Aba Levi 24 - IBAYIBOLO 2024

Nizya kasungile aka nyale

¹ U Mwene akamubuzya u Mozesi akati,

² “Ubalamule aba Izilayeli ukuti bizaye na mafuta amiza nkani agha musyunguti pakuba gha nyale umwakuti inyale zyakaye akabalilo kosi.

³ U Aloni akozyanje inyale pamaso pa Mwene, kuzi ukwa mwenda uwakuzighila Ibokosi ilya Lufingo, lilyo lili mu Chisakasa icha Mwene ukuti yakaye ukwandila pachamabwila mupaka pandabindabi. Ululaghilo ulu lubanje lwa bwila na bwila mupaka inkulilo zyinyu zyosi izya muntazi.

⁴ U Aloni akozye inyale zizyo zili pachakubikapo inyale icha golide umwenecho, sona enelezye ukuti zikwaka akabalilo kosi pamaso pa Mwene.

Nizya chibama ichakubikiwa kwa Chala

⁵ “Musende ubusu ubutinye ubwakukwana amakilogalamu 12 nukupiya ivibama 12.

⁶ Muvibike ivibama vila mumizele mibili, ivibama sikisi pamuzele ghoka, pitebulo ilya golide umwenecho, pamaso pa Mwene.

⁷ Mubikemo tumo utwakufukizya utwakununkila pamuzele ghosi, umwakuti poka ni chibama chila chibanje chikumbusyo ichakwiyipa ichakocha ichakubikiwa kwa Mwene.

⁸ Pisiku lyosi Ilyakutuzya, sona akabalilo kosi, u Aloni abikaye ichibama chinichi pamaso pa Mwene, mubuzilo ubwa ba Izilayeli pakuba lufingo ulwa bwila na bwila.

⁹ Ichibama chila chikuba cha Aloni na bana bache, sona bachilyele Mubuzilo Ubuzelu, pakuti chinichi cho chigaba ichizelu nkani icha chakwiyipa icha chigaba icha bwila na bwila icha chakwiyipa ichakocha kwa Mwene.”

Ulufundo pakumusamula u Chala

¹⁰ Isiku limo umulumendo yuyo uwise akaba mu Ijiputi, loli unyina akaba mu Izilayeli akalwanga nu mu Izilayeli muvisakasa.

¹¹ Umulumendo yuyo unyina akaba mu Izilayeli akalisamula itabwa ilya Mwene, po bakumusendela kwa Mozesi. Unyina akaba we Shelomiti, umwana uwa Dibili, sona uwaluko ulwa Dani.

¹² Po bakamwighalila mujele, nukulindilila mupaka u Mwene amubuzye u Mozesi ichakubomba.

¹³ U Mwene akamubuzya u Mozesi akuti,

¹⁴ “Mwefyemo muvisakasa umuntu uwamusamu yula. Abantu bosi babo bakivwa umusamu wache babike inyobe zyache pamutu uwa muntu yula pakusimikizya ukuti anangite, po ichilundilo chosi chimughoghe na mabwe.

¹⁵ Po ubabuzye aba Izilayeli bosi uti, ‘Umuntu wesi yuyo akumusamula u Chala, inongwa yibanje pamutu wache.

¹⁶ Umuntu yuyo akulisamula itabwa ilya Mwene, manyi mu Izilayeli, manyi muyeni yuyo akwikala muchisu icha Izilayeli, aghoghiwanje na mabwe ni chilundilo chosi.

¹⁷ “ ‘Umuntu wesi yuyo akumughogha uwamwabo, wepe aghoghiwanje.

¹⁸ Umuntu wesi yuyo akuchighogha ichitekwa icha wamwabo, anyosezye papo. Ubumi bulipilaye ubumi.

¹⁹ Nanti umuntu akumuvulazya uwamwabo, wepe avulaziwanje.

²⁰ Nanti umuntu apyola ifupa ilya wamwabo, wepe ifupa lyache lipyoliwanje. Nanti umuntu atuyula ilyiso ilya wamwabo, ilyiso lilipile ilyiso. Nanti umuntu abontola ilyino ilya wamwabo, ilyino lilipile ilyino. Umuntu wesi avulaziwanje ukuyana namumo amuvulazizya uwamwabo.

²¹ Umuntu yuyo akuchighogha ichitekwa icha wamwabo, anyosezye papo. Loli umuntu yuyo akumughogha umuntu uwamwabo, wepe aghoghiwanje.

²² Ululaghilo ulu lukumupalamasya umuntu wesi manyi muyeni manyi mwenekaya. Ane ne Mwene u Chala winyu.’ ”

²³ U Mozesi akababuzya zinizi aba Izilayeli, po bakamusendela umuntu uwamusamu yula kuzi ukwa visakasa nukumughogha na mabwe. Aba Izilayeli bakabomba vyosi vivyo u Mwene akamulamula u Mozesi.