Aba Levi 13 - IBAYIBOLO 2024

Nizya bubine ubwa pamubili

¹ U Mwene akamubuzya u Mozesi nu Aloni akati,

² “Nanti umuntu ali ni pumba pamo ukabuzi, pamo ichitufya pamubili wache, ghagho ghangaba mambombo, mwize nu muntu yula ku muputi u Aloni pamo ku weka uwa bana bache yuyo we muputi.”

³ Umuputi apime pabuzilo bubo pali ichilonda pala, nanti ameya ghache ghaba maswepu, sona nanti ichilonda chila chibizu nkani, kokuti ghanagha gho mambombo. Po umuputi amunene umuntu yula pakuba muntu munyazu.

⁴ Loli nanti ichilonda chila chiswepite, sona nanti chitibiye nkani, sona nanti ameya ghache ghataswepite, umuputi amwefyepo umuntu yula pakasi pabantu amasiku seveni.

⁵ Pisiku ilyaseveni umuputi amupime sona umuntu yula, po nanti ichilonda chila chili bulo bulabula, sona nanti chitasatite pa mubili, amwefyepo umuntu yula pakasi pabantu amasiku aghanji seveni.

⁶ Pisiku ilyaseveni umuputi amupime sona umuntu yula, po nanti ichilonda chila chikupola, sona nanti chitasatite pa mubili, amunene umuntu yula pakuba muntu muswepu, pakuti cho chitufya bulo. Umuntu yula achape amenda ghache, po akuba muntu muswepu.

⁷ Loli nanti ichilonda chikusata pa mubili uwa umuntu yula, bo umuputi amunena kale pakuba muntu muswepu, umuntu yula ilanjizye sona ku muputi.

⁸ Umuputi amupime sona umuntu yula, po nanti ichilonda chila chisatite pa mubili, amunene umuntu yula pakuba muntu munyazu, pakuti ghanagha gho mambombo.

⁹ Nanti umuntu ali na mambombo, umuntu yulayula bize nawe ku muputi.

¹⁰ Umuputi amupime umuntu yula, sona nanti pali ichilonda ichiswepu pa mubili wache, chicho ameya ghache ghaswepite, sona nanti chikufumya amafila,

¹¹ kokuti ghanagha gho mambombo. Po umuputi amunene umuntu yula pakuba muntu munyazu, sona atakamwefyepo pakasi pabantu pachifukwa ichakuti aba muntu munyazu kale.

¹² Nanti amambombo ghasatite pa mubili ghosi uwa muntu yula ukwandila kunyayo mupaka kumutu,

¹³ umuputi amupime sona umuntu yula. Nanti amambombo ghala ghasatite pa mubili ghosi, po umuputi amunene umuntu yula pakuba muntu muswepu. Pachifukwa ichakuti umubili ghosi uwa muntu yula ghuswepite, kokuti umuntu yula aba muswepu.

¹⁴ Loli nanti ivilonda vikuboneka pa mubili wache, amunene umuntu yula pakuba muntu munyazu.

¹⁵ Umuputi amupime sona umuntu yula, po nanti pamubili wache pali amafila, umuputi amunene umuntu yula pakuba muntu munyazu. Amafila ghala ghakulanjizya ubunyazu, pakuti ghanagha gho mambombo.

¹⁶ Loli nanti ivilonda vila vyapola, sona nanti viswepite, po umuntu yula abuke ku muputi.

¹⁷ Umuputi amupime sona, po nanti ivilonda viswepite, umuputi amunene umuntu yula pakuba muntu muswepu.

¹⁸ “Nanti umuntu ali ni pumba pa mubili wache, lilyo lyapola kale,

¹⁹ sona nanti pabuzilo papo pali ipumba, pakwanda ichilonda ichiswepu pamo ibala ichesamile, umuntu yula abuke ku muputi.

²⁰ Umuputi amupime, po nanti ipumba lila libiye, sona ameya ghache ghaswepite, umuputi amunene umuntu yula pakuba muntu munyazu. Pakuti ghanagha gho mambombo, ghagho ghapunta pabuzilo papo pakaba ipumba.

