Aba Levi 1 - IBAYIBOLO 2024

Ichakwiyipa ichakocha

¹ Bo u Mwene ali mu Chisakasa akamwitizya u Mozesi nukumubuzya ukuti,

² “Ubalamule aba Izilayeli uti, ‘Nanti umuntu yumo pakasi papinyu akubika ichakwiyipa kwa Mwene, ize ni ng'ombe, pamo ing'ozi, pamo imbuzi.

³ “ ‘Nanti umuntu akubika ing'ombe ukuti chibanje chakwiyipa ichakocha kwa Mwene, abikaye inkambaku inyine yiyo yite ni chilema nachimochimo. Ayibikilaye pamulyango uwa Chisakasa icha Mwene umwakuti yingapokeleliwa.

⁴ Umuntu yula abike inyobe yache pamutu uwa nkambaku yila, po yikwiza pakuba chakwiyipa ichakocha ichakupepesezya imbibi mubuzilo bwache.

⁵ Pisinda pache ayibole inkambaku yila pamaso pa Mwene, po abanyumba iya Aloni, babo baputi, bize ni banda lyache nukulinyafila mumbazu zyosi folo izya chighemo, chicho chili pamulyango uwa Chisakasa.

⁶ Po ayikase inkambaku yila nukudumulannya muvipuza.

⁷ Abana aba Aloni bala, babo baputi, bapembe umoto pachighemo.

⁸ Bavibike akiza ivipuza ivya nyama yila pamoto poka nu mutu na mafuta.

⁹ Aghasuke na mizi amala ni vinama sona umuputi oche pamoto inyama yosi pachighemo ukuti chibanje chakwiyipa ichakocha. Umunusi uwa chakwiyipa chinichi ghukumuhobosya u Mwene.

¹⁰ “ ‘Nanti umuntu akubika ing'ozi pamo imbuzi ukuti vibanje chakwiyipa ichakocha, abanje we dubi pamo usabwe umusita chilema nachimochimo.

¹¹ Amubolele kumitu ukwa chighemo, pamaso pa Mwene. Po abana aba Aloni, babo baputi, banyafile ibanda lyache mumbazu zyosi folo izya chighemo.

¹² Adumulannye muvipuza, umuputi asende sona umutu na mafuta nukuvibika vyosi pankwi izya moto pachighemo.

¹³ Asuke na mizi amala ni vinama. Po umuputi abike vyosi pachighemo nukuvyocha ukuti chibanje chakwiyipa ichakocha. Umunusi uwa chakwiyipa chinichi ghukumuhobosya u Mwene.

¹⁴ “ ‘Nanti umuntu akubika ichiyuni kwa Mwene ukuti chibanje chakwiyipa ichakocha, yibanje nkunda pamo intozi.

¹⁵ Umuputi ize nayo pachighemo, ayinyonge isingo nukocha umutu pamoto pachighemo. Atonyezye ibanda lyache pasi mulubazu ulwa chighemo.

¹⁶ Po efyepo ichigolomilo poka na meya ghache nukuvisumbila pabuzilo bubo bakusumbilapo itoyi kubwinjililo bwizuba ubwa chighemo.

¹⁷ Aleme ivipapande vyache nukuvizepula pakasi, loli atakayizepule yosi. Po umuputi ayoche pankwi izya moto pachighemo. Chinichi cho chakwiyipa ichakocha, umunusi uwa chakwiyipa chinichi ghukumuhobosya u Mwene.