Aba Levi 2 - IBAYIBOLO 2024

Ivyakwiyipa ivya busu

¹ “ ‘Nanti umuntu akubika ichakwiyipa icha busu kwa Mwene, chibanje cha busu ubutinye nkani. Abunyafile ubusu bula na mafuta, sona nu twakununkila,

² po abape abamunyumba iya Aloni, babo baputi. Umuputi atapepo ichikufi icha busu ubutinye bula na mafuta poka nu twakufukizya utwakununkila tosi, nukuvyocha pachighemo pakuba chikumbusyo kwa Mwene. Umunusi uwa chakwiyipa chinichi ghukumuhobosya u Mwene.

³ Ubusu ubwakusyalapo bubanje bwa Aloni na bana bache. Ichi cho chigaba ichizelu nkani, pachifukwa ichakuti chatapiwa bulo pa chakwiyipa ichakocha, chicho chabikiwa kwa Mwene.

⁴ “ ‘Nanti ukubika ichakwiyipa icha chibama ichakupiyiwa musonta, chibanje chibama chicho chite ni chilungo icha busu ubutinye ubwakongannya na mafuta, pamo vibanje vitumbuwa vivyo vite ni chilungo ivyakupakiwa na mafuta.

⁵ Nanti ichakwiyipa chako icha busu chakukazingiwa, chibanje chibama chicho chite ni chilungo cha busu ubutinye ubwakongannya na mafuta.

⁶ Uchimenyannye nukuchipaka amafuta ukuti chibanje chakwiyipa cha busu.

⁷ Nanti ichakwiyipa chako cho chibama chicho chipiyiwe musonta, chibanje chibama icha busu ubutinye ubwakongannya na mafuta.

⁸ Po wize ni chakwiyipa chila kwa Mwene nukumupa umuputi, po umuputi yulayula ize nacho pachighemo.

⁹ Umuputi yula asendeko ichigaba chimo icha chakwiyipa chila pakuba chikumbusyo kwa Mwene, po achoche pachighemo. Umunusi uwa chakwiyipa chinichi ghukumuhobosya u Mwene.

¹⁰ Ubusu ubwakusyalapo bubanje bwa Aloni na bana bache. Ichi cho chigaba ichizelu nkani, pachifukwa ichakuti chatapiwa bulo pa chakwiyipa ichakocha, chicho chabikiwa kwa Mwene.

¹¹ “ ‘Ichakwiyipa chosi icha busu chicho ukwiza nacho kwa Mwene chitakabanje ni chilungo, pachifukwa ichakuti utabaghiye pakubika kwa Mwene ichakwiyipa ichakocha icha chilungo pamo icha buchi.

¹² Ungiza navyo kwa Mwene ukuti vibanje chakwiyipa chako icha vikomwa ivyakwanda pakwinula, loli utakavyoche ukuti vibanje vyakwiyipa ivya munusi ghugho ghukumuhobosya u Mwene.

¹³ Ulungaye imbeya ivyakwiyipa vyako vyosi ivya busu, pakuti imbeya yikwimilila ulufingo lulo luli pakasi pa amwe nu Chala winyu. Ulungaye imbeya ivyakwiyipa vyako vyosi ivya busu.

¹⁴ “ ‘Nanti ukubika kwa Mwene ichakwiyipa icha vikomwa ivyakwanda pakwinula, yibanje mbeyu impya iyakusya iyakukazingiwa pamoto.

¹⁵ Upungulilepo amafuta nu twakufukizya utwakununkila ukuti chibanje chakwiyipa icha busu.

¹⁶ Umuputi oche ichigaba icha mbeyu impya iyakusya yila, na mafuta poka nutwakufukizya utwakununkila ukuti chibanje chikumbusyo kwa Mwene.