Aba Hebeli 9 - IBAYIBOLO 2024

Ichiputo icha muchisu ichapasi nicha kumwanya

¹ Ulufingo ulwakwanda lula lukaba ni ndaghilo izya chiputo, sona nu buzilo ubuzelu ubwakwiputilapo bukayaniziwa na bantu.

² Ichisakasa chikazengiwa. Muchipinda ichakwanda mukaba ichakubikapo inyale, ni tebulo sona ni chibama ichipaghuliwa. Ichipinda ichi chikitiziwanga ukuti, “Ichipinda Ichizelu nkani.”

³ Kwisinda uwa mwenda uwakuzighila kukaba ichipinda chicho chikitiziwanga ukuti, “Ichipinda Ichizelu nkani.”

⁴ Muchipinda chinichi mukaba ichighemo icha golide ichakufukizizyapo ivyakununkila. Mukaba sona Ibokosi ilya Lufingo, ibokosi lyosi kuzi na mukasi bulo likamatiwa nu golide. Mubokosi mulamula mukaba isonta, mumo mukaba umana ni ndisa iya Aloni yiyo yikalemba amani. Mukaba sona amabwe amapapate mabili papo pakasimbiwapo amalamulo.

⁵ Pamwanya pa bokosi pala pakaba ivipeliwa ivya vipapande ivyakulanjizya ubuchindamu ubwa Chala. Ni vipapande vyabo vikavwinka pabuzilo ubwakusayanilanapo. Loli losi ulu tutangalingannya ivintu vyosi ivi umwakufikapo.

⁶ Bo bayannya ivintu vyosi vinivi, abaputi bakwinjila muchipinda ichakwanda chila isiku ni siku pakubomba imbombo zyabo izya chiputo.

⁷ Loli Umuputi mwene Usongo akwinjilamo muchipinda ichabubili chila lyoka bulo pamwaka. Akusenda ibanda lilyo akwibikila mwene pachifukwa icha mbibi izyache ni zyache, sona ni mbibi zizyo abantu bananga umwakusita kumanya.

⁸ U Muzimu Umuzelu akulanjizya pabuzelu bulo ukuti izila iyakwinjilila mu Chipinda Ichizelu nkani yichili pakwighuka, bo ichisakasa ichakwanda chichili chiliko.

⁹ Ichi cho chimanyilo ichakulanjizya akabalilo kanaka, ukung'anamula ukuti ivyabupi ni vyakwiyipa vivyo umuntu akubika vitangamupela umuntu yuyo akwiputa pakuba nu moyo uwakufikapo.

¹⁰ Pakuti ivi vyo vintu ivyakunena bulo nizya vyakulya ni vyakung'wela, sona ni nyiho izyakulekanalekana izyakwiswefya. Izi zyo ndaghilo izyakuzi bulo, zizyo zikwiza pakubako mupaka pakabalilo kako u Chala akwiza pakwikazizya ulubatiko ulupya.

¹¹ Loli bo u Kilisitu iza pakuba muputi usongo uwa vintu ivyiza, vivyo vili kale pano. Muchisakasa mumo akabombaghamo chapamwanya ni chakufikapo nkani. Chitakazengiwa ni nyobe izya bantu, kokuti chite chigaba icha chipeliwa ichi.

¹² U Kilisitu atakinjila mu Chipinda Ichizelu nkani ni banda ilya mbuzi, pamo ni banda ilya ngwata. Loli akinjilamo ni banda ilyache ni lyache nukutusendela aswe ubupoki ubwa bwila na bwila.

¹³ Ibanda ilya mbuzi nilya nkambaku ni toyi ilya mpampali bakanyafilagha pamitu iya bantu, babo bakaba banyazu. Ivi vikabaswefyanga ubunyazu bwabo pakwefya iviko mu mabili ghabo.

