Aba Levi 11 - IBAYIBOLO 2024

Ivinyamana iviswepu nivinyazu

¹ U Mwene akamubuzya u Mozesi nu Aloni akati,

² “Ubabuzye aba Izilayeli uti, ‘Ivi vyo vinyamana vivyo mungalya pa vinyamana vyosi ivya pachisu ichapasi:

³ Mungalya ichinyamana chosi chicho inyayo zyache zigabinkanite pabili, sona chitakubukula.’ ”

⁴ “Vilipo ivinyamana vimo vivyo vikubukula, sona na vivyo inyayo zyabo zigabinkanite pabili, loli abantu batakalyanje ivinyamana vinivi. Napapo ingamila yikubukula, loli inyayo zyache zitagabinkanite pabili. Ingamila cho chinyamana ichinyazu.”

⁵ Upelemende, cho chinyamana ichinyazu, napapo inyayo zyache zitagabinkanite pabili, loli akubukula.

⁶ Ukalulu, cho chinyamana ichinyazu, napapo inyayo zyache zitagabinkanite pabili, loli akubukula.

⁷ Ingulube, cho chinyamana ichinyazu, napapo inyayo zyache zigabinkanite pabili loli chitakubukula, chinichi cho chinyamana ichinyazu.

⁸ Mutakalyanje inyama yache, pamo ukuyipalamasya bulo nanti yifuye, pakuti vinivi vyo vinyamana ivinyazu.

⁹ “Mungalya ivyabumi vyosi ivya mumizi vivyo vili nu mupepe, sona nu tupapa.

¹⁰ Loli mutakalyanje ivyabumi vyosi ivya munyanja pamo ivya mulusoko vivyo vite nu mupepe sona nu tupapa, pakuti vyo vinyamana ivinyazu.

¹¹ Ivyabumi vinivi muvipime pakuba vinyazu. Mutakalyevyo sona mutakavipalamasyanje nanti vifuye.

¹² Mutakalyanje ivyabumi vyosi ivya mumizi vivyo vite nu mupepe nu tupapa.”

¹³ “Iviyuni vivyo muvipimaye pakuba vinyazu, sona mutakalyanje, pakuti vinyazu vyo ivi: Amakubi na mazwanga ni sisimusi

¹⁴ na mabimba ni njela izyakulekanalekana

¹⁵ na bachigobe abakulekanalekana

¹⁶ ni bututu na masisimusi ni nyangenyange na bakapula abakulekanalekana

¹⁷ na mazwanga aba mpughulu ni nombo sona na mabimbi aghakulekanalekana

¹⁸ na mazwanga aghakulekanalekana nu chipungu

¹⁹ ni nyangenyange, na basele abakulekanalekana, sona nu kasyusyu.”

²⁰ Utwakubuluka tosi tuto tukwavula tunyazu.

²¹ Loli mungalya utwakubuluka tosi tuto tuswepu.

²² Utwakubuluka tuto mungalya to utu: Umakanta intafu sona ni mpazi.

²³ Loli utwakubuluka tosi utunji utwakwavula mutupimaye pakuba tunyazu.

²⁴ Vilipo ivinyamana vimo vivyo vingabanyazya. Umuntu wesi yuyo akuvipalamasya ivinyamana vinivi nanti vifuye, akuba muntu munyazu mupaka pachamabwila.

²⁵ Nanti umuntu aseba bulo ichinyamana ichifwe, achape amenda ghache, sona akuba muntu munyazu mupaka pachamabwila.

²⁶ Ichinyamana chosi chicho chili ni nyayo zizyo zigabinkanite pabili, loli zitagabinkanite apinji pamo chitakubukula chinyazu sona umuntu nanti akuchipalamasya akuba muntu munyazu.

²⁷ Pa vinyamana vyosi ivya nyayo folo, vivyo vili ni zula, muvipimaye pakuba vinyazu, sona umuntu wesi yuyo akuvipalamasya nanti vifuye, akuba muntu munyazu mupaka pachamabwila.

