Aba Levi 25 - IBAYIBOLO 2024

Umwaka Uwakutuzya

¹ U Mwene akamubuzya u Mozesi pighamba ilya Sinayi akati,

² “Ubalamule aba Izilayeli uti, Bo mukwinjila muchisu chicho nkubapa, ichisu chilachila chibanje nu Mwaka Uwakutuzya mumwaka ghosi uwaseveni, umwakuti mumuchindikaye u Mwene.

³ Mumaka sikisi mulimaye amaghunda ghinyu nukubyala imbeyu, sona mupalantilaye amampesya ghinyu nukuyaba ivikomwa vyache.

⁴ Loli umwaka waseveni amaghunda ghinyu ghabanje nu Mwaka Uwakutuzya, Umwaka uwakupaghuliliwa kwa Mwene. Mutakabyalaye imbeyu mumaghunda ghinyu, pamo ukupalantila amampesya ghinyu.

⁵ Mutakinulaye imbeyu zizyo zimelite zyene, sona mutakayabaye amampesya ghagho ghatapalantiliwe. Ichisu chila chibanje nu Mwaka Uwakutuzya.

⁶ Loli ivyakulya vyosi vivyo vimelite Mumwaka Uwakutuzya vibanje vyinyu, amwe na bazya binyu na bambombo sona na bayeni babo bakwikala pakasi papinyu,

⁷ ni vitekwa vyinyu, ni vinyamana ivya muzi ivya muchisu chinyu. Chosi chicho chikumela mumaghunda ghala chibanje chakulya.”

Umwaka uwa lusekelo

⁸ “Mubelengaye Amaka Aghakutuzya seveni nukubalizya akaseveni, umwakuti Amaka Aghakutuzya ghabanje 49.

⁹ Po pisiku ilya 10 ilya mwezi uwaseveni, pisiku ilyakupepesezya imbibi, mulizyanje amapati muchisu chinyu chosi.

¹⁰ Mughupaghulaye umwaka uwa 50, sona mufumusyanje ubwabuke muchisu chosi pakasi pabantu babo bakwikalamo. Ghubanje mwaka winyu uwa lusekelo, uwakuti umuntu wesi anyokelaye kubaluko lwache, sona umuntu wesi pakasi papinyu anyokelaye ku bamunyumba yache.

¹¹ Umwaka uwa 50 ghubanje mwaka winyu uwa lusekelo, sona mutakabyalaye imbeyu mumaghunda ghinyu, pamo ukwinula vivyo vimelite vyene, pamo ukuyaba amampesya ghagho mutapalantiye.

¹² Umwaka ghunughu gho mwaka uwa lusekelo, po mughupimaye pakuba mwaka muzelu. Mulyanje chene chicho chimelite chene mumaghunda ghinyu.”

¹³ Mumwaka uwa lusekelo ughu, umuntu wesi anyokelaye kubaluko lwache.

¹⁴ Nanti ukumughulizizya umughunda umu Izilayeli uwamwinyu, pamo ukumughula umughunda, mutakazimbulanaye.

¹⁵ Umughulaye uwamwinyu ukuyana nu bwinji ubwa maka ukwanda mumwaka uwa lusekelo. Uwamwinyu yula akughulizizye ukuyana nu bwinji ubwa maka aghakwinulila ghagho ghasyalite.

¹⁶ Nanti amaka minji, umutengo ghubanje wakukwelapo, loli nanti amaka manandi bulo, umutengo ghubanje wakwikapo pachifukwa ichakuti ivintu vivyo akughulizizya bo bwinji ubwa nyinulo.

¹⁷ Mutakazimbulanaye, loli mumunyilaye u Mwene, u Chala winyu.

Intamyo izya Mwaka Uwakutuzya

¹⁸ “Mukonkaye amalamulo ghane ni ndaghilo zyane, umwakuti mwikalaye muchisu umwakufwasa.

¹⁹ Ichisu chope chikwiza pakubapa ivikomwa, po mukwiza pakulya mupaka nukwikuta, sona mukwiza pakwikala muchisu umwakufwasa.”

²⁰ Loli mungalalusya ukuti, “Nkimba tukwiza pakulya choni mumwaka uwaseveni, nanti tutakubyala, pamo nanti tutakwinula?”

²¹ Ane nkwiza pakubasaya ni vyakulya ivyinji nkani mumwaka uwasikisi, umwakuti ichakulya chibanje chakubakwana amaka matatu.

²² Nanti mukubyala mumwaka uwa eyiti, mukwiza pakulya vivyo mukinula mumwaka uwasikisi, sona ichakulya chila chikwiza pakubakwana mupaka pakabalilo akakwinulila mumwaka uwa nayini.

Nizya kunyosezya papo ukatundu

²³ “Mutakaghulizizye zila ichisu, pakuti ichisu chane. Amwe mwe bayeni bulo, sona mwe bendazila.

²⁴ Muchisu chosi chicho mukwiza pakwikalaghamo, mubitikizyanje abamwinyu pakuchitabula ichisu chicho chikaghuliziwa.”

²⁵ Nanti umu Izilayeli uwamwinyu aba mupina, nukughulizyapo bumo ubuzilo bwache, umukamu wache abutabulaye ubuzilo bubo umuntu yula abughulizizye.

²⁶ Nanti umuntu yula ate nu mukamu uwakuti angachitabula ichisu chila, loli pisinda pache umwenecho aba mukabi nukuvyagha ivyakukwana ivyakuchitabulila ichisu chache,

²⁷ abelengele amaka ukwandila papo akaghulizizya ichisu chila. Amunyosezye umuntu yuyo akamughulizizya, umwakuti anyokele sona kuchisu chache.

