwa Mwene.

³¹ Nanti umuntu akulonda pakutabula ichigaba choka pavigaba 10 vila, onjelezyepo ichigaba choka pavigaba fayivi.

³² Ichigaba chosi pavigaba 10 ivya mudimo uwa vitekwa ivya Mwene. Nanti ivitekwa vikubelengiwa, ichigaba chosi pavigaba 10 cha Mwene.

³³ Umwenecho atakasalepo nanti ichinyamana chiza pamo chibibi, sona atakatanannye. Nanti atanannya, ivinyamana vyosi vibili vikuba vipaghuliliwa kwa Mwene, sona atangavitabula.

³⁴ Agha gho malamulo ghagho u Mwene akamupa u Mozesi pighamba ilya Sinayi ukuti ababuzye aba Izilayeli.