Aba Levi 10 - IBAYIBOLO 2024

Ukunanga ukwa Nadabu nu Abihu

¹ Po u Nadabu nu Abihu, babo bakaba bana aba Aloni, bakasenda ichakufukizizya utwakununkila, uyu ichache, uyu ichache nukubikamo umoto ghugho ghutakwitikiziwa nu Mwene.

² U Mwene akatuma umoto uwakwaka nukubocha, po bakafwila palapala pamaso pa Mwene.

³ U Mozesi akamubuzya u Aloni akati, “Agha gho mazyu agha Mwene bo akuti, ‘Abantu bosi babo bali papipi nane, nkwiza pakubalanjizya ubuzelu bwane sona nkwiza pakuchindikiwa pakasi pabantu bosi.’ ” Loli u Aloni akaba bulo myee.

⁴ U Mozesi akamwitizya u Mishayeli nu Elizafani, abana aba Uziyeli, yuyo akaba we wise umunandi uwa Aloni nukubabuzya ukuti, “Zagha, efyapo imivimba iya bakamu binyu pabuzilo ubuzelu ubu nukubuka nayo kuzi ku visakasa.”

⁵ Po bakiza nukuyinyamula, bo yili munkazo zyabo nukubuka nayo kuzi ukwa visakasa ukuyana namumo u Mozesi akabalamulila.

⁶ U Mozesi akamubuzya u Aloni na bana bache, u Eleyazala nu Itamali akati, “Mutakalanjizye ichililo chinyu pakuzileka bulo isisi zyinyu zizyo zitapesiwe, sona na pakuzepula amenda ghinyu. Nanti mwabomba bunubu, mukwiza pakufwa, sona u Mwene akwiza pakubafunda abantu bosi nu bukali bwache. Loli aba Izilayeli bosi bitikiziwe ukulila pachifukwa icha bufwe ubwa babo baghoghiwe numoto ghugho u Mwene akatuma.

⁷ Mutakepepo pamulyango uwa Chisakasa icha Mwene, lumo mungafwa pachifukwa ichakuti amwe mukapakaziwa na mafuta agha Mwene.” Po bakabomba vyosi vivyo u Mozesi akabalamula.

Amalamulo aghakunena nizya baputi

⁸ U Mwene akamulamula u Aloni akati,

⁹ “Awe na bana bako mutakang'welaye uvinyo, pamo ubwalwa, bo mukwinjila mu Chisakasa icha Mwene lumo mungafwa. Ulu lubanje lulaghilo ulwa bwila na bwila mupaka inkulilo zyinyu zyosi izya muntazi.

¹⁰ Mulesannyanje pakasi pavintu ivizelu na pavintu ivinyazu, sona pakasi pavintu iviswepu na pavintu ivinyazu.

¹¹ Mubamanyisyanje aba Izilayeli amalamulo ghosi ghagho u Mwene akabapa ukwendela mwa Mozesi.”

¹² U Mozesi akamulamula u Aloni na bana bache babili babo bakasyalako, u Eleyazala nu Itamali ukuti, “Senda ichakwiyipa icha busu, chicho chasyalako pa chakwiyipa ichakocha kwa Mwene mulyelecho ichibama chicho chite ni chilungo mulubazu ulwa chighemo, pakuti ichi cho chakwiyipa ichizelu nkani.

¹³ Muchilyele Mubuzilo Ubuzelu, pakuti ichi cho chigaba chako na bana bako icha chakwiyipa ichakocha, pachifukwa ichakuti zyo zizyo u Mwene akandamula.

¹⁴ Loli awe na bana bako abalumendo na balindu mungalya akajimbi akakuzyunguziwa mumwanya pamaso pa Mwene, poka ni ntapatapa. Muvilyele mubuzilo ubuswepu, pakuti nakupa awe na bana bako pakuba chigaba chako icha chakwiyipa ichabupoka icha ba Izilayeli.

¹⁵ Wize ni ntapatapa na kajimbi pakabalilo kako amafuta ghakubikiwa pamaso pa Mwene ukuti chibanje chakwiyipa ichakuzyunguzya mumwanya. Po intapatapa na kajimbi vibanje vyako na bana bako icha bwila na bwila, ukuyana namumo u Mwene akalamulila.”

¹⁶ Bo u Mozesi abuzikizya nizya mbuzi iya chakwiyipa ichakupepesezya imbibi yila, akabuziwa ukuti yochiwe kale. Po akamukalalila u Eleyazala nu Itamali, abana aba Aloni babo bakasyalako ukuti,

¹⁷ “Nkimba choni chicho mutakalyelagha ichakwiyipa ichakupepesezya imbibi Mubuzilo Ubuzelu bula? Ichi cho chakwiyipa ichizelu nkani, sona u Mwene akabapa ukuti chibanje ichakupepesezya imbibi izya bantu bosi.

¹⁸ Pachifukwa ichakuti ibanda lyache litinjiye mu Ubuzilo Ubuzelu, chikaba chiza ukuti ngali mwachilyela bulo Mubuzilo Ubuzelu, ukuyana namumo nkalamulila.”

¹⁹ Po u Aloni akamwamula u Mozesi akati, “Umusanya ughu abana bane babika ichakwiyipa ichakupepesezya imbibi zyabo ni chakwiyipa ichakocha pamaso pa Mwene. Loli pope bulo ivintu ivyakoghofya vinivi vingwiliye ane! Buli nanti ane umusanya ughu nalyanga ichakwiyipa ichakupepesezya imbimbi, nkimba ngali u Mwene ahoboka nane?”

²⁰ Bo u Mozesi ivwa zinizi, akikutisiwa.