Aba Levi 16 - IBAYIBOLO 2024

Nizya lisiku ilyakupepesezya imbibi

¹ U Mwene akamubuzya u Mozesi bo abana babili aba Aloni bafwa, pachifukwa ichakupalamila kwa Mwene.

² U Mwene akamubuzya u Mozesi akati, “Umusoke uwamwinyu u Aloni ukuti atakinjile mwalwe mu Chipinda Ichizelu nkani, kwisinda ukwa mwenda uwakuzighila, kuntazi ukwa chikupikizyo icha Bokosi ilya Lufingo, lumo angafwa, pachifukwa ichakuti ane nkwiza pakuboneka mwibingu pamwanya pa chikupikizyo.

³ “Bo u Aloni akwinjila mu Chipinda Ichizelu nkani akonkaye ululaghilo ulu: Asende inkambaku inyana ukuti chibanje chakwiyipa ichakupepesezya imbibi nu dubi ukuti chibanje chakwiyipa ichakocha.

⁴ Avwalaye inkazo itonte nu kabuntu umutonte, apinye ulamba umutonte, nukuvwala impumpu intonte kumutu wache. Agha gho menda amapaghuliwa. Avwalaye amenda ghanagha, bo ogha tasi umubili wache ghosi.

⁵ Po aba Izilayeli bamupanje u Aloni abasabwe babili ukuti chibanje chakwiyipa chakupepesezya imbibi, sona nu dubi weka ukuti chibanje chakwiyipa ichakocha.

⁶ “U Aloni abike inkambaku ukuti yibanje chakwiyipa ichakupepesezya imbibi zyache, sona ni mbibi izya bamunyumba yache.

⁷ Po asende abasabwe babili bala nukubabika pamulyango uwa Chisakasa pamaso pa Mwene.

⁸ Abike amayele pa basabwe babili bala, umwakuti usabwe weka abanje wa Mwene sona usabwe uyunji abanje wa Azazele.

⁹ U Aloni ize ni mbuzi yiyo amayele ghakalanjizya ukuti ya Mwene nukuyibika ukuti yibanje chakwiyipa ichakupepesezya imbibi.

¹⁰ Loli nanti amayele ghalanjizya ukuti usabwe uyu uwa Azazele, ize nawe pamaso pa Mwene ukuti chibanje chakwiyipa chakupepesezya imbibi nukumuchimbizizya munkolongo kwa Azazele.

¹¹ “U Aloni abike inkambaku ukuti yibanje chakwiyipa ichakupepesezya imbibi zyache, sona nizya bamunyumba yache. Po ayibole inkambaku yila ukuti yibanje yakupepesezya imbibi zyache.

¹² Asende ichakufukizizya utwakununkila ichakwizula na mazimwa agha moto uwa pachighemo pamaso pa Mwene nu twakufukizya utwakunkila utwakwizula ivikufi vibili nukubuka nato kwisinda ukwa mwenda uwakuzighila.

¹³ Mulamula pamaso pa Mwene, abike pamoto utwakufukizya utwakununkila tula umwakuti ilyosi ilya twakufukizya utwakununkila tula lichivwinke ichikupikizyo icha Bokosi ilya Lufingo, umwakuti atakafwe.

¹⁴ Asendeko limo ibanda ilya inkambaku nukulinyafila na kafingwi kache pa chikupikizyo, sona ilyakusyala lila alinyafile akaseveni kuntazi ukwa chikupikizyo.

¹⁵ “Pisinda pache abole imbuzi ukuti yibanje chakwiyipa ichakupepesezya imbibi izya bantu, ize ni banda ilya mbuzi kwisinda ukwa mwenda uwakuzighila, nukubomba ulwiho ukuyana namumo akabombela ni banda ilya nkambaku pakunyafila ibanda lila pa chikupikizyo chila, sona na kuntazi ukwa chikupikizyo chila.

¹⁶ Bunubu akwiza pakubomba ulwiho ulwakuchiswefya Ichipinda Ichizelu nkani pachifukwa ichakuti aba Izilayeli bakabunyazya ubuzilo bula pachifukwa ichakusambuka kwabo. Abombe bunubu na ku Chisakasa icha Mwene chicho bakachinyazya.