²¹ Loli nanti umuputi amupima nukwagha ukuti ameya ghache ghaswepite pabuzilo bula, nukuti litibiye, sona nanti lyapola, umuputi amwefyepo umuntu yula pakasi pabantu amasiku seveni.

²² Nanti ichilonda chila chikusata pa mubili, umuputi amunene umuntu yula pakuba muntu munyazu, pakuti ghanagha gho mambombo.

²³ Loli nanti ichilonda chila chili bulo bulabula, sona nanti chitasatite pa mubili, ili libala bulo ilya chitufya, po umuputi amunene umuntu yula pakuba muntu muswepu.

²⁴ “Nanti umuntu apya numoto, sona nanti ichilonda chiswepu pamo chichesamu chikuboneka pamubili wache,

²⁵ umuputi achipime ichilonda chila. Nanti ameya agha pibala ghaswepite, sona nanti chibiye, kokuti ghanagha gho mambombo, ghagho ghanda pibala. Po umuputi amunene umuntu yula pakuba muntu munyazu.

²⁶ Nanti umuputi amupima nukwagha ukuti ameya ghaswepite, sona nanti chitibiye, loli chapola, umuputi amwefyepo umuntu yula pakasi pabantu amasiku seveni.

²⁷ Pisiku ilyaseveni umuputi amupime sona umuntu yula, po nanti chikusata pamubili, umuputi amunene umuntu yula pakuba muntu munyazu, pakuti ghanagha gho mambombo.

²⁸ Nanti ibala lili bulo bulabula, sona litasatite pamubili, loli lyapola, kokuti ichi cho chitufya bulo icha moto. Umuputi amunene umuntu yula pakuba muntu muswepu, pakuti ili lyo libala bulo pachifukwa icha bupye.

²⁹ “Nanti umwanavuli pamo umukolo ali ni chilonda pamutu pamo ku chilevu,

³⁰ umuputi achipime ichilonda chila. Nanti ichilonda chila chibiye, sona ameya ghache ghaba gha kayinja, sona ghafyololoka, kokuti ghanagha gho mambombo, po umuputi amunene umuntu yula pakuba muntu munyazu.

³¹ Loli nanti umuputi achipima ichilonda chila, nukwagha ukuti chitibiye, sona pate ameya amafitu pabuzilo bula, umuputi amwefyepo umuntu yula pakasi pabantu amasiku seveni.

³² Pisiku ilyaseveni, umuputi achipime sona ichilonda chila, po nanti chitasatite, nukuti ameya gha kayinja naghamo, sona nanti chitibiye,

³³ umuntu yula amwe isisi, loli atakamwe ameya agha pa chilonda pala. Umuputi amwefyepo umuntu yula pakasi pabantu amasiku seveni.

³⁴ Pisiku ilyaseveni umuputi achipime sona ichilonda chila, po nanti chitasatite pamubili, sona nanti chitibiye, amunene umuntu yula pakuba muntu muswepu. Umuntu yula achape amenda ghache, po akuba muntu muswepu.

³⁵ Loli nanti ichilonda chikusata pamubili, bo umuputi amunena kale pakuba muntu muswepu,

³⁶ umuputi amupime sona umuntu yula. Po nanti ichilonda chikusata pamubili, umuputi atakatamiwanje pakulonda ameya ghakayinja, pakuti umuntu yula aba muntu munyazu.

³⁷ Loli nanti umuputi achipima akiza nkani ichilonda chila nukwagha ukuti chitasatite pamubili, sona nukuti ameya amafitu ghakumela, kokuti ichilonda chila chapola. Po umuputi amunene umuntu yula pakuba muntu muswepu.

³⁸ “Nanti umwanavuli pamo umukolo ali ni vibebe iviswepu pamubili wache,

³⁹ umuputi amupime umuntu yula. Nanti ivibebe vila vibufu, kokuti chinichi cho chitufya bulo chicho chanda pa mubili. Po umuntu yula akuba muntu muswepu.

⁴⁰ “Nanti umwanavuli apanyuka isisi kumutu wache nukuba ni chipala, kokuti umuntu yula aba muntu muswepu.

