Aba Levi 20 - IBAYIBOLO 2024

Ulufundo pachifukwa ichakusita ukwivwila

¹ U Mwene akamubuzya u Mozesi akati,

² “Ubabuzye aba Izilayeli uti, ‘Nanti umu Izilayeli yumo, pamo umuyeni yuyo akwikala pakasi papinyu, akumubika weka umwana uwa bana bache kwa chala u Moleki ukuti chibanje chakwiyipa, abantu bosi bamughoghe na mabwe.

³ Ane ne mwenecho nkwiza pakumusulannya umuntu yulayula nukumwepusyapo pakasi pabantu bache pachifukwa ichakuti abunyazya ubuzilo bwane ubuzelu, nukulisamula itabwa lyane izelu pakubika abana bache kwa chala u Moleki.

⁴ Nanti abantu aba muchisu bakubomba ngati po batakumwennya umuntu yula, bo akubabika abana bache kwa Moleki, sona nanti batakumughogha,

⁵ ane ne mwenecho nkwiza pakumusulannya umuntu yula, poka na bamunyumba yache, sona nkwiza pakumwefyapo pakasi pabantu bache, yuyo poka na bantu bosi babo bakumukonka nukwinyazya bene pakumwiputa u Moleki.

⁶ “ ‘Nanti umuntu akubuzikizya abantu babo bakunenezannya ni mizimu iya bantu abafwe, ane nkwiza pakumusulannya umuntu yula, nukumwepusyapo pakasi pabantu bache.

⁷ “ ‘Po mwiswefyanje mwebene, sona mubanje bantu bazelu. Ane ne Mwene u Chala winyu.

⁸ Mughakonkaye amalamulo ghane, nukubomba zyosi zizyo nkubalamula. Ane ne Mwene nkubapela amwe pakuba bantu bazelu.

⁹ “ ‘Nanti umuntu akumughuna uwise pamo unyina, aghoghiwanje. Pachifukwa ichakuti amughuna uwise pamo unyina, kokuti apalaghula inongwa.

¹⁰ “ ‘Nanti umuntu akulowa nu muchi uwa mupalamani wache, bosi babili umwanavuli nu mukolo baghoghiwanje.

¹¹ “ ‘Nanti umuntu akughona nu muchi uwa wise, kokuti amukozya isoni uwise, bosi babili umwanavuli nu mukolo baghoghiwanje, pakuti bipalaghulila bene inongwa.

¹² “ ‘Nanti umuntu akughona nu mulasagha wache, bosi babili umwanavuli nu mukolo baghoghiwanje, pachifukwa ichakubomba ivyamasiku, sona bakwipalaghulila bene inongwa.

¹³ “ ‘Nanti umwanavuli akughona nu mwanavuli uwamwabo ngati po akughona nu mukolo, bosi babili baghoghiwanje, pachifukwa ichakubomba ivintu ivinyazu, sona bipalaghulila bene inongwa.

¹⁴ “ ‘Nanti umuntu akusenda umukolo nukumusenda sona nu nyina uwa mukolo yula, bosi batatu bochiwanje pamoto pachifukwa ichakubomba ivyamasiku, umwakuti patakaghiwepo nabumo ububibi pakasi papinyu.

¹⁵ “ ‘Nanti umwanavuli akughona ni chinyamana, aghoghiwanje, sona chope ni chinyamana chila chighoghiwanje.

¹⁶ “ ‘Nanti umukolo akughona ni chinyamana, aghoghiwanje, sona chope ni chinyamana chila chighoghiwanje, pakuti ipalaghulila mwene inongwa.

¹⁷ “ ‘Nanti umwanavuli akusenda umuyemba wache, pamo umuyemba wache uwa mwa nyina uyunji, kokuti babomba ivyamasiku, bosi babili bepusiwanje pakasi pabantu babo. Pachifukwa chakuti bapalaghula inongwa.

¹⁸ “ ‘Nanti umwanavuli akughona nu mukolo yuyo ali ni chakumwezi, kokuti amusamula umukolo yula, sona nu mukolo wepe isamula mwene. Po bosi babili bepusiwanje pakasi pabantu babo.

¹⁹ “ ‘Nanti umwanavuli akughona nu wamwabo uwa nyina pamo unyinasenje, kokuti akubasamula abakamu bache. Po bosi babili bipalaghulila bene inongwa.

²⁰ “ ‘Nanti umwanavuli akughona nu muchi uwa wise umunandi, kokuti amusamula uwise yula. Po bosi babili bipalaghulila bene inongwa, sona bakwiza pakufwa abasita bana.

²¹ “ ‘Nanti umwanavuli akumusenda umuchi uwa wamwabo, kokuti abomba ivintu ivinyazu, sona amusamula uwamwabo. Po bosi babili bakwiza pakufwa abasita bana.

²² “ ‘Mukonkaye amalamulo ghane ghosi, sona ni ndaghilo zyane zyosi, umwakuti ichisu chicho nkubinjizyamo chitakabatapike.

²³ Mutakaghelelaye inyiho izya bantu babo, babo nkubachimbizya pantazi papinyu. Pachifukwa ichakuti bakabomba ivintu ivibibi vinivi, ane nkabasulannya.

²⁴ Loli amwe mukwiza pakupyana ichisu chabo. Nkwiza pakubapa ichisu chabo icha mboto pakuba chinyu. Ane ne Mwene u Chala winyu, sona imbapaghuye amwe pakasi pabantu aba inko izinji.

²⁵ “ ‘Polelo mulesannyanje pakasi pa vinyamana iviswepu ni vinyazu, pakasi pa viyuni ivinyazu ni viswepu. Mutakinyazyanje mwebene pakulya ivinyamana, pamo iviyuni, pamo vyosi ivyakwavula pachisu ichapasi, vivyo invinenite pakuba vintu vinyazu.

²⁶ Mubanje mwe bantu bazelu, pakuti Ane ne Mwene ne muzelu, sona imbapaghuye amwe pakasi pabantu aba inko izinji, umwakuti mubanje bantu abane na bane.

²⁷ “ ‘Nanti umwanavuli pamo umukolo akunenezannya ni mizimu iya bantu abafwe, aghoghiwanje na mabwe, pachifukwa ichakuti ipalaghulila mwene inongwa.’ ”