¹⁷ Nayumo umuntu atakabe mu Chisakasa icha Mwene, ukwandila pakabalilo kako u Aloni akwinjilila mu Chipinda Ichizelu nkani pakubomba ulwiho ulwakubuswefya ubuzilo bulabula mupaka pakabalilo kako akufumamo. Mutakabemo umuntu nayumo mupaka amalizye pakubomba ulwiho ulwakupepesezya imbibi zyache, nizya bamunyumba yache, sona nizya ba Izilayeli bosi.

¹⁸ “Po afume kuzi nukubuka ku chighemo chicho chili pamaso pa Mwene pakubomba ulwiho ulwakuchipepesezya. Asendeko limo ibanda ilya inkambaku nilya sabwe, nukulipaka pampembe zyosi izya chighemo.

¹⁹ Achinyafile ichighemo na kafingwi kache akaseveni. Bunubu akwiza pakubomba ulwiho ulwakuchiswefya pachifukwa icha bunyazu ubwa ba Izilayeli.

Usabwe uwakunyamula imbibi

²⁰ “Bo amalizya pakubomba ulwiho ulwakuchipepesezya Ichipinda Ichizelu nkani, ni Chisakasa icha Mwene, sona ni chighemo, abike kwa Mwene imbuzi inyumi.

²¹ U Aloni abike inyobe zyache pamutu uwa mbuzi inyumi yila nukwilatilapo ukusambuka ukwa bantu, sona ni mbibi zyosi izya ba Izilayeli. Pisinda pache muntu yuyo akasaliwa ukuti ayichimbizizye imbuzi yila munkolongo.

²² Imbuzi yila yikwiza pakunyamula imbibi zyabo zyosi pakubuka nazyo munkolongo. Umuntu yula ayilekelezye imbuzi yila munkolongo mulamula.

²³ “Pisinda pache u Aloni injile mu Chisakasa icha Mwene nukuvula amenda ghache amatonte ghagho avwalite, bo akwinjila mu Chipinda Ichizelu nkani nukughaleka mulamula.

²⁴ Oghe Mubuzilo Ubuzelu, nukuvwala amenda ghache. Po afume kuzi nukubika ichakwiyipa chache ichakocha ni chakwiyipa ichakocha icha bantu ukuti chibanje ichakupepesezya imbibi zyache, sona ni mbibi izya bantu.

²⁵ Oche amafuta agha chakwiyipa ichakupepesezya imbibi pachighemo.

²⁶ “Umuntu yuyo akayichimbizizya imbuzi yila kwa Azazele achape amenda ghache nukogha. Po anginjila muvisakasa.

²⁷ Inkambaku ni mbuzi zizyo zikabikiwa ukuti zibanje chakwiyipa ichakupepesezya imbibi, zizyo ibanda lyabo likabikiwa mu Chipinda Ichizelu nkani ukuti libanje lyakupepesezya imbibi, abuke nalyo kuzi ukwa visakasa. Po oche pamoto amakwela, ni nyama, poka na mala.

²⁸ Umuntu yuyo akuvyocha achape amenda ghache nukogha, po anginjila muvisakasa.

Nizya kulikumbuka isiku ilyakupepesezya imbibi

²⁹ “Ulu lo lubanje lulaghilo lwinyu ulwa bwila na bwila ulwakuti mumwezi uwaseveni pisiku ilya teni mutuzyanje pakulya sona mutakabombaye nayimoyimo imbombo manyi amwe mwe benekaya manyi bayeni.

³⁰ Pakuti pisiku linili pakwiza ukubombiwa ulwiho ulwakupepesezya imbibi zyinyu, umwakuti imbibi zyinyu ziswefiwe. Po mukwiza pakuba mwe bantu abaswepu pamaso pa Mwene.

³¹ Ili lyo Lisiku Ilyakutuzya, sona mutuzyanje pakulya. Ulu lubanje lulaghilo ulwa bwila na bwila.

³² Umuputi yuyo apakaziwe na mafuta nukwimikiwa ukuti amupyane uwise pakuba muputi usongo, weyuyo abombaye ulwiho ulwakupepesezya imbibi. Avwalaye amenda amapaghuliwa amatonte agha buputi.

³³ Abombaye ulwiho ulwakuchipepesezya Ichipinda Ichizelu nkani ni Chisakasa icha Mwene ni chighemo na baputi sona na bantu bosi aba Izilayeli.

³⁴ “Ulu lubanje lulaghilo lwinyu ulwa bwila na bwila ulwakuti mubombaye ulwiho ulwakupepesezya imbibi izya ba Izilayeli lyoka pamwaka.” Po u Mozesi akabomba zizyo u Mwene akamulamula.