⁴¹ Nanti umwanavuli apanyuka isisi pacheni pamo kunkonto, kokuti umuntu yula aba muntu muswepu.

⁴² Loli nanti pachipala icha kunkonto pamo pacheni chache pali ichilonda ichichesamile, kokuti ghanagha gho mambombo, ghagho ghamulema kunkonto pamo pacheni chache.

⁴³ Umuputi amupime umuntu yula, po nanti ichilonda icha pachipala icha kunkonto pamo pacheni chaba chichesamile ukuyana bulo na mambombo,

⁴⁴ kokuti umuputi amunene umuntu yula pakuba muntu munyazu, pachifukwa ichakuti ali ni chilonda pamutu wache.

⁴⁵ “Umuntu uwa mambombo, avwalaye ivisepe, atakapese isisi zyache, sona avwinke umulomo wache uwa pamwanya nukukolomoka ukuti, ‘Ane ne muntu munyazu! Ane ne muntu munyazu!’

⁴⁶ Umuntu yula abanje muntu munyazu akabalilo kache kosi kako ali na mambombo, sona epepo pakasi pabantu nukwikala mwene kuzi ukwa visakasa.

Nizya ichuku

⁴⁷ “Nanti ichuku chawa pamwenda, manyi uwa meya, manyi mutonte,

⁴⁸ manyi mwenda umutonte ghugho ghulukiwe akiza, manyi uwa meya, manyi uwa ikwela,

⁴⁹ sona nanti cha gilini pamo chichesamu, kokuti chinichi cho chuku, po umwenda ghula ghulanjiziwanje ku muputi.

⁵⁰ Umuputi achipime ichuku chila nukuwefyapo umwenda ghula pakasi pabantu amasiku seveni.

⁵¹ Pisiku ilyaseveni umuputi yula aghupime sona umwenda ghula, po nanti ichuku chasata pamwenda, kokuti umwenda ghulaghula munyazu.

⁵² Po umuputi oche pamoto umwenda ghula, pakuti ichuku chila chaghunyazya umwenda uwakulukiwa akiza, pamo meya, pamo umutonte, pamo uwa ikwela, pakuti ichuku chakoghofya nkani.

⁵³ “Loli nanti umuputi aghupima umwenda ghula nukwagha ukuti ichuku chitasatite pamwenda uwakulukiwa akiza ghula,

⁵⁴ umuputi yula alamule ukuti umwenda ghula ghuchapiwe. Po awefyepo umwenda ghulaghula pakasi ba bantu amasiku seveni.

⁵⁵ Bo umwenda ghula wachapiwa, umuputi aghupime sona, po nanti ichuku chila chichili chili bulabula, napapo chitasatite, kokuti umwenda ghula munyazu. Mughoche pamoto umwenda ghula, napapo ichuku chila chawa kwisinda pamo kuntazi.

⁵⁶ “Loli nanti umuputi yula aghupima sona umwenda ghula, nukwagha ukuti ichuku chachuja, bo umwenda ghula wachapiwa, azepulepo ichigaba icha mwenda manyi icha mwenda uwakulukiwa akiza manyi icha ikwela papo pali ichuku.

⁵⁷ Po nanti ichuku chila chikuboneka sona pamwenda ghula, manyi mwenda uwakulukiwa akiza, manyi uwa ikwela, kokuti ichuku chila chikusata. Po ichintu chosi chicho chili ni chuku chochiwanje pamoto.

⁵⁸ Loli nanti achapa umwenda ghula manyi mwenda uwakulukiwa akiza manyi uwa ikwela papo pali ichuku sona nanti ichuku chila chitalipo kokuti umwenda ghula ghuchapiwe sona, po ghukuba mwenda umuswepu.”

⁵⁹ Ulu lo lwiho ulwakunena nizya ichuku chicho chili pamwenda, manyi mwenda uwa meya manyi mwenda umutonte manyi mwenda uwakulukiwa akiza manyi chintu chosi icha ikwela umwakuti mungachinena pakuba chintu ichiswepu pamo ichintu ichinyazu.