Aba Levi 17 - IBAYIBOLO 2024

Ibanda ipaghuliwa

¹ U Mwene akamubuzya u Mozesi akati,

² Umubuzye u Aloni na bana bache poka naba Izilayeli bosi uti u Mwene akuti,

³ Umu Izilayeli wesi yuyo akubika inkambaku, pamo umwana uwa ng'ozi, pamo imbuzi muvisakasa, pamo kuzi ukwa visakasa

⁴ mubuzilo ubwa kwiza navyo pamulyango uwa Chisakasa icha Mwene ukuti chibanje chakwiyipa kwa Mwene, umuntu yula apalaghula inongwa iyakukupula ibanda, po epusiwanje pakasi pabantu bosi.

⁵ Ichi chikung'anamula ukuti aba Izilayeli bakwiza pakubika ivyakwiyipa vyabo kwa Mwene, mubuzilo ubwa kuvibika mutwaya. Bizaye navyo ku muputi pamulyango uwa Chisakasa icha Mwene, nukuvibika palapala ukuti chibanje chakwiyipa ichabupoka.

⁶ Umuputi anyafile ibanda mumbazu izya chighemo pamulyango uwa Chisakasa icha Mwene nukocha amafuta. Umunusi uwa mafuta ghukwiza pakumuhobosya u Mwene.

⁷ Polelo aba Izilayeli batakabe basita kusubiliwa kwa Mwene pakubika ivyakwiyipa vyabo kumizimu imibibi yiyo yikuboneka ngati mbuzi. Ululaghilo lunulu lubanje ulwa bwila na bwila mupaka inkulilo zyosi izya muntazi.

⁸ Ubabuzye uti, “Nanti umu Izilayeli yumo, manyi muyeni yuyo akwikala pakasi papabo, akubika ichakwiyipa ichakocha pamo ichakwiyipa ichinji

⁹ ukusita ukwiza nacho pamulyango uwa Chisakasa icha Mwene, umuntu yulayula epusiwanje pakasi pabantu.”

¹⁰ Nanti umu Izilayeli yumo, manyi muyeni yuyo akwikala pakasi papabo akulya ibanda, u Mwene akwiza pakumusula nukumwepusyapo pakasi pabantu bache.

¹¹ Pakuti ubumi ubwa chintu chosi ichabumi buli mwibanda, po nabapa ibanda pakuba chakupepesezya imbibi zyinyu pachighemo, pachifukwa ichakuti ibanda lyo lilyo likupepesezya imbibi izya muntu.

¹² Cho chifukwa nababuzya aba Izilayeli ukuti, “Nayumo umuntu atakalyanje ibanda, manyi muyeni yuyo akwikala pakasi papinyu.”

¹³ Nanti umu Izilayeli yumo, pamo umuyeni yuyo akwikala pakasi papinyu, akubinga ichinyamana pamo ichiyuni chicho chingalyewa, akupulile ibanda pasi nukulifukila.

¹⁴ Pakuti ubumi ubwa chintu chosi ichabumi buli mwibanda. Po cho chifukwa u Mwene ababuzya aba Izilayeli ukuti, “Mutakalyanje ibanda ilya chinyamana chosi, pachifukwa ichakuti ubumi ubwa chintu chosi ichabumi buli mwibanda. Po umuntu wesi yuyo akulya ibanda akwiza pakwepusiwapo pakasi pabantu.”

¹⁵ Nanti umuntu yumo manyi mwenekaya, manyi muyeni nanti akulya ichinyamana ichifwe chene manyi chakulika, achape amenda ghache nukogha, loli akuba muntu munyazu mupaka pachamabwila. Pisinda pache akwiza pakuba muntu muswepu.

¹⁶ Loli nanti atakuchapa amenda ghache, sona nanti atakogha, inongwa yibanje pamutu wache.