Aba Levi 18 - IBAYIBOLO 2024

Nizya kughonana ukwa mwiko

¹ U Mwene akamubuzya u Mozesi akati,

² “Ubabuzye aba Izilayeli uti, Ane ne Mwene u Chala winyu.

³ Mutakeghelelaye inkalo iya ba Ijiputi, muchisu chicho mukikalaghamo, pamo ukweghelela inkalo iya ba Kenani, muchisu chicho nkubatuma amwe losi ulu.

⁴ Mukonkaye indaghilo zyane, sona mubombaye zizyo nkubalamula. Ane ne Mwene u Chala winyu.

⁵ Polelo musungilile inyiho ni ndaghilo zizyo nkubapa pakuti nanti umuntu wesi yuyo akubomba bunubu akwiza pakuba nubumi. Ane ne Mwene.”

⁶ Atakabepo nayumo umuntu pakasi papinyu uwakughona nu mukamu wache. Ane ne Mwene.

⁷ Utakaghonaye nu nyoko pakuti ichi chikumukozya ughuso isoni. Utakamukozyanje isoni unyoko pakughona nawe, pakuti we nyoko.

⁸ Utakamukozyanje ughuso isoni pakughona na bachi bache abanji.

⁹ Utakaghonaye nu muyemba wako, pamo uwa mwa nyoko uyunji, manyi apapiwe nawe poka manyi apapiwe ku bunji.

¹⁰ Utakaghonaye nu mwizukulu wako umulindu, pakuti ichi chingakukozya isoni.

¹¹ Utakaghonaye nu muyemba wako yuyo apapiwe mwa nyina uyunji, pakuti yunuyu muyemba wako.

¹² Utakaghonaye nu nyokosenje, pakuti yunuyu libanda lyoka nu ghuso.

¹³ Utakaghonaye nu wamwabo uwa nyoko, pakuti yunuyu we nyoko.

¹⁴ Utakaghonaye nu muchi uwa wamwabo uwa ghuso, pakuti yunuyu we nyoko.

¹⁵ Utakaghonaye nu muchi uwa mwana wako, pakuti yunuyu we mulasagha wako.

¹⁶ Utakaghonaye nu mukoyi wako, pakuti ichi chingamukozya isoni uwamwinyu.

¹⁷ Utakaghonaye nu mukolo poka nu mwana wache umulindu. Utakaghonaye nu mwizukulu wache, pakuti bosi banaba bakamu bako. Chinicho gho mwiko.

¹⁸ Utakamusendaye umuzuna uwa muchi wako pakuba muchi wako uwabubili, pakuti ukwiza pakubika ubulwani pakasi papabo.

¹⁹ Utakaghonaye nu mukolo bo ali ni chakumwezi, pakuti akuba muntu munyazu.

²⁰ Utakaghonaye nu muchi uwa mupalamani wako pakuti ichi chingakunyazya.

²¹ Utakamubikaye nayumoyumo umwana wako ukuti abanje chakwiyipa kwa chala u Moleki, pakuti pakubomba bunubu ukulisamula itabwa ilya Chala wako. Ane ne Mwene.

²² Utakaghonanaye nu mwanavuli ngati po ukughonana nu mukolo. Chinichi cho chintu ichamwiko.

²³ Utakaghonanaye ni chinyamana nukwinyazya wemwene. Umukolo atakiyipe ku chinyamana ukuti aghonane nacho. Chinichi gho mwiko.

²⁴ Mutakinyazyanje mwebene ni vintu vinivi, pakuti umu momumo bakinyazizya bene abantu aba inko babo nkubachimbizya pantazi papinyu.

²⁵ Chope ni chisu chikanyala nkani, umwakuti nkachifunda pachifukwa icha mbibi zyache, po ichisu chikabatapika abantu babo bakikalagha mulamula.

²⁶ Loli amwe mukonkaye indaghilo zyane nukubomba zizyo nkubalamula. Mutakabombaye ivintu ivyamwiko vinivi, manyi mwe benekaya manyi bayeni babo bakwikala pakasi papinyu.

²⁷ Pakuti abantu aba muchisu chicho nkubatuma bakabomba ivintu ivyamwiko vinivi, umwakuti ichisu chikanyala nkani.

²⁸ Po nanti mukuchinyazya ichisu, chikwiza pakubatapika, ukuyana namumo chikabatapikila abantu babo bakikalagha mulamula, bo amwe muchili nukufikamo.

²⁹ Pakuti umuntu wesi yuyo akubomba ivintu ivyamwiko vinivi, akwiza pakwepusiwapo pakasi pabantu abaluko lwache.

³⁰ Po mukonkaye indaghilo zyane, sona mutakabombaye ivintu ivyamwiko vivyo abantu bala bakabombagha, bo amwe muchili nukufikamo. Mutakinyazyanje mwebene ni vintu vinivi. Ane ne Mwene u Chala winyu.