²⁸ Umuntu wesi yuyo aseba ivinyamana vinivi nanti vifuye, achape amenda ghache, sona akuba muntu munyazu mupaka pachamabwila.

²⁹ Ivyakwavula vyosi vivyo vinyazu vyo ivi: Udunko ni mbeba nu lubulu nu syololi uwa muzi

³⁰ nu syololi uwa munyumba nu lubulu nu sindi sona nu luvwi.

³¹ Muvipimaye ivinyamana vinivi pakuba vinyazu. Umuntu wesi yuyo akuvipalamasya nanti vifuye, akuba muntu munyazu mupaka pachamabwila.

³² Nanti choka icha vinyamana vinivi chifuye pamo chawila pa chintu, ichintu chilachila chikuba chinyazu, manyi chikwi manyi mwenda manyi likwela manyi lisaka. Ichintu chinichi muchidwibike mumizi, loli pope bulo chikuba chinyazu mupaka pachamabwila. Pisinda pache chikuba chintu ichiswepu.

³³ Nanti ichintu chawila musonta, kokuti ichintu chosi musonta mula chikuba chinyazu, po isonta yilayila muyifwantannyanje.

³⁴ Nanti amizi agha musonta yila ghakupukila ichakulya, kokuti ichakulya chilachila chikuba chinyazu, sona ichakung'wela chosi chicho chili musonta yila chikuba chinyazu.

³⁵ Nanti ichintu ichifwe chawila pachintu chimo, kokuti ichintu chilachila chikuba chinyazu manyi muvuno manyi sonta, vyosi vinivi muvifwantannyanje, pakuti vinyazu.

³⁶ Nanti ichintu ichifwe chawila pa mbwibwi pamo muchiziba icha mizi, kokuti amizi ghalaghala ghakuba miza bulo, loli nanti umuntu akuchiseba ichintu ichifwe chila, kokuti umuntu yulayula akuba muntu munyazu.

³⁷ Nanti ichintu ichifwe chawila pa mbeyu yiyo abantu bakulonda pakubyala, kokuti imbeyu yilayila yikuba mbeyu swepu.

³⁸ Loli nanti imbeyu yila yanyeka na mizi ghalaghala, sona nanti ichintu ichifwe chila chawila pa mbeyu yila, kokuti imbeyu yilayila yikuba nyazu.

³⁹ Nanti umuntu achipalamasya ichinyamana ichifwe chene, chicho mwitikiziwe pakulya, kokuti umuntu yulayula akuba muntu munyazu mupaka pachamabwila.

⁴⁰ Nanti umuntu akulya inyama iya chinyamana chinichi, achape amenda ghache, sona akuba muntu munyazu mupaka po pachamabwila. Umuntu wesi yuyo akuseba ichinyamana ichifwe chene chila, achape amenda ghache, sona akuba muntu munyazu mupaka pachamabwila.

⁴¹ Mutakalyanje ivyabumi vyosi ivyakwavula, pakuti vinyazu.

⁴² Mutakalyanje ivyabumi ivyakwavula manyi vya vinama folo manyi vyakwendela ivinama ivyinji, pakuti vinyazu.

⁴³ Mutakinyazyanje mwebene pakulya ivintu vinivi.

⁴⁴ Ane ne Mwene, u Chala winyu. Polelo mwiswefye mwebene pakuba bantu bazelu, pakuti ane ne Muzelu. Mutakinyazyanje mwebene ni vinyamana ivyakwavula.

⁴⁵ Ane ne Mwene, nene nkabefyamo mu Ijiputi, umwakuti imbanje ne Chala winyu. Mubanje mwe bantu bazelu, pakuti ane ne Muzelu.

⁴⁶ Ulu lo lulaghilo ulwakunena nizya vinyamana ni viyuni, ni vyabumi vyosi ivya mumizi, sona na vyosi ivyakwavula.

⁴⁷ Mulesannyanje pakasi pa vintu ivinyazu ni vintu iviswepu, sona na pakasi pavipeliwa pavyabumi vivyo mungalya ni vyabumi vivyo mutangalya.