²⁸ Loli nanti ate ni vyakukwana ivyakubutabulila ubuzilo bubo abughulizizye, po ubuzilo bubo akabughulizya bukwendelelagha pakuba munyobe izya muntu yuyo akabughula, mupaka mumwaka uwa lusekelo. Mumwaka ghulaghula, ubuzilo butabuliwe nukunyokela ku mwenecho.

²⁹ “Nanti umuntu akughulizya inyumba mukaya akakulu nkani kako kali nu lupaso, ali nu bwabuke ubwakuyitabula inyumba yache bo umwaka ghuchili pakumala.

³⁰ Nanti atakuyitabula inyumba yila, bo nu mwaka ghuchili pakumala, inyumba iya mukaya akakulu nkani aka lupaso yendelelaye pakuba ya muntu yuyo akayighula poka na baluko lwache. Inyumba yila yitakanyosiwanje sona mumwaka uwa lusekelo.”

³¹ Loli inyumba zizyo zite mutwaya utukulu nkani utwa lupaso, zyo muzipimaye pakuba maghunda. Umwenecho uwa nyumba zila musatuke pakuzitabula nukuti zinyokele ku mwenecho mumwaka uwa lusekelo.

³² Loli aba Levi bali nu bwabuke akabalilo kosi ubwakuzitabula inyumba zyabo zyosi zizyo zili mutwaya twabo.

³³ Nanti umu Levi yumo akupotwa pakuyitabula inyumba yiyo yighuliziwe mutwaya twabo, bamunyosezye umwenecho mumwaka uwa lusekelo. Pakuti inyumba zizyo zili mutwaya utukulu nkani utwa ba Levi, zyabo ni zyabo, pakasi paba Izilayeli.

³⁴ Loli amakombe ghagho ghazyunguliye utwaya utukulu nkani ghatakaghuliziwanje napo panandi, pakuti gho maghunda ghabo bwila na bwila.

Nizya kubakopezya abapina

³⁵ “Nanti umu Izilayeli uwamwinyu aba mupina sona atangisunga mwene, amwe mumwavwanje ukuyana namumo mungamwavwilizizya umuyeni pamo umwendazila, umwakuti endelele pakwikala namwe.

³⁶ Mutakapokelaye indalama izyakukabilapo, loli mumunyilaye u Chala winyu, umwakuti umu Izilayeli uwamwinyu endelele pakwikala namwe.

³⁷ Mutakamukopezyanje uwamwinyu indalama umwakuti mupokele indalama izyakukabilapo, pamo pakumughulizizya ichakulya ni ndalama izyakukabilapo.

³⁸ Ane ne Mwene u Chala winyu, nkabefya mu Ijiputi, umwakuti imbape ichisu icha Kenani, sona nukuti imbanje ne Chala winyu.”

Ukwabuliwa ukwa bazya

³⁹ “Nanti umu Izilayeli uwamwinyu aba mupina nkani nukwighulizya mwene kukwako pakuba muzya, mutakamupimaye pakuba muzya.

⁴⁰ Mumupimaye pakuba waganyu, pamo ngati mwendazila. Ababombelaye imbombo mupaka umwaka uwa lusekelo.

⁴¹ Pisinda pache abuliwanje poka na bana bache, po anyokelaye kubaluko lwache, kuko kuli ichilingo icha banyenya bache.

⁴² Pakuti aba Izilayeli bo babombi bane, babo nkabefya mu Ijiputi, batakaghuliziwanje pakuba bazya.

⁴³ Mutakabayivyanje, loli mumunyilaye u Chala winyu.”

⁴⁴ Nanti mukulonda abazya manyi banavuli manyi bakolo, mungabaghula pakasi pa inko zizyo zikwikala namwe.

⁴⁵ Mungabaghula sona abendazila poka na bamunyumba zyabo, babo bapapiliwe muchisu chinyu. Banaba bangaba binyu na binyu.

⁴⁶ Mungabalekela abana binyu abazya bala pakuba mpyana yabo. Banaba mungabapela pakuba bazya binyu bwila na bwila, loli mutakabayivyanje aba Izilayeli abamwinyu.

⁴⁷ “Nanti umuyeni pamo umwendazila aba mukabi, sona nanti umu Izilayeli uwamwinyu aba mupina nukwighulizya ku muyeni, pamo kubakamu bache,

⁴⁸ ali nu bwabuke ubwakutabuliwa, napapo akighulizya mwene. Weka uwa bakamu bache,

⁴⁹ manyi we wise umunandi manyi muvyala manyi mukamu wache umwenecho, angamutabula. Pamo nanti umuntu yula aba mukabi, angitabula mwene.”

⁵⁰ Abelengelane nu muntu yuyo akamughula ukwandila mumwaka ghugho akighulizya mwene mupaka mumwaka uwa lusekelo. Umutengo wache uwakumutabulila ghuyane na malipilo agha waganyu, sona ukuyana nu bwinji ubwa maka.

⁵¹ Nanti ghasyalako amaka aminji, alipilaye umutengo uwakukwelapo pa chigaba icha ndalama zyache izyakumutabulila.

⁵² Loli nanti amaka manandi bulo ukuti ghufike umwaka uwa lusekelo, babelengelane nu mwene wache nukunyosya indalama zizyo akamutabulila.

⁵³ Amupimaye pakuba waganyu umwaka nu mwaka. Wenelezye ukuti u mwene wache atakumuyivya.

⁵⁴ Nanti atakutabuliwa, umuntu yula abuliwanje poka na bana bache mumwaka uwa lusekelo.

⁵⁵ Pakuti aba Izilayeli bo babombi bane, babo nkabefya mu Ijiputi. Ane ne Mwene u Chala winyu.