Aba Levi 26 - IBAYIBOLO 2024

Ulusayo pachifukwa ichakwivwila

¹ “Mutakipangilaye ivifwani, pamo ukwiyimikila Ivikumbusyo ivya mabwe, sona mutakibizilaye ivifwani ivya mabwe muchisu chinyu nukuvyiputa. Ane ne Mwene u Chala winyu.

² Mulisungaye Isiku Ilyakutuzya, sona mubuchindikaye ubuzilo bwane ubuzelu. Ane ne Mwene.”

³ “Nanti mukughakonka amalamulo ghane ni ndaghilo zyane,

⁴ ane nkwiza pakubapa ivula pakabalilo kache. Ichisu chikwiza pakubabotolela imboto, sona amakwi ghakwiza pakwelagha ivikomwa.

⁵ Inyinulo yinyu yikwiza pakwendelela mupaka pakabalilo akakuyabila ivikomwa, sona mukwiza pakuyabagha ivikomwa mupaka pakabalilo akakubyalila. Mukwiza pakulya ivibama nukwikuta, sona mukwiza pakwikala muchisu chinyu umwakufwasa.”

⁶ Nkwiza pakubapa umutende muchisu chinyu. Mukwiza pakughonagha ukusita pakunyila nachimochimo. Nkwiza pakuvichimbizyamo ivinyamana ivyakoghofya muchisu chinyu, sona mutakwiza pakubamo ubwite.

⁷ Naloli mukwiza pakubachimbizyamo abalwani binyu, sona mukwiza pakubapota nupanga.

⁸ Abantu fayivi bulo bakwiza pakubachimbizya abantu 100, sona abantu 100 bulo bakwiza pakubachimbizya abantu 10,000. Amwe mukwiza pakubapota abalwani binyu nupanga.

⁹ Nkwiza pakubasaya nukubapa abana abinji, umwakuti munyame. Nkwiza pakukwanilisya ulufingo lwane lulo nkafingana namwe.

¹⁰ Inyinulo yinyu yikwiza pakuba nyinji nkani umwakuti yikwiza pakumala umwaka, bo yichili yilipo, sona mukwiza pakwefyamo iyakale yila ukuti impya yibanje nu buzilo.

¹¹ Nkwiza pakwikala muchisakasa chane ichipaghuliwa pakasi papinyu. Ane ntakwiza pakubasula nalumolumo.

¹² Nkwiza pakuba pakasi papinyu, nkwiza pakuba ne Chala winyu, sona amwe mukwiza pakuba mwe bantu bane.

¹³ Ane ne Mwene u Chala winyu, ne nkabefya mu Ijiputi, umwakuti mutakabe sona bazya aba ba Ijiputi. Nkapyola ikoli lyinyu, umwakuti mugholokaye bulo pakwenda.

Ulufundo pachifukwa ichakusita ukwivwila

¹⁴ “Loli nanti mutakughakonka amalamulo ghane ni ndaghilo zyane mukwiza pakufundiwa.

¹⁵ Nanti mukughakana amalamulo ghane nukuzisulannya indaghilo zyane, sona nanti mukulukana ulufingo lulo nkafingana namwe,

¹⁶ nkwiza pakubafunda. Nkwiza pakubawisizya iviwaya ivyakunyomosya nu bubine bubo bute na malembo, ni zekema iyakunangannya amaso, sona ni yakughamala bulo amabili ghinyu. Mukwiza pakubyala imbeyu, loli mutakwiza pakwinulamo nazimo, pachifukwa ichakuti abalwani bakwiza pakuzilya.

¹⁷ Nkwiza pakubapa inkonto, umwakuti abalwani binyu babapote, sona abantu babo bababengite bakwiza pakubalaghila. Mukwiza pakuchimbila, napapo nayumoyumo atabachimbizizye.”

¹⁸ Loli pope bulo nanti mutakunyivwila, nkwiza pakubafunda umwakonjelezyapo akaseveni pachifukwa icha mbibi zyinyu.

¹⁹ Nkwiza pakumazya ukwituvya kwinyu kosi, pakusita ukubapa ivula, umwakuti kumwanya kukwiza pakuba ngati chela, sona ichisu chinyu chikwiza pakuba chumizu ngati mukuba.

²⁰ Mukwiza pakutagha bulo amaka ghinyu pakuti ichisu chinyu chitakwiza pakubabotolela imboto, sona amakwi ghatakwiza pakwelagha ivikomwa.

²¹ “Nanti mukwendelela pakunsambukila, nukukana pakunyivwila, nkwiza pakubatumila iviwaya umwakonjelezyapo akaseveni ukuchila pambibi zyinyu.

²² Nkwiza pakubatumila ivinyamana ivyakoghofya, vivyo vikwiza pakubalya abana binyu nukughogha ivitekwa vyinyu, umwakuti ubwinji bwinyu bukwiza pakuba bunandi bulo, sona izila zyinyu zikwiza pakufwa.”

²³ Loli pope bulo nanti mutakunyokela kukwane, sona nanti mukwendelela pakunsambukila,

²⁴ nane bulo nkwiza pakubasula, sona nkwiza pakubafunda umwakonjelezyapo akaseveni ukuchila pakwanda pachifukwa icha mbibi zyinyu.