¹⁴ Po ibanda ilya Kilisitu, yuyo ukwendela mu Muzimu uwa bwila na bwila, akiyipa mwene ukuti chibanje chakwiyipa ichakufikapo kwa Chala likwiza pakuswefya umabyebye witu pambombo izyabulo, umwakuti tungamubombela u Chala umumi.

¹⁵ Pachifukwa ichi u Kilisitu we mufusya uwa lufingo ulupya, umwakuti abantu babo bitiziwe nu Chala bapokele ulusayo ulwa bwila na bwila lulo u Chala akalayizya. Ichi chikabombiwa ukwendela mu bufwe ubwa Kilisitu bubo bukupoka abantu babo bakabomba imbibi, bo bali nu lufingo ulwakwanda lula.

¹⁶ Nanti umuntu akusimba ulufingo ulwakumulekela umuntu yumo ichuma, chikulondiwa pakusimikizya ukuti umuntu yuyo akasimba ulufingo lula naloli afuye.

¹⁷ Pakuti ulufingo lute na maka nanti umuntu yuyo akasimba mumi. Lukuba ni mbombo pene papo nanti umwenecho afwa.

¹⁸ Ichi cho chifukwa napo ulufingo ulwakwanda lutakaba na maka ukusita ibanda.

¹⁹ Ichakwanda u Mozesi akafumusya pakasi pabantu bosi nizya mbombo izya Ndaghilo. Pisinda pache akasenda ibanda ilya nkambaku nilya mbuzi nukongannya na mizi, po akanyafila pibuku ilya Ndaghilo, sona na pabantu bosi pakubombezya ichisilo poka na meya amachesamu.

²⁰ Akati, “Ili lyo libanda ilya lufingo, lulo u Chala abalamuye pakwivwila.”

²¹ Umwakuyana bulo, u Mozesi wepe akanyafila Ichisakasa ni banda, sona ni vintu vyosi vivyo bakabombezyanga pachiputo.

²² Naloli, ukuyana ni Ndaghilo izya Mozesi, papipipipi ichintu chosi chikuswefiwa ni banda, sona imbibi zikuhobokeliwa nanti ibanda lyatonya.

Ukwiyipa ukwa Kilisitu kukwefya imbibi

²³ Po chikaba chakulondiwa ukuti ichisakasa ni vintu vyache vyosi, vivyo vikaba chifwanikizyo bulo icha vintu ivya kumwanya viswefiwe ni vyakwiyipa vinivi. Loli ivyene ivya kumwanya ukuti viswefiwe pakalondiwanga ivyakwiyipa ivyizapo ivyakuchilapo.

²⁴ Pakuti u Kilisitu atakinjila Mubuzilo Ubuzelu chicho chikazengiwa ni nyobe izya bantu, ubuzilo bubo bukaba chifwanikizyo bulo icha buzilo ubwenecho. Loli akinjila kumwanya ukwenecho kuko akubonekela pamaso pa Chala mubuzilo bwitu.

²⁵ Umuputi usongo akinjilagha mu Chipinda Ichizelu nkani umwaka nu mwaka ni banda lilyo litakaba ilyache ni lyache. Loli u Kilisitu atakinjilamo pakwiyipa mwene kabilikabili.

²⁶ Pakuti nanti chikabanga bunubu, ngali u Kilisitu ayimba akinji bulo ukwandila pakupeliwa ukwa chisu. Awe! Loli ilelo pakabalilo akabumalilo aka aboneka lyoka bulo mpela ukuti efye imbibi pakwiyipa mwene.

²⁷ Umuntu wesi akufwanga lyoka bulo, sona pisinda pache po pakwiza ubulongi.

²⁸ Umwakuyana bulo, u Kilisitu wepe akabikiwa lyoka bulo ukuti chibanje chakwiyipa ukwefya imbibi izya bantu abinji. Akwiza pakuboneka akabubili, pate pakwefya imbibi pene, awe, loli ukuti abapoke abantu babo bakumulindilila.