Aba Levi 15 - IBAYIBOLO 2024

Ubunyazu ubwa mubili uwa muntu

¹ U Mwene akamubuzya u Mozesi nu Aloni akati,

² “Mubalamule aba Izilayeli muti, ‘Nanti umwanavuli ali nu bubine ubwakufumya amafila kunkule yache, kokuti akuba muntu munyazu.

³ Ulu lo lulaghilo ulwakunena nizya mafila aghakufuma kunkule iya mwanavuli: Manyi mafila ghakwendelela pakufuma, manyi ghaleka, kokuti akuba muntu munyazu.’ ”

⁴ Ichitala chosi chicho umuntu uwakufumya amafila yula aghonitepo pamo ikayepo, chikuba chinyazu.

⁵ Nanti umuntu akuchipalamasya ichitala chilachila, achape amenda ghache, sona oghe, loli akuba muntu munyazu mupaka pachamabwila.

⁶ Nanti umuntu akwikala pachintu chosi chicho umwanavuli uwakufumya amafila yula ikayepo, umuntu yula achape amenda ghache, sona oghe, loli akuba muntu munyazu mupaka pachamabwila.

⁷ Nanti umuntu akumupalamasya umwanavuli uwakufumya amafila, umuntu yula achape amenda ghache, sona oghe, loli akuba muntu munyazu mupaka pachamabwila.

⁸ Nanti amati agha muntu uwakufumya amafila yula ghamutonyela umuntu yuyo muswepu, umuntu yula achape amenda ghache sona oghe loli akuba muntu munyazu mupaka pachamabwila.

⁹ Ichintu chosi chicho umuntu awakufumya amafila yula akwikalilapo manyi chakwikalila pafalasi manyi pachitengo, ichintu chila chikuba chintu chinyazu.

¹⁰ Nanti umuntu akuchipalamasya ichintu chicho umuntu yula akikalilapo, akuba muntu munyazu mupaka pachamabwila. Nanti umuntu akuchinyamula ichintu chosi chicho umuntu yula akikalilapo, achape amenda ghache, sona oghe, loli akuba muntu munyazu mupaka pachamabwila.

¹¹ Nanti umuntu uwakufumya amafila yula akumupalamasya umuntu ukusita ukusukusula tasi munyobe zyache, umuntu yuyo apalamasiwa achape amenda ghache, sona oghe, loli akuba muntu munyazu mupaka pachamabwila.

¹² Isonta yosi yiyo umuntu uwakufumya amafila yula akuyipalamasya, muyifwantannyanje, sona ichibombelo chosi icha ikwi, chicho akuchipalamasya chichapiwanje.

¹³ Nanti umuntu uwakufumya amafila apola, abelenge amasiku seveni aghakuswefiwa kwache, pisinda pache achape amenda ghache, sona oghe amizi agha pambwibi, po akuba muntu muswepu.

¹⁴ Pisiku ilya eyiti asende intozi zibili, pamo inkunda zibili nukwiza nazyo ku muputi pamulyango uwa Chisakasa pamaso pa Mwene.

¹⁵ Umuputi yula abike ichiyuni choka ukuti chibanje ichakupepesezya imbibi, sona ichinji ukuti chibanje chakwiyipa ichakocha. Bunubu umuputi akwiza pakubika ichakwiyipa ichakupepesezya imbibi izya muntu uwakufumya amafila yula.

¹⁶ Nanti ubwanavuli ubwa mwanavuli bwafuma, oghe umubili wache ghosi, loli akuba muntu munyazu mupaka pachamabwila.

¹⁷ Umwenda ghosi pamo ikwela lyosi papo patonyelwa ubwanavuli, chichapiwanje, loli chikuba chintu chinyazu mupaka pachamabwila.

¹⁸ Nanti umwanavuli aghona nu mukolo, bosi babili boghe, loli bakuba banyazu mupaka pachamabwila.

¹⁹ Nanti umukolo ali ni chakumwezi, akuba muntu munyazu amasiku seveni. Po nanti umuntu akumupalamasya, wepe akuba muntu munyazu mupaka pachamabwila.

²⁰ Ichintu chosi chicho umukulo yula aghonitepo, pamo ikayepo, bo ali ni chakumwezi, chikuba chintu chinyazu.

²¹ Nanti umuntu akuchipalamasya ichitala chache, achape amenda aghache sona oghe, loli akuba muntu munyazu mupaka pachamabwila.

²² Nanti umuntu akuchipalamasya ichintu chosi chicho umukolo yula ikayepo, achape amenda ghache nukogha, loli akuba muntu munyazu mupaka pachamabwila.

²³ Manyi chitala, manyi chintu chosi chicho umukolo yula akwikalilapo, nanti umuntu akuchipalamasya, akuba muntu munyazu mupaka pachamabwila.

²⁴ Nanti umwanavuli aghona nu mukolo yuyo ali ni chakumwezi, akuba muntu munyazu amasiku seveni. Ichitala chosi chicho umwanavuli yula akughonapo, chikuba chinyazu.

²⁵ Nanti umukolo akwendelela pakuba ni chakumwezi ukuchila amasiku ghache agha chakumwezi, akuba muntu munyazu ukuyana namumo akubelagha bo ali ni chakumwezi.

²⁶ Ichitala chosi chicho umukolo yula akughonapo pamo akwikalilapo amasiku ghosi ghagho ali ni chakumwezi, chikuba chinyazu.

²⁷ Nanti umuntu akuchipalamasya, akuba muntu munyazu, sona achape amenda ghache nukogha, loli akuba munyazu mupaka pachamabwila.

²⁸ Loli nanti ichakumwezi chache chaleka, umukolo yula abelenge amasiku seveni, po akuba muntu muswepu.

²⁹ Pisiku ilya eyiti umukolo yula asende intozi zibili pamo inkunda zibili nukwiza nazyo ku muputi pamulyango uwa Chisakasa icha Mwene.

³⁰ Umuputi abike ichiyuni choka ukuti chibanje chakupepesezya imbibi, sona ichinji ukuti chibanje chakwiyipa ichakocha. Bunubu umuputi akwiza pakubika ichakwiyipa ichakupepesezya imbibi izya mukolo yula pamaso pa Mwene pachifukwa icha bunyazu bwache.

³¹ U Mwene akamubuzya u Mozesi akati, “Mubasokaye aba Izilayeli nizya vintu vivyo vingabapela pakuba bantu banyazu, umwakuti batakachinyazye Ichisakasa chane, chicho chili pakasi papabo.

³² “Ulu lo lulaghilo ulwakunena nizya mwanavuli uwakufumya amafila, sona yuyo akufumya ubwanavuli, bubo bukumupela pakuba muntu munyazu.

³³ Umwakuyana bulo, ululaghilo lunulu lukunena sona nizya umukolo yuyo ali ni chakumwezi, sona nizya mwanavuli pamo umukolo yuyo akufumya amafila kunkule yache, sona nizya mwanavuli yuyo akughona nu mukolo akubanga munyazu.”