²⁵ Nkwiza pakubatumila ubwite pachifukwa ichakuti mukalunangannya ulufingo lulo nkafingana namwe. Nanti mukuchimbilila mutwaya twinyu utukulu nkani ukuti muponelemo, nkwiza pakubatumila iviwaya, sona abalwani binyu bakwiza pakubapota.

²⁶ Bo nefya ivibama vyinyu ivya isiku ni siku, abakolo 10 bakwiza pakupiya ivibama mu musonta yoka. Po bakwiza pakubagabila amwe ivibama vila mutumenyumenyu, sona nanti mwalya, pope bulo mutakwiza pakwikuta.

²⁷ “Loli pope bulo nanti mukwendelela pakunsambukila nukukana pakunyivwila,

²⁸ nane nkwiza pakubasula mubukali bwane, sona nkwiza pakubafunda umwakonjelezyapo akaseveni pachifukwa icha mbibi zyinyu.

²⁹ Mukwiza pakubalya abana binyu abalumendo na balindu pachifukwa icha zala.

³⁰ Nkwiza pakunangannya inyumba zyinyu izyakwiputilamo ivifwani mumaghamba, nukumongolannya ivighemo ivyakufukizizyapo utwakununkila. Nkwiza pakuyisumbila imivimba yinyu pa vifwani vivyo vite nubumi, sona nkwiza pakubasulannya.

³¹ Nkwiza pakutunangannya utwaya twinyu utukulu nkani nukutupela visami, sona nkwiza pakubunangannya ubuzilo bwinyu ubwakwiputilamo, ntakwiza pakupokela umunusi uwa vyakwiyipa vyinyu ivyakununkila.

³² Nkwiza pakuchinangannya ichisu chinyu, umwakuti abalwani binyu babo bakwikalamo bakwiza pakuchiswigha bulo.

³³ Nkwiza pakubanyampanizizya pakasi pabantu aba inko injeni nukubanangannya nupanga wane. Ichisu chinyu chikwiza pakuba nkolongo, sona utwaya twinyu utukulu nkani tukwiza pakuba visami.”

³⁴ “Po pakabalilo kanaka ichisu chikwiza pakusekela pachifukwa ichakuti chikwiza pakuba na Maka Aghakutuzya, bo amwe muli mubuzya muchisu icha balwani binyu, pakuti amwe mutakalondagha pakuchipa ichisu chinyu akabalilo akakutuzya.

³⁵ Akabalilo kosi kako ichisu chite na bantu, ichisu chikwiza pakutuzya, ukutuzya kuko chitatuzizyepo nalumo mumaka ghosi ghagho mukikalaghamo.”

³⁶ Abantu babo basyalako, nkwiza pakubapelela ubogha muvyisu ivya balwani babo, umwakuti bakwiza pakuchimbila bo bivwa umuswato. Bakwiza pakuchimbilagha ngati muntu yuyo akuchimbila ubwite, sona bakwiza pakuwanga pasi, pakusita nayumo umuntu uwakubachimbizya.

³⁷ Bakwiza pakupunuzyannya benebene pakusita nayumo umuntu uwakubachimbizya. Mutakwiza pakuba na maka aghakulwila na balwani binyu.

³⁸ Mukwiza pakufwila muchisu icha bantu aba inko injeni, sona ichisu icha balwani binyu chikwiza pakubamila.

³⁹ Abantu abanandi bulo babo basyalako bakwiza pakuyimbagha nkani muchisu icha balwani binyu pachifukwa icha mbibi zyinyu, sona ni mbibi izya banyenya binyu.

⁴⁰ “Loli nanti abaluko lwabo bakwilata imbibi zyabo, sona ni mbibi izya banyenya babo, pachifukwa ichakusita kusubiliwa kwabo nukumbenga,

⁴¹ kuko kukampela ukuti imbabenge, nukubatuma kuchisu icha balwani babo, sona nanti amoyo ghabo amakafu ghiyisya nukwitika pakuchemeliwa pachifukwa icha mbibi zyabo,

⁴² po ane nkwiza pakulukumbuka ulufingo lwane lulo nkafingana nu Yakobo nu Yisaki nu Abulahamu, sona nkwiza pakuchikumbuka ni chisu chinyu.

⁴³ Pakuti abantu babaghiye pakuchileka tasi ichisu chabo, umwakuti ichisu chibanje na Maka Aghakutuzya. Abantu babaghiye pakufundiwa pachifukwa icha mbibi zyabo, pakuti bakakana indaghilo na malamulo ghane.

⁴⁴ Loli napapo bali muchisu icha balwani babo, ane ntakwiza pakubakana, pamo pakubaleka umwakuti mbanangannye nukulunangannya ulufingo lwane lulo nkafingana nabo. Ane ne Mwene u Chala wabo.

⁴⁵ Loli pachifukwa icha chisa, nkwiza pakukumbuka ulufingo lwane lulo nkafingana na banyenya, babo nkabefya mu Ijiputi, bo abantu aba inko injeni bakwennya, umwakuti imbanje ne Chala wabo. Ane ne Mwene.”

⁴⁶ Agha gho malamulo ni ndaghilo zizyo u Mwene akabapa aba Izilayeli pighamba ilya Sinayi ukwendela mwa Mozesi.