Aba Levi 19 - IBAYIBOLO 2024

Indaghilo izyakulekanalekana

¹ U Mwene akamubuzya u Mozesi akati,

² “Uchibuzye ichilundilo chosi icha ba Izilayeli uti, ‘Mubanje bazelu, pachifukwa ichakuti ane ne Mwene, u Chala winyu ne muzelu.

³ “ ‘Umuntu wesi amuchindikaye unyina nu wise nukulisungilila Isiku lyane Ilyakutuzya. Ane ne Mwene u Chala winyu.

⁴ “ ‘Mutakiputaye ivifwani, pamo ukwipangila mwebene abachala aba chela. Ane ne Mwene u Chala winyu.

⁵ “ ‘Nanti mukubika ichinyamana ukuti chibanje chakwiyipa ichabupoka kwa Mwene, muchibikaye umwakuti chingapokeleliwa.

⁶ Mulyanje inyama yache pisiku lilyo mukachibikila, pamo indabi yache. Inyama yosi yiyo yasyala pisiku ilyabutatu yochiwanje.

⁷ Nanti mwayilya pisiku ilyabutatu, kokuti yikuba nyazu, sona yitakupokeleliwa.

⁸ Umuntu wesi yuyo akuyilya akupalaghula inongwa, pachifukwa ichakuti achinyazya ichintu ichizelu icha Mwene, sona umuntu yula epusiwanjepo pakasi pabantu.

⁹ “ ‘Bo mukwinula mumaghunda ghinyu, mutakinulaye mumpaka izya mumaghunda ghinyu, sona mutakasalalaye.

¹⁰ Mutakinulaye amampesya ghosi mumaghunda ghinyu, sona mutakanyokelaye mwisinda pakuseba amampesya ghosi ghagho ghawiye pasi. Amampesya ghanagho mubalekele abapina na bayeni. Ane ne Mwene u Chala winyu.

¹¹ “ ‘Utakibaye. “ ‘Utakatamantaye. “ ‘Mutakazimbulanaye.

¹² “ ‘Utakalapilaye mwitabwa lyane umwabumyasi, nukulisamula itabwa ilya Chala wako. Ane ne Mwene.

¹³ “ ‘Utakamuzimbulaye umupalamani wako, pamo ukumwibila ukatundu wache. Utakasungaye amalipilo agha wambombo wako mupaka indabi yache.

¹⁴ “ ‘Utakamughunaye uwamapuli, pamo pakumubikila ichipunulo umufwamaso, loli umunyilaye u Chala. Ane ne Mwene winyu.

¹⁵ “ ‘Utakanyongannye ubwanaloli bo ukulonga inongwa, sona utakasalilaye pakasi pabantu abapina na bakabi, loli ulongelaye mubwanaloli.

¹⁶ Utakendakendaye uku na uku pakubalumannya abantu, sona utakabombaye nachimo ichintu chicho chingamupelela umupalamani wako ubufwe. Ane ne Mwene.

¹⁷ “ ‘Utakasungaye ulubengo mumoyo wako, loli umuchemelaye, umwakuti utakabombepo nachimo ichibibi, pachifukwa icha yuyo.

¹⁸ “ ‘Utakatanizyanje ichibibi pa chibibi pamo ukubakalalila abantu abaluko lwako, loli umughanaye umupalamani wako ukuyana namumo wiyighaniye wemwenecho. Ane ne Mwene.

¹⁹ “ ‘Ughakonkaye amalamulo ghane. Utakendezyanje ivitekwa vyako ivyaluko loka ni vyaluko ulunji. “ ‘Utakapesaye imbeyu zibili mumughunda ghoka. “ ‘Utakavwalaye umwenda uwakupangiwa na menda aghakulekanalekana.

²⁰ “ ‘Nanti umwanavuli akughonana nu mukolo umuzya, yuyo azingililiwe, loli nanti atatabuliwe pamo pakupeghiwa ubwabuke, umwanavuli yula afundiwanje ukuyana ninongwa yache. Loli bosi babili batakaghoghiwanje pachifukwa icha mukolo umuzya yula atakapeghiwa ubwabuke.

²¹ Umwanavuli yula ize nu dubi pamulyango uwa Chisakasa icha Mwene ukuti chibanje chakwiyipa ichakupepesezya inongwa zyache.

²² Po umuputi abike udubi yula ukuti chibanje chakwiyipa ichakupepesezya inongwa izya muntu yula pamaso pa Mwene, umwakuti imbibi zyache zihobokeliwe.

²³ “ ‘Bo mukwinjila muchisu icha Kenani nukubyalamo ivikomwa ivyakulekanalekana, muvipimaye ivikomwa vila pakuba vinyazu amaka matatu. Atakabepo nayumoyumo umuntu uwakuvilya.

²⁴ Mumwaka uwafolo ivikomwa vyache vipaghuliliwe kwa Mwene ukuti vibanje vyakumupalizikizya.

²⁵ Loli mumwaka uwafayivi mungalya ivikomwa vyache, ukuti ivikomwa vila vyele nkani. Ane ne Mwene u Chala winyu.

²⁶ “ ‘Mutakalyanje inyama yiyo yichili yili ni banda. “ ‘Mutakabombaye amayele pamo ubulozi.

²⁷ “ ‘Mutakadumulilaye isisi zyinyu mulubazu, pamo pakudumulila indevu izya mulubazu.

²⁸ “ ‘Mutakibolannye amabili ghinyu pachifukwa icha bufwe ubwa muntu, pamo ukwisalila mumabili ghinyu. Ane ne Mwene.

²⁹ “ ‘Mutakabanyazyanje abana binyu abalindu pakubapela pakuba bamalaya, lumo ichisu chingaba chisu icha bwamalaya, nukwizula nu bubibi.

³⁰ “ ‘Mulisungaye Isiku Ilyakutuzya, sona mubuchindikaye ubuzilo bwane ubuzelu. Ane ne Mwene.

³¹ “ ‘Mutakababuzikizyanje abamayele, pamo abantu babo bakunenezannya ni mizimu iya bantu abafwe. Nanti mukubomba bunubu, mukwinyazya mwebene. Ane ne Mwene, u Chala winyu.

³² “ ‘Mubapanje umuchizi abantu abavwi, sona mubachindikaye abantu abaghosi. Mumunyilaye u Chala winyu. Ane ne Mwene.

³³ “ ‘Mutakamuyivyanje umuyeni yuyo akwikala pakasi papinyu.

³⁴ Umuyeni yuyo akwikala pakasi papinyu, abanje ngati po mwenekaya. Mubaghanaye ukuyana namumo mwiyighaniye mwebenecho, pakuti namwe bulo mukaba mwe bayeni muchisu icha Ijiputi. Ane ne Mwene, u Chala winyu.

³⁵ “ ‘Mutakabazimbulaye abantu pakubombezya ivipimilo ivyabumyasi ivyakupimila ubutali, pamo ubung'wamu, pamo ubwinji ubwa vintu.

³⁶ Mubombezyanje ivipimilo ivyanaloli, sona mutakabazimbulaye abantu bo muli pakupima ivintu. Ane ne Mwene, u Chala winyu, nkabefya muchisu icha Ijiputi.

³⁷ “ ‘Mughakonkaye amalamulo ghane ghosi, sona muzikonkaye indaghilo zyane zyosi. Ane ne Mwene